ຍີ່ປຸ່ນ ກໍາລັງຫັນການທ່ອງທ່ຽວເຂົ້າສູ່ຍຸກສະໄໝໃໝ່

86 24 ກ.ລ. 2019 ຫົວຂໍ້ຂ່າວອື່ນໆ

    “ຍີ່­ປຸ່ນ” ປະ­ກາດ​ເມື່ອ​ວັນ​ທີ 1 ເມ­ສາ​ທີ່​ຜ່ານ​ມາ​ວ່າ ປະ­ເທດ​ກຳ­ລັງ​ເຂົ້າ​ສູ່​ຍຸກ​ສະ­ໄໝ​ໃໝ່ ໂດຍ​ມີ​ຊື່​ເອີ້ນ​ວ່າ “ເຣ​ວະ” (Reiwa) ຕັ້ງ­ແຕ່​ວັນ​ທີ 1 ພຶດ­ສະ­ພາ 2019 ເປັນ­ຕົ້ນ​ມາ.

    ການ​ສຳ​ຫຼວດ​ໂດຍ “ສຳ­ນັກ​ຂ່າວ​ກຽວ​ໂດ” ທີ່​ເປິດ​ເຜີຍ​ເມື່ອ​ວັນ​ທີ 2 ເມ­ສາ​ທີ່​ຜ່ານ​ມາ ລະ­ບຸ​ວ່າ​ຜົນ​ລົງ​ຄະ­ແນນ​ຜູ້​ມີ​ສິດ​ເລືອກ​ຕັ້ງ​ຊາວ​ຍີ່­ປຸ່ນ​ເກືອບ 74% ຂອງ​ຜູ້​ມີ​ສິດ​ເລືອກ​ຕັ້ງ​ທັງ​ໝົດ ເຫັນ​ດ້ວຍ​ກັບ​ຄະ­ນະ​ລັດ­ຖະ­ມົນ­ຕີ​ຂອງ​ຍີ່­ປຸ່ນ​ທີ່​ໃຊ້​ຊື່ “ເຣ​ວະ” ໃນ​ຍຸກ​ສະ­ໄໝ​ໃໝ່.

    ຢ່າງ­ໃດ​ກໍ​ຕາມ ນັກ​ຂຽນ​ປະ­ຈຳ​ຄໍ​ລຳ​ຜູ້​ອາ­ວຸ­ໂສ​ຂອງ “ກຽວ​ໂດ” ຕັ້ງ​ຂໍ້​ສັງ­ເກດ​ວ່າ ເຖິງ​ແມ່ນ​ວ່າ​ຊາວ​ຍີ່­ປຸ່ນ​ສ່ວນ​ໃຫຍ່​ມີ​ຄວາມ​ຍິນ​ດີ ແລະ ຍອມ­ຮັບ​ຊື່​ຍຸກ​ສະ­ໄໝ “ເຣ​ວະ” ເພາະ​ມີ​ຄວາມ​ໝາຍ​ທີ່​ສວຍ​ງາມ ບົ່ງ​ຊີ້​ທິດ​ທາງ​ປະ­ເທດ​ໄປ​ສູ່ “ສັນ­ຕິ​ສຸກ ແລະ​ຄວາມ​ໂຊກ​ດີ” ແຕ່​ນະ­ໂຍ­ບາຍ​ບາງ​ຢ່າງ​ຂອງ​ລັດ­ຖະ­ບານ​ໃນ​ປັດ­ຈຸ­ບັນ ໂດຍ​ສະ­ເພາະ​ກັບ “ພາກ​ການ­ທ່ອງ­ທ່ຽວ” ເບິ່ງ​ເໝືອນ​ຈະ​ສວນ​ທາງ​ກັບ​ແນວ­ທາງ​ໃນ​ຍຸກ​ສະ­ໄໝ​ໃໝ່​ຂອງ​ດິນ­ແດນ​ຍີ່­ປຸ່ນ ໂດຍ​ມີ​ເປົ້າ​ໝາຍ​ດຶງ​ດູດ​ນັກ​ທ່ອງ​ທ່ຽວ​ຊາວ​ຕ່າງ­ປະ­ເທດ ເພື່ອ​ຊົດ​ເຊີຍ​ຈຳ­ນວນ​ປະ­ຊາ­ກອນ​ຊາວ​ຍີ່­ປຸ່ນ​ທີ່​ກຳ­ລັງ​ຫຼຸດ​ລົງ ແລະ ຄາດ​ຫວັງ​ວ່າ​ການ­ທ່ອງ­ທ່ຽວ​ຈະ​ຊ່ວຍ​ກະ​ຕຸ້ນ​ເສດ­ຖະ­ກິດ​ທີ່​ງຽບ​ເຫງົາ​ໄດ້ ໂດຍ​ໄດ້​ຕັ້ງ​ເປົ້າ​ເພີ່ມ​ຈຳ­ນວນ​ນັກ​ທ່ອງ​ທ່ຽວ​ສູງ​ເຖິງ 40 ລ້ານ​ຄົນ ພາຍ​ໃນ​ປີ 2020 ຈາກ​ປີ 2018 ມີ​ຈຳ­ນວນ​ນັກ​ທ່ອງ​ທ່ຽວ​ຕ່າງ­ປະ­ເທດ​ໃນ​ຍີ່­ປຸ່ນ​ກວ່າ 28 ລ້ານ​ຄົນ.

    “ເປົ້າ​ໝາຍ​ນັກ​ທ່ອງ​ທ່ຽວ 40 ລ້ານ​ຄົນ ໃນ​ອີກ 2 ປີ​ຂ້າງ​ໜ້າ ອາດ​ບໍ່​ໄກ​ເກີນ​ເອື້ອມ ແຕ່​ແຜນ­ການ​ນີ້​ກຳ­ລັງ​ທຳ­ຮ້າຍ​ວິ­ຖີ​ຊີ­ວິດ​ຂອງ​ຄົນ​ຍີ່­ປຸ່ນ” ຄໍ​ລຳ​ນິ​ສ​ອາ­ວຸ­ໂສ​ລະ­ບຸ.

    ດ້ານ​ທ່ານ ທາ​