ເບິ່ງບ້ານເຂົາເອົາບົດຮຽນ 24-07-2019

151 24 ກ.ລ. 2019 ຫົວຂໍ້ຂ່າວອື່ນໆ

    ພົບ​ກັນ​ປະ­ຈຳ​ວັນ​ນີ້ ຂໍ​ເລີ່ມ​ຈາກ​ຂ່າວ​ມາດ​ຕະ­ການ​ແກ້​ໄຂ​ບັນ­ຫາ​ການ​ຊື້-ຂາຍ­ໜ້າ​ກາກ​ກັນ​ມົນ​ລະ​ພິດ​ຢູ່ ສ ເກົາ­ຫຼີ ຕໍ່​ໃສ່​ແຜນ​ດຶງ​ດູດ​ນັກ​ທ່ອງ​ທ່ຽວ​ຂອງ​ຫວຽດ­ນາມ ແລະ ປິດ​ທ້າຍ​ກັບ​ບັນ­ຫາ​ຂີ້​ເຫຍື້ອ​ນຳ​ເຂົ້າ​ຢູ່​ອິນ​ໂດ​ເນ​ເຊຍ.

    ທີ່ ສ ເກົາ­ຫຼີ: ຫວ່າງ​ບໍ່​ດົນ​ມາ​ນີ້​ມີ​ຂ່າວ​ຈາກ ສ ເກົາ­ຫຼີ ວ່າ: ທາງ​ການ​ຂອງ​ປະ­ເທດ​ນີ້​ໄດ້​ໃຊ້​ມາດ​ຕະ­ການ ສະ­ກັດ​ກັ້ນ​ການ​ໂຄ­ສະ­ນາ​ທາງ​ອອນ​ລາຍ ກ່ຽວ​ກັບ​ໜ້າ​ກາກ​ທີ່​ໃຊ້​ປ້ອງ​ກັນ​ມົນ​ລະ​ພິດ​ທາງ​ອາ­ກາດ ພ້ອມ​ທັງ​ໄດ້​ສັ່ງ​ຫ້າມ​ການ​ຊື້-ຂາຍ­ໜ້າ​ກາກ​ປອມ​ແປງ ແລະ ໜ້າ​ກາກ​ທີ່​ມີ​ການ​ໂຄ­ສະ­ນາ​ແບບ​ແຕກ​ປອກ​ນອກ​ຄວາມ​ເປັນ​ຈິງ.

    ຂ່າວ​ບອກ​ວ່າ: ມີ​ການ​ໂຄ­ສະ­ນາ​ທາງ​ອອນ​ລາຍ​ກວ່າ 1.000 ເລື່ອງ ກ່ຽວ​ກັບ​ໜ້າ​ກາກ​ທີ່​ຖືກ​ທາງ​ການ​ໃຊ້​ມາດ​ຕະ­ການ​ສະ­ກັດ​ກັ້ນ​ໄວ້​ໄດ້ ໃນ​ລະ­ຫວ່າງ​ເດືອນ​ພຶດ­ສະ­ພາ ຫາ​ເດືອນ​ມິ­ຖຸ­ນາ ປີ​ນີ້ ກະ­ຊວງ​ຄວາມ​ປອດ​ໄພ​ດ້ານ​ອາ­ຫານ ແລະ ການ​ຢາ ສ ເກົາ­ຫຼີ ໄດ້​ເຮັດ​ການ​ສຳ​ຫຼວດ​ກວດ­ກາ​ຄຸນ​ນະ​ພາບ​ຂອງ​ໜ້າ​ກາກ​ປ້ອງ​ກັນ​ມົນ​ລະ​ພິດ​ທີ່​ໂຄ­ສະ­ນາ​ຂາຍ​ທາງ​ອອນ​ລາຍ ແລະ ໄດ້​ພົບ​ວ່າ​ມີ­ໜ້າ​ກາກ​ທີ່​ຕິດ​ປ້າຍ​ຂີ້​ຕົວະ​ຍົວະ​ຂາຍ ຈຳ­ນວນ 1.125 ກໍ­ລະ­ນີ ໃນ​ນັ້ນ ພົວ­ພັນ​ກັບ​ການ​ໂຄ­ສະ­ນາ​ຫຼອກ​ລວງ 437 ກໍ­ລະ­ນີ ການ​ປອມ​ແປງ​ຄຸນ​ນະ​ພາບ 8 ກໍ­ລະ­ນີ ແລະ ອີກ 680 ກໍ­ລະ­ນີ ຕິດ​ສະ­ຫຼາກ​ປອມ​ກ່ຽວ​ກັບ​ປະ​ຕັງ(ໃບ​ອະ­ນຸ­ຍາດ) ຢູ່ ສ ເກົາ­ຫຼີ ໃນ​ປັດ­ຈຸ­ບັນ ໜ້າ​ກາກ​ອະ­ນາ­ໄມ​ປ້ອງ​ກັນ​ມົນ​ລະ​ພິດ​ທີ່​ທາງ​ກະ­ຊວງ​ຄວາມ​ປອດ​ໄພ​ດ້ານ​ອາ­ຫານ ແລະ ການ​ຢາ ອະ­ນຸ­ຍາດ​ໃຫ້​ຜະ­ລິດ ແລະ ຈຳ­ໜ່າຍ​ນັ້ນ ມີ​ຈຳ­ນວນ​ທັງ​ໝົດ 1.140 ຊະ­ນິດ.

