ຂະແໜງຄຸ້ມຄອງການຂົນສົ່ງທາງບົກ ສຸມໃສ່ຄຸ້ມຄອງພາຫະນະການຂັບຂີ່ເຂົ້າສູ່ລະບຽບ

196 24 ກ.ລ. 2019 ຂ່າວໜ້າ​ໜຶ່ງ
ຂະແໜງຄຸ້ມຄອງການຂົນສົ່ງທາງບົກ ສຸມໃສ່ຄຸ້ມຄອງພາຫະນະການຂັບຂີ່ເຂົ້າສູ່ລະບຽບ

    ທ່ານ ສີ​ວອນ ຊັບ​ທະ­ວີ ຫົວ­ໜ້າ​ຂະ­ແໜງ​ຄຸ້ມ​ຄອງ​ການ​ຂົນ­ສົ່ງ​ທາງ­ບົກ ພະ​ແນກ​ໂຍ­ທາ​ທິ​ການ ແລະ ຂົນ­ສົ່ງ ນະ­ຄອນ­ຫຼວງ​ວຽງ​ຈັນ (ຍທຂ ນວ) ໃຫ້​ສຳ­ພາດ​ວ່າ: ຂະ­ແໜງ​ຄຸ້ມ​ຄອງ​ການ​ຂົນ­ສົ່ງ​ທາງ­ບົກ ເປັນ​ຂະ­ແໜງ​ໜຶ່ງ​ທີ່​ເປັນ​ເສ­ນາ​ທິ​ການ​ໃຫ້​ພະ​ແນກ ຍທຂ ນວ ສາຍ​ຕັ້ງ​ຂຶ້ນ​ກັບ​ກະ­ຊວງ ຍທຂ ມີ​ພະ­ນັກ­ງານ​ທັງ​ໝົດ 57 ຄົນ ໃນ​ໄລ­ຍະ​ຜ່ານ​ມາ​ໄດ້​ຈັດ​ຕັ້ງ​ຜັນ​ຂະ­ຫຍາຍ​ມະ­ຕິ​ກອງ​ປະ­ຊຸມ​ໃຫຍ່​ອົງ­ຄະ​ນະ​ພັກ ນວ ກໍ​ຄື ຄະ­ນະ​ພັກ​ຮາກ​ຖານ ພະ​ແນກ ຍທຂ ນວ ມີ​ຜົນ­ສຳ­ເລັດ​ຫຼາຍ​ດ້ານ.

    ຜ່ານ​ການ­ຈັດ­ຕັ້ງ ເຊິ່ງ​ສະ­ແດງ​ໃຫ້​ເຫັນ ເປັນ­ຕົ້ນ ອອກ​ອະ­ນຸ­ຍາດ​ດ້ານ​ທຸ­ລະ​ກິດ​ຂົນ­ສົ່ງ ການ​ແລ່ນ​ລົດ​ປະ­ຈຳ​ປີ​ຂອງ​ລົດ​ບັນ­ທຸກ ລົດ​ໂດຍ­ສານ ລົດ​ທົ່ວ​ໄປ ອອກ​ປຶ້ມ​ຜ່ານ​ແດນ​ລົດ​ຂົນ­ສົ່ງ ຄຸ້ມ​ຄອງ​ລົດ​ຂົນ­ສົ່ງ​ສິນ­ຄ້າ ແລະ ລົດ​ໂດຍ­ສານ ຄຸ້ມ​ຄອງ​ສະ­ຖາ­ນີ​ລົດ​ຂົນ­ສົ່ງ​ໂດຍ­ສານ ທັງ​ພາຍ​ໃນ ແລະ ຕ່າງ­ປະ­ເທດ ຄຸ້ມ​ຄອງ​ສະ­ມາ­ຄົມ​ລົດ​ຕູ້ ລົດ​ເທັກ​ຊີ ລົດ​ສອງ​ແຖວ ລົດ​ຕຸກໆ​ຈຳ​ໂບ້ ລົດ­ຈັກ​ຮັບ­ຈ້າງ ຕິດ­ຕາມ​ການ​ຂຶ້ນ​ທະ­ບຽນ​ຍານ­ພາ­ຫະ­ນະ​ຢູ່ ນວ ເປັນ​ແຕ່​ລະ​ອາ­ທິດ​ເດືອນ ປີ ໂດຍ​ແມ່ນ​ກອງ​ຄຸ້ມ​ຄອງ​ພາ­ຫະ­ນະ ແລະ ການ​ຂັບ​ຂີ່​ເປັນ​ຜູ້​ຈັດ​ຕັ້ງ​ປະ­ຕິ­ບັດ ສົມ­ທົບ​ເກັບ​ຂໍ້​ມູນ​ຮ່ວມ​ກັນ ອອກ​ອະ­ນຸ­ຍາດ​ສ້າງ­ຕັ້ງ​ສູນ​ກວດ­ກາ​ເຕັກ­ນິກ ພ້ອມ​ທັງ​ລົງ​ປະ­ຈຳ­ການ​ຢູ່​ແຕ່​ລະ​ສູນ ເພື່ອ​ຕິດ­ຕາມ​ກວດ­ກາ​ການ­ເຄື່ອນ­ໄຫວ​ໃຫ້​ໄປ​ຕາມ​ລະ ບົບ​ເຕັກ­ນິກ ອອກ​ອະ­ນຸ­ຍາດ​ຮ້ານ​ສ້ອມ­ແປງ​ລົດ​ໃຫຍ່​ທີ່​ຕ່າງ­ປະ­ເທດ​ມາ​ລົງ­ທຶນ ຖ້າ​ເປັນ​ການ​ສ້ອມ­ແປງ​ຂະ­ໜາດ​ນ້ອຍ​ລົດ­ຈັກ​ລົງ​ມາ​ມອບ​ໃຫ້​ຫ້ອງ­ການ ຍທຂ ເມືອງ​ເປັນ​ຜູ້​ອະ­ນຸ­ຍາດ ຕິດ­ຕາມ​ກວດ­ກາ​ບັນ­ດາ​ລົດ​ໂດຍ­ສານ​ທາງ­ໄກ​ກ່ອນ​ອອກ​ສະ­ຖາ­ນີ​ທີ່​ໄດ້​ສົ່ງ​ພະ­ນັກ­ງານ​ລົງ​ໄປ​ປະ­ຈຳ​ຮ່ວມ​ກັບ​ສະ­ຖາ­ນີ​ລົດ­ເມ ຂຶ້ນ​ແຜນ​ຄຸ້ມ​ຄອງ​ອຸ­ບັດ­ເຫດ​ຕາມ​ຖະ­ໜົນ ເປັນ­ຕົ້ນ ລົງ​ກວດ­ກາ​ຕິດ​ຕັ້ງ​ເຄື່ອງ­ໝາຍ​ຈະ­ລາ­ຈອນ​ຢູ່​ຈຸດ​ສ່ຽງ​ຕໍ່​ການ​ເກີດ​ອຸ­ບັດ­ເຫດ​ຕ່າງໆ ຄຸ້ມ​ຄອງ​ບັນ­ດາ​ໄຟ​ສັນ­ຍານ ແລະ ໄຟ​ອຳ­ນາດ ປ້າຍ​ຈະ­ລາ­ຈອນ​ຕ່າງໆ ໂດຍ​ມີ​ທີມ​ງານ​ລົງ​ເຮັດ​ວຽກ​ທຸກ​ວັນ ຄຸ້ມ​ຄອງ​ບັນ­ດາ​ໂຮງ­ຮຽນ​ສອນ​ຂັບ​ລົດ​ຢູ່ ນວ ມີ​ທັງ​ໝົດ 16 ແຫ່ງ ຈາກ​ໃນ​ເບື້ອງ​ຕົ້ນ​ຫຼັງ​ປີ 2014 ຍັງ​ເປັນ​ປະ­ຖົມ​ປະ​ຖານ ແຕ່​ມາ​ປັດ­ຈຸ­ບັນ​ໄດ້​ມີ​ການ​ປັບ­ປຸງ​ມີ​ທ່າ​ອ່ຽງ​ດີ​ສົມ­ຄວນ ທຸກ​ໂຮງ­ຮຽນ​ມີ​ສວນ​ຈະ­ລາ­ຈອນ​ພາ­ຫະ­ນະ​ທີ່​ເປັນ​ການ​ສອນ ກໍ​ໄດ້​ປັບ­ປຸງ​ໃຫ້​ໄດ້​ຢູ່​ໃນ​ມາດ­ຕະ­ຖານ (ໃຊ້​ລົດ​ໃໝ່) ໂຮງ­ຮຽນ​ໃດ​ບໍ່​ໄດ້​ມາດ­ຕະ­ຖານ​ກໍ​ໄດ້​ໂຈະ​ການ­ເຄື່ອນ­ໄຫວ ໂດຍ​ສົມ­ທົບ​ກັບ​ກະ­ຊວງ ຍທຂ ປັບ­ປຸງ​ລະ­ບຽບ​ໃໝ່ ເພື່ອ​ໃຫ້​ມັນ​ສອດ­ຄ່ອງ​ກັບ​ສະ­ພາບ​ປັດ­ຈຸ­ບັນ.

    ສ່ວນ​ການ​ແກ້​ໄຂ​ບັນ­ຫາ​ລົດ​ແອ​ອັດ​ຕາມ​ຖະ­ໜົນ ແຕ່​ລະ​ປີ​ໄດ້​ຕິດ​ຕັ້ງ​ລະ­ບົບ​ໄຟ​ອຳ­ນາດ​ຢູ່​ແຕ່​ລະ​ຈຸດ ເປັນ­ຕົ້ນ ຢູ່​ຖະ­ໜົນ ສຸ​ພາ­ນຸ​ວົງ ຈາກ​ເມື່ອ​ກ່ອນ​ລົດ​ແອ​ອັດ ແຕ່​ປັດ­ຈຸ­ບັນ​ໄດ້​ແກ້​ໄຂ ຍ້ອນ​ເປີດ​ຈຸດ​ລ້ຽວ​ໃຫ້​ກວ້າງ ແລະ ຕິດ​ຕັ້ງ​ໄຟ​ອຳ­ນາດ​ໃສ່ ຈາກ​ປີ 2016 ທົ່ວ ນວ ມີ 56 ຈຸດ ມາ​ຮອດ​ປີ 2018 ເພີ່ມ​ຂຶ້ນ​ເປັນ 62 ຈຸດ ໃນ​ນັ້ນ ປີ 2017 ເພີ່ມ 5 ຈຸດ ແລະ ປີ 2018 ເພີ່ມ 6 ຈຸດ ພາຍ­ຫຼັງ​ຕິດ​ຕັ້ງ​ເປີດ​ໃຊ້​ເປັນ​ປົກ­ກະ­ຕິ ໄດ້​ມີ​ການ​ປັບ​ເວ­ລາ​ໃນ​ໂມງ​ເລັ່ງ​ດ່ວນ ປ່ອຍ​ລົດ​ທີ່​ເບື້ອງ​ຕິດ​ໃຫ້​ເວ­ລາ​ຫຼາຍ​ຂຶ້ນ​ເພື່ອ​ລະ­ບາຍ​ລົດ ແຕ່​ຖ້າ​ໝົດ​ໂມງ​ເລັ່ງ​ດ່ວນ​ກໍ​ໄດ້​ເປີດ​ໄຟ​ເຫຼືອງ​ເພື່ອ​ບໍ່​ໃຫ້​ລົດ​ຕິດ ແລະ ອື່ນໆ ທີ່​ສາ­ມາດ​ເຮັດ​ໃຫ້​ແກ້​ໄຂ​ການ​ສັນ­ຈອນ​ແອ​ອັດ​ຢູ່ ນວ ໄດ້​ສ່ວນ​ໃດ​ສ່ວນ​ໜຶ່ງ.

ຂ່າວທີ່ກ່ຽວຂ້ອງ