ຈີນ​ເຜີຍແຜ່​ປຶ້ມ​ປົກ​ຂາວ ກ່ຽວ​ກັບ​ປະຫວັດສາດ​ຂອງ​ຊິນ​ຈຽງ

135 24 ກ.ລ. 2019 ຂ່າວຕ່າງປະເທດ

    ຂ່າວສານ​ຊິນ​ຮວາ​ລາຍ​ງານ​ວ່າ ວັນ​ທີ 21 ກໍລະກົດ​ນີ້ ຫ້ອງການ​ຖະແຫຼງ​ຂ່າວ ຂອງ​ລັດຖະບານ​ຈີນ ໄດ້​ເຜີຍແຜ່​ປຶ້ມ​ປົກ​ຂາວ  “ບັນຫາ​ຕ່າງໆ​ໃນ​ປະຫວັດສາດ​ຂອງ​ຊິນ​ຈຽງ” ໂດຍ​ຊີ້​ອອກ​ວ່າ ຈີນ​ເປັນ​ປະເທດ​ເອກະ​ພາບ​ທີ່​ມີ​ຫຼາຍ​ຊົນເຜົ່າ ບັນດາເຜົ່າ​ໃນ​ຊິນ​ຈຽງ ເປັນ​ສະມາຊິກ​ໃນ​ມະຫາ​ຄອບຄົວ​ຊົນ​ຊາດ​ຈີນ ທີ່​ມີ​ສາຍເລືອດ​ດຽວ​ກັນ. ແຕ່​ວ່າ ໃນ​ໄລຍະ​ຜ່ານ​ມາ ອິດ​ທິ​ກຳລັງ​ທີ່​ເປັນ​ປໍ​ລະ​ປັກ ທັງ​ພາຍ​ໃນ ແລະ ຕ່າງປະເທດ ເພື່ອ​ບັນລຸ​ຈຸດປະສົງ​ໃນ​ການ​ແບ່ງ​ແຍກ​ຈີນ ຈິ່ງ​ບິດ​ເບືອນ​ປະຫວັດສາດ ປີ້ນ​ຂາວ​ເປັນ​ດຳ​ດ້ວຍ​ເຈດ​ຕະ​ນາ​ບໍ່​ດີ ໂດຍ​ເອີ້ນ​ຊິນ​ຈຽງ​ເປັນ “ຕວກ​ກີ​ສະຖານ​ຕາເວັນ​ອອກ” ໂດຍ​ບໍ່​ຫົວຊາ​ຕໍ່​ປະຫວັດ​ຄວາມ​ເປັນ​ຈິງ ແລະ ປຸກ​ປັ່ນ​ໃຫ້​ຊິນ​ຈຽງ​ເປັນ​ເອກະລາດ ເຈດ​ຕະ​ນາ​ແຍກ​ບັນດາເຜົ່າ​ຂອງ​ຊິນ​ຈຽງ ອອກ​ຈາກ​ມະຫາ​ຄອບຄົວ​ຊົນ​ຊາດ​ຈີນ ແຍກ​ວັດທະນະທຳ​ຂອງ​ບັນດາເຜົ່າ​ຢູ່​ຊິນ​ຈຽງ​ອອກ​ຈາກ​ວັດທະນະທຳ​ຈີນ ທີ່​ເຊື່ອມ​ໂຍງ​ວັດທະນະທຳ​ບັນດາເຜົ່າ​ເຂົ້າ​ເປັນ​ອັນ​ໜຶ່ງ​ອັນ​ດຽວ​ກັນ.

    ປຶ້ມ​ປົກ​ຂາວ​ເນັ້ນ​ໜັກ​ວ່າ ຊິນ​ຈຽງ​ເປັນ​ພາກສ່ວນ​ໜຶ່ງ​ຂອງ​ດິນແດນ​ຈີນ ທີ່​ບໍ່​ສາມາດ​ຕັດ​ແຍກ​ອອກ​ຈາກ​ກັນ​ໄດ້ ແຕ່ໃດໆ​ມາ ຊິນ​ຈຽງ​ກໍ​ບໍ່​ໄດ້​ເປັນ​ອັນ​ທີ່​ວ່າ “ຕວກ​ກີ​ສະຖານ​ຕາເວັນ​ອອກ” ຈັກ​ເທື່ອ ເຜົ່າ​ອຸຍ​ເກີ ກຳເນີດ​ເກີດ​ຂຶ້ນ​ຈາກ​ການ​ຍົກຍ້າຍ​ຖິ່ນ​ຖານ ແລະ ເຊື່ອມ​ໂຍງ​ເຂົ້າກັນ​ເປັນ​ເວລາ​ດົນ​ນານ​ຂອງ​ບັນພະບຸລຸດ​ຂອງ​ຫຼາຍ​ຊົນເຜົ່າ ແລະ ເປັນ​ສ່ວນ​ປະກອບ​ຂອງ​ຊົນ​ຊາດ​ຈີນ.

    ປຶ້ມ​ປົກ​ຂາວ​ລະບຸ​ຕື່ມ​ວ່າ ປັດຈຸບັນ ເສດຖະກິດ​ຊິນ​ຈຽງ​ໄດ້​ພັດທະນາ​ຢ່າງ​ຕໍ່​ເນື່ອງ ສັງຄົມ​ມີ​ຄວາມ​ສະຖຽນ​ລະ​ພາບ ແລະ ຄວາມ​ປອງ​ດອງ​ກົມກຽວ​ກັນ ຊີວິດ​ການ​ເປັນ​ຢູ່​ຂອງ​ປະຊາຊົນ​ໄດ້​ຮັບ​ການ​ປັບປຸງ​ໃຫ້​ດີ​ຂຶ້ນ​ຢ່າງ​ບໍ່​ຢຸດ​ຢັ້ງ ວັດທະນະທຳ​ມີ​ການ​ພັດທະນາ ແລະ ສີວິໄລ​ຢ່າງ​ບໍ່​ເຄີຍ​ມີ​ມາ​ກ່ອນ ສາສະໜາ​ຕ່າງໆ​ມີ​ຄວາມ​ກົມກຽວ​ປອງ​ດອງ​ກັນ ປະຊາຊົນ​ບັນດາເຜົ່າ​ສາມັກຄີ​ປອງ​ດອງ​ກັນ ແລະ ຊິນ​ຈຽງ​ຢູ່​ໃນ​ໄລຍະ​ທີ່​ມີ​ຄວາມ​ຈະເລີນ​ຮຸ່ງເຮືອງ ແລະ ພັດທະນາ​ດີ​ທີ່​ສຸດ​ໃນ​ປະຫວັດສາດ.

ຂ່າວທີ່ກ່ຽວຂ້ອງ