ນັກສຶກສາລາວ 3 ຄົນ ໄດ້ຮັບທຶນໄປສຶກສາຕໍ່ຢູ່ປະເທດຝຣັ່ງ

292 24 ກ.ລ. 2019 ຂ່າວໜ້າ​ໜຶ່ງ
ນັກສຶກສາລາວ 3 ຄົນ ໄດ້ຮັບທຶນໄປສຶກສາຕໍ່ຢູ່ປະເທດຝຣັ່ງ

    ນາງ ວົງ​ພະ­ຈັນ ຄຳ​ພິ​ພອນ ນາງ ເພັດ​ການ​ລະ​ຍາ ວົງ​ມຸກ­ດາ ແລະ ນາງ ສຸ­ດາ​ລັດ ສີ​ປະ­ເສີດ ນັກ​ສຶກ​ສາ​ລາວ ຈາກ​ນະ­ຄອນ­ຫຼວງ​ວຽງ​ຈັນ ແຂວງ​ສະ­ຫວັນ​ນະ​ເຂດ ແລະ ແຂວງ​ຫຼວງ​ພະ​ບາງ ໄດ້​ຜ່ານ​ການ​ຄັດ​ເລືອກ​ມາ​ຈາກ​ໂຮງ­ຮຽນ​ລະ­ບົບ 2 ພາ­ສາ (ບີ​ແລັງ) ໄດ້​ຮັບ​ທຶນ​ການ​ສຶກ​ສາ​ໄປ​ສຶກ​ສາ​ຕໍ່​ຢູ່​ມະ­ຫາ­ວິ­ທະ­ຍາ­ໄລ​ເຕັກ​ໂນ​ຊີ ປະ­ເທດ​ຝຣັ່ງ.

    ພະ​ແນກ​ວັດ­ທະ­ນະ­ທຳ ແລະ ການ​ຮ່ວມ​ມື​ຂອງ​ສະ­ຖານ­ທູດ​ຝຣັ່ງ ປະ­ຈຳ ສປປ ລາວ ຮ່ວມ​ກັບ​ບໍ­ລິ­ສັດ​ໄຟ­ຟ້າ​ນ້ຳ​ເທີນ 2 ຈັດ​ພິ­ທີ​ສະ­ຫຼອງ​ການ​ໃຫ້​ທຶນ​ການ​ສຶກ​ສາ ແລະ ການ​ເດີນ­ທາງ​ໄປ​ສຶກ​ສາ​ຢູ່​ປະ­ເທດ​ຝຣັ່ງ​ຂອງ​ນັກ​ສຶກ​ສາ​ດັ່ງ­ກ່າວ ຂຶ້ນ​ວັນ​ທີ 19 ກໍ­ລະ­ກົດ 2019 ຢູ່​ສະ​ຖາ​ບັນ​ຝຣັ່ງ.

    ນັກ​ສຶກ​ສາ 3 ຄົນ ທີ່​ຖືກ​ຄັດ​ເລືອກ ເປັນ​ສ່ວນ​ໜຶ່ງ​ຂອງ​ໂຄງ­ການ “ທຶນ​ການ​ສຶກ​ສາ​ເພື່ອ​ອະ­ນາ­ຄົດ” ເຊິ່ງ​ໄດ້​ຈັດ​ຕັ້ງ​ປະ­ຕິ­ບັດ​ຮ່ວມ​ກັນ​ໂດຍ​ສະ­ຖານ­ທູດ​ຝຣັ່ງ ປະ­ຈຳ ສປປ ລາວ ແລະ ບໍ­ລິ­ສັດ​ໄຟ­ຟ້າ​ນ້ຳ​ເທີນ 2 ມາ​ແຕ່​ປີ 2015 ເຊິ່ງ​ໃນ​ວັນ​ທີ 10 ສິງ­ຫາ​ນີ້ ທັງ 3 ຄົນ​ຈະ​ໄດ້​ອອກ​ເດີນ­ທາງ​ໄປ​ປະ­ເທດ​ຝຣັ່ງ ເພື່ອ​ເລີ່ມ​ສຶກ​ສາ​ຢູ່​ທີ່​ມະ­ຫາ­ວິ­ທະ­ຍາ­ໄລ​ເຕັກ​ໂນ​ໂລ​ຊີ ຫຼັກ­ສູດ 3 ປີ.

    ໂຄງ­ການ “ທຶນ​ການ​ສຶກ​ສາ​ເພື່ອ​ອະ­ນາ­ຄົດ” ໄດ້​ເປີດ​ໂອ­ກາດ​ໃຫ້​ນັກ­ຮຽນ​ລາວ​ທີ່​ມີ​ຄວາມ​ຮູ້​ດ້ານ​ພາ­ສາ​ຝຣັ່ງ ໄດ້​ຮັບ​ການ​ສຶກ​ສາ​ທີ່​ມີ​ຄຸນ​ນະ​ພາບ​ສູງ​ດ້ານ​ເຕັກ­ນິກ​ວິ­ຊາ​ການ ແລະ ຫຼັງ​ຈາກ​ຮຽນ​ຈົບ ຜູ້​ທີ່​ມີ​ຄະ­ແນນ​ດີ​ທີ່​ສຸດ ຈະ​ມີ​ໂອ­ກາດ​ໄດ້​ເຮັດ​ວຽກ​ກັບ​ບໍ­ລິ­ສັດ​ໄຟ­ຟ້າ​ນ້ຳ​ເທີນ 2 ເຊິ່ງ​ໄລ­ຍະ​ຜ່ານ​ມາ ມີ​ນັກ​ສຶກ​ສາ​ຈາກ​ໂຄງ­ການ​ນີ້ 6 ຄົນ ທີ່​ຮຽນ​ຈົບ​ຈາກ​ປະ­ເທດ​ຝຣັ່ງ ແລະ ໄດ້​ກາຍ­ເປັນ​ພະ­ນັກ­ງານ​ຢູ່​ບໍ­ລິ­ສັດ​ໄຟ­ຟ້າ​ນ້ຳ​ເທີນ 2 ໃນ​ປັດ­ຈຸ­ບັນ.

    ໂຄງ­ການ “ທຶນ​ການ​ສຶກ​ສາ​ເພື່ອ​ອະ­ນາ­ຄົດ” ແມ່ນ​ໝາກ­ຜົນ​ຂອງ​ການ​ຮ່ວມ​ມື​ຢ່າງ​ມີ​ປະ​ສິດ­ທິ​ຜົນ​ລະ­ຫວ່າງ​ປະ­ເທດ​ຝຣັ່ງ ແລະ ສປປ ລາວ ເຊິ່ງ​ເປັນ​ການ​ປະ­ກອບ­ສ່ວນ​ໃນ​ການ​ສ້າງ​ຄວາມ​ເຂັ້ມ­ແຂງ ແລະ ການ​ພັດ­ທະ­ນາ​ຊັບ­ພະ­ຍາ­ກອນ​ມະ­ນຸດ.

ຂ່າວທີ່ກ່ຽວຂ້ອງ