    ທີ່ ຫວຽດ­ນາມ: ຂ່າວ​ຕ່າງ­ປະ­ເທດ​ໃນ​ເດືອນ​ມິ­ຖຸ­ນາ​ປີ​ນີ້ ໃຫ້​ຮູ້​ວ່າ: ຄະ­ນະ​ກຳ­ມະ­ການ ການ­ທ່ອງ­ທ່ຽວ​ແຫ່ງ​ຊາດ​ຫວຽດ­ນາມ (VNAT) ໄດ້​ເປີດ​ບັ້ນ​ແຜນ​ງານ​ດຶງ​ດູດ​ການ­ທ່ອງ­ທ່ຽວ​ທີ່​ໃສ່​ຊື່­ວ່າ “ເຮວ​ໂລ​ຫວຽດ­ນາມ Hello Vietnam” ແຜນ​ງານ​ດັ່ງ­ກ່າວ​ຈັດ​ຮ່ວມ​ກັບ​ຕິກ​ຕ໋ອກ (TickTok) ລາຍ­ການ​ວິ​ດີ​ໂອ​ກ້ອມ​ລະ­ດັບ​ໂລກ​ຜ່ານ​ຈໍ​ມື​ຖື ເພື່ອ​ແນະ­ນຳ​ແຫຼ່ງ​ທ່ອງ​ທ່ຽວ​ຍອດ​ຢ້ຽມ​ໃນ​ທົ່ວ​ໂລກ.

    ໃນ​ພິ­ທີ​ເປີດ​ບັ້ນ ທາງ​ຫ້ອງ­ການ​ຕິກ​ຕ໋ອກ​ຂອງ​ຫວຽດ­ນາມ​ກໍ​ໄດ້​ເຊັນ​ສັນ­ຍາ​ກັບ​ວາ­ລະ­ສານ “ຫວຽດ­ນາມ​ທູ​ເດ” (ຫວຽດ ນາມ​ໃນ​ປັດ­ຈຸ­ບັນ) ເພື່ອ​ຮ່ວມ​ກັນ​ສ້າງ​ລາຍ­ການ​ພິມ​ວິ​ດີ​ໂອ​ສັ້ນໆ ຈຳ­ນວນ 30.000 ເລື່ອງ ແນ­ໃສ່​ໂຄ­ສະ­ນາ​ກ່ຽວ​ກັບ​ຄົນ​ຫວຽດ­ນາມ ວັດ­ທະ­ນະ­ທຳ ແລະ ພາບ​ວິວ​ທິວ​ທັດ​ອັນ​ສວຍ​ສົດ​ງົດ​ງາມ​ຂອງ​ປະ­ເທດ​ຫວຽດ­ນາມ​ສູ່​ເປົ້າ​ໝາຍ​ຜູ້​ຊົມ ຈຳ­ນວນ 100 ລ້ານ​ຄົນ ແຕ່​ດຽວ­ນີ້​ຫາ​ໝົດ​ປີ 2020.

    ທີ່ ອິນ​ໂດ​ເນ​ເຊຍ: ໜັງ­ສື­ພິມ​ວຽງ​ຈັນ​ທາມ ສະ­ບັບ​ວັນ​ທີ 8 ເດືອນ​ກໍ­ລະ­ກົດ​ນີ້ ໃຫ້​ຮູ້​ວ່າ: ທາງ​ການ​ອິນ​ໂດ​ເນ​ເຊຍ​ໄດ້​ຕີ​ກັບ​ຂີ້​ເຫຍື້ອ ຈຳ­ນວນ 49 ຄອນ​ເທນ​ເນີ (ຕູ້​ບັນ­ຈຸ) ຄືນ​ສູ່​ບັນ­ດາ​ປະ­ເທດ​ຕົ້ນ​ທາງ ເຊິ່ງ​ລວມ​ມີ ສ ອາ​ເມ​ຣິ​ກາ ອົດ​ສະ​ຕຣາ​ລີ ແລະ ອີກ​ຫຼາຍ​ປະ­ເທດ​ໃນ​ເອີ​ຣົບ ພາຍ­ຫຼັງ​ໄດ້​ຄົ້ນ​ພົບ​ວ່າ​ຕູ້​ເຫຼົ່າ​ນີ້​ບັນ­ຈຸ​ຂີ້​ເຫຍື້ອ​ທີ່​ປົນ​ເປື້ອນ​ເປັນ​ອັນ­ຕະ­ລາຍ​ຕໍ່​ສຸ­ຂະ­ພາບ ຫຼື ຂີ້​ເຫຍື້ອ​ທີ່​ບໍ່​ຖືກ­ຕ້ອງ​ກັບ​ຂໍ້​ຕົກ­ລົງ​ລະ­ຫວ່າງ​ປະ­ເທດ​ຕົ້ນ​ທາງ​ກັບ​ປາຍ­ທາງ.

    ຕົວ­ຢ່າງ​ກ່ອນ​ໜ້າ​ນີ້​ທາງ​ການ​ອິນ​ໂດ​ເນ​ເຊຍ ​ກໍ​ໄດ້​ຈັດ​ສົ່ງ​ຕູ້​ຄອນ​ເທນ​ເນີ​ຂີ້​ເຫຍື້ອ ຈຳ­ນວນ 5 ຕູ້ ຄືນ​ໃຫ້ ສ ອາ​ເມ​ຣິ​ກາ ເມື່ອ​ພົບ​ວ່າ​ຂີ້​ເຫຍື້ອ​ພາຍ​ໃນ​ຕູ້​ນັ້ນ​ມີ​ທັງ​ຜ້າ­ອ້ອມ​ເດັກ ເສດ​ປະ­ລາ­ສະ­ຕິກ ເສດ​ໄມ້ ເກີບ​ເກົ່າ ແລະ ອື່ນໆ ເປັນ​ຈຳ­ນວນ​ຫຼວງ­ຫຼາຍ ຕາມ​ການ​ຕົກ­ລົງ​ນັ້ນ ຂີ້​ເຫຍື້ອ​ໃນ​ຕູ້​ຄວນ​ແມ່ນ​ເສດ​ເຈ້ຍ​ເກົ່າ​ທີ່­ຢູ່​ໃນ​ສະ­ພາບ​ສະ­ອາດ ແລະ ສາ­ມາດ​ແປ​ຮູບ​ເພື່ອ​ນຳ​ມາ​ໃຊ້​ຄືນ­ໃໝ່​ໄດ້ ຂ່າວ​ບອກ​ວ່າ ທາງ​ການ​ອິນ​ໂດ​ເນ​ເຊຍ​ໄດ້​ກວດ­ກາ​ຕູ້​ບັນ­ຈຸ​ຂີ້​ເຫຍື້ອ​ຈາກ​ຕ່າງ­ປະ­ເທດ​ທັງ​ໝົດ​ຕື່ມ 65 ຕູ້ ແລະ ພົບ​ວ່າ ໃນ​ນັ້ນ 49 ຕູ້ ບັນ­ຈຸ​ຂີ້​ເຫຍື້ອ​ທີ່​ລະ­ເມີດ​ລະ­ບຽບ​ການ​ຂົນ­ສົ່ງ ເຊັ່ນ: ຄື 38 ຕູ້ ບັນ­ຈຸ​ຂີ້​ເຫຍື້ອ​ທີ່​ມີ​ສານ​ເຄ​ມີ​ອັນ­ຕະ­ລາຍ 11 ຕູ້ ບັນ­ຈຸ​ຂີ້​ເຫຍື້ອ​ທີ່​ບໍ່​ເປັນ​ໄປ​ຕາມ​ການ​ຕົກ­ລົງ ສ່ວນ​ອີກ 16 ຕູ້​ນັ້ນ​ສາ­ມາດ​ຜ່ານ​ການ​ກວດ­ກາ​ໄດ້.

ຂ່າວທີ່ກ່ຽວຂ້ອງ