ຂ່າວຫຼ້າສຸດ

ບ່ອນຈອດລົດເມ-ລົດສອງແຖວ

2.184 24 ກ.ລ. 2019 ນານາສາລະ

    ເມື່ອ​ເອີ່ຍ​ເຖິງ ການ​ຄົມ­ມະ­ນາ­ຄົມ ຂົນ­ສົ່ງ​ແລ້ວ ແມ່ນ​ມີ​ຫຼາຍ​ທາງ ເປັນ­ຕົ້ນ ຄື: ທາງ­ນ້ຳ ທາງ­ບົກ ແລະ ທາງ​ອາ­ກາດ ໂດຍ​ສະ­ເພາະ ການ​ຂົນ­ສົ່ງ​ທາງ­ບົກ ກໍ​ຄື ການ​ໂດຍ­ສານ​ທາງ​ລົດ ເປັນ​ທາງ​ເລືອກ​ທີ່​ສຳ­ຄັນ​ທີ່​ຄົນ​ສ່ວນ​ໃຫຍ່​ນິ­ຍົມ​ຊົມ​ຊອບ​ກັນ ແລະ ພັກ-ລັດ ກໍ​ຄື​ອົງ­ການ​ຮັບ­ຜິດ­ຊອບ​ກ່ຽວ­ຂ້ອງ ໄດ້​ມີ​ຄວາມ​ພະ­ຍາ­ຍາມ​ເອົາ­ໃຈ­ໃສ່​ພັດ­ທະ­ນາ​ວຽກ​ງານ​ດັ່ງ­ກ່າວ​ຈົນ​ບັນ­ລຸ​ຜົນ­ສຳ­ເລັດ​ຂັ້ນ​ພື້ນ­ຖານ ຄື​ໃຫ້​ມີ​ການ ເຊື່ອມ​ໂຍງ​ເສັ້ນ­ທາງ​ຄົມ­ມະ­ນາ­ຄົມ​ຕິດ​ຈອດ​ກັນ ໃນ​ທຸກ​ເຂດ​ແຂວງ​ທົ່ວ​ປະ­ເທດ ອັນ​ເຮັດ​ໃຫ້­ການ​ໄປ­ມາ­ຫາ­ສູ່ ຢື້​ຢາມ​ຖາມ​ຂ່າວ ການ​ຈໍ​ລະ​ຈອນ​ແຈກ​ຢາຍ​ສິນ­ຄ້າ ການ­ທ່ອງ­ທ່ຽວ ໄດ້​ມີ​ການ​ເຕີບ​ໃຫຍ່​ຂະ­ຫຍາຍ­ຕົວ​ຕາມ​ຈັງ­ຫວະ ຂອງ​ການ​ພັດ­ທະ­ນາ​ເສດ­ຖະ­ກິດ-ສັງ­ຄົມ​ຂອງ​ປະ­ເທດ​ເຮົາ.

    ຢູ່​ຕົວ​ເມືອງ​ໃຫຍ່ ຫຼື ເມືອງ​ເອກ​ຂອງ​ແຂວງ ກໍ​ມີ​ເສັ້ນ­ທາງ​ລະ­ດັບ​ໄດ້​ມາດ­ຕະ­ຖານ​ຈຳ­ນວນ​ໜຶ່ງ​ຖືກ​ກໍ່­ສ້າງ​ຂຶ້ນ ເພື່ອ​ຮອງ​ຮັບ​ການ​ຂະ­ຫຍາຍ­ຕົວ​ຂອງ​ຈຳ­ນວນ​ຍວດ​ຍານ​ພາ­ຫາ​ນະ​ທີ່​ນັບ​ວັນ​ນັບ​ມີ​ປະ­ລິ­ມານ​ເພິ່ມ​ຂຶ້ນ ເວົ້າ​ສະ­ເພາະ​ໃນ​ນະ­ຄອນ­ຫຼວງ​ວຽງ​ຈັນ ປາ­ກົດ­ການ​ຈະ­ລາ ຈອນ ຕິດ​ຂັດ ໄດ້​ເກີດ​ຂຶ້ນ​ໃນ​ແຕ່​ລະ​ວັນ ເຖິງ​ແມ່ນ​ວ່າ­ການ​ຂະ­ຫຍາຍ­ຕົວ​ຂອງ​ເສັ້ນ­ທາງ​ໄດ້​ເກີດ​ຂຶ້ນ​ເປັນ​ເງົາ​ຕາມ​ຕົວ​ກໍ​ຕາມ ແຕ່​ການ​ເອົາ­ໃຈ­ໃສ່​ແກ້​ໄຂ​ບັນ­ຫາ​ດັ່ງ­ກ່າວ​ຂອງ​ອົງ­ການ​ກ່ຽວ­ຂ້ອງ​ກໍ​ເກີດ​ຂຶ້ນ​ຢ່າງ​ລຽນ­ຕິດ ເປັນ­ຕົ້ນ: ການ​ນຳ​ໃຊ້​ລະ­ບົບ​ການ​ຂົນ­ສົ່ງ​ມວນ​ຊົນ ຄຽງ​ຄູ່​ກັບ​ການ​ປູກ​ຈິດ​ສຳ­ນຶກ​ຂອງ​ຜູ້​ຄົນ​ໃຫ້​ນຳ​ໃຊ້​ການ​ຂົນ­ສົ່ງ​ມວນ​ຊົນ ເຊັ່ນ: ລົດ­ເມ​ປະ­ຈຳ​ທາງ ລົດ​ສອງ​ແຖວ​ຂອງ​ສ່ວນ​ບຸກ­ຄົນ​ທີ່​ແລ່ນ​ຕາມ​ເສັ້ນ­ທາງ​ຫຼັກ ລົດ​ຕັກ​ຊີ ລົດ​ຕຸກໆ ຈຳ​ໂບ້ ລົດ­ຈັກ ໃຫ້​ບໍ­ລິ­ການ​ຊ່ວຍ​ກໍ​ຍັງ​ປາ­ກົດ​ວ່າ ການ​ຕອບ​ສະ­ໜອງ​ຍັງ​ບໍ່​ພຽງ­ພໍ ແລະ ລົດ​ສ່ວນ​ບຸກ­ຄົນ​ຈຳ­ນວນ​ຫຼວງ­ຫຼາຍ​ກໍ​ຍັງ​ອອກ​ສູ່​ເສັ້ນ­ທາງ​ເພື່ອ​ເດີນ­ທາງ​ໄປ​ເຮັດ​ກິດ​ທຸ­ລະ​ປະ­ຈຳ​ວັນ​ຂອງ​ຕົນ...

    ນອກ­ຈາກ​ເປັນ​ຈຸດ​ດີ​ທີ່​ຊ່ວຍ​ລະ­ບາຍ​ຜູ້­ໂດຍ­ສານ​ທີ່​ຢາກ​ໄປ​ເຖິງ​ຈຸດ­ໝາຍ​ປາຍ­ທາງ​ໃຫ້​ທັນ​ໂມງ​ທັນ​ເວ­ລາ​ແລ້ວ ກໍ​ຍັງ​ມີ​ບາງ​ຈຸດ​ອ່ອນ​ອັນ​ເກີດ​ຈາກ ການ​ຮອງ​ຮັບ​ຍັງ​ບໍ່​ທັນ​ຮອບ​ຄອບ ແລະ ພຽງ­ພໍ ເປັນ­ຕົ້ນ: ບ່ອນ​ຈອດ​ລົດ­ເມ​ຍັງ​ບໍ່​ທັນ​ມີ​ປ້າຍ​ຄົບ ແລະ ລົດ­ເມ​ກໍ​ຍັງ​ຈອດ​ບໍ່​ຖືກ​ປ້າຍ​ຄື​ຈອດ​ຕາມ​ຜູ້­ໂດຍ­ສານ​ກວັກ​ມື​ລັດ ລົດ​ສອງ​ແຖວ​ກໍ​ເໝືອນ​ກັນ​ແລ່ນ​ສັບ​ໜ້າ​ສັບ​ຫຼັງ​ນຳ​ຄົນ​ກວັກ​ມື, ລົດ​ຕຸກໆ​ຈຳ​ໂບ້​ກໍ​ຈອດ​ແຊ່​ຄ້າງ​ໄວ້​ບ່ອນ​ຈອດ​ລົດ­ເມ ເຊິ່ງ​ເບິ່ງ​ແລ້ວ​ລະ­ບຽບ​ການ​ເດີນ​ລົດ​ຍັງ​ຂ້ອນ​ຂ້າງ​ສັບ­ສົນ ອັນ​ເຮັດ​ໃຫ້​ບາງ​ຄັ້ງ​ລົດ­ເມ​ກໍ​ຕ້ອງ​ຈອດ​ຢູ່​ກາງ​ທາງ ເຊິງ​ເບິ່ງ​ພາບ​ແລ້ວ​ບໍ່​ຄັກ​ຄື ບໍ່​ມີ​ລະ­ບຽບ...

    ດັ່ງ­ນັ້ນ ມັນ​ຮຽກ­ຮ້ອງ​ໃຫ້​ຕົວ​ເມືອງ​ໃຫຍ່​ຕ້ອງ​ມີ​ລະ­ບຽບ​ແບບ­ແຜນ ຕ້ອງ​ເອົາ​ວຽກ​ດັ່ງ­ກ່າວ​ເຂົ້າ​ລະ­ບຽບ ເພາະ​ຖ້າ​ຂາດ​ລະ­ບຽບ​ຍາມ​ໃດ ນອກ­ຈາກ​ບໍ່​ຈົບ​ບໍ່​ງາມ​ແລ້ວ ອຸ­ບັດ­ເຫດ​ກໍ​ມັກ​ເກີດ​ຂຶ້ນ​ໂລດ ແລະ ມັກ​ປາ­ກົດ​ເຫັນ​ເລື້ອຍໆ ແລະ ມັນ​ຍັງ​ສະ­ທ້ອນ​ໃຫ້​ເຫັນ​ການ​ບໍ­ລິ­ຫານ​ຈັດ­ການ​ວຽກ​ດັ່ງ­ກ່າວ​ຍັງ​ຂາດ​ຄວາມ​ເປັນ​ລະ­ບົບ ອົງ­ການ​ກ່ຽວ­ຂ້ອງ ຕ້ອງ​ປະ­ສານ​ສົມ­ທົບ​ກັນ ຮ່ວມ​ກັນ​ແກ້​ໄຂ​ໃຫ້​ຕົກ​ໄປ​ເປັນ­ຕົ້ນ:

    - ອົງ­ການ​ໃດ ພາກ­ສ່ວນ​ໃດ​ກ່ຽວ­ຂ້ອງ​ກັບ​ລົດ­ເມ, ລົດ​ສອງ​ແຖວ ລົດ​ບໍ­ລິ­ການ​ອື່ນໆ ຈະ​ຮັບ​ຈອດ​ສົ່ງ​ໂດຍ­ສານ​ຕາມ​ສາຍ​ທາງ​ແນວ­ໃດ? ຮອດ​ໃສ​ຕ້ອງ​ມີ​ຂອບ​ເຂດ.

    - ພາກ­ສ່ວນ​ໃດ ຮັບ­ຜິດ­ຊອບ​ລົດ​ຕຸກໆ ຈຳ​ໂບ້ ຂອບ​ເຂດ ແລະ ລະ­ບຽບ​ການ​ທີ່​ຄວນ​ເອົາ­ໃຈ­ໃສ່​ປ້ອງ​ກັນ​ຄວາມ​ສັບ­ສົນ. ເພື່ອ​ເຮັດ​ໃຫ້​ໃບ​ໜ້າ​ບ້ານ​ເຮົາ​ເມືອງ​ເຮົາ​ຈົບ­ງາມ​ໂດຍ​ສະ­ເພາະ​ການ​ຈະ­ລາ­ຈອນ​ມີ​ຄວາມ​ຄ່ອງ​ຕົວ ແລະ ປອດ​ໄພ​ດີ.

ໂດຍ: ຊຽງ​ເອງ

ຂ່າວທີ່ກ່ຽວຂ້ອງ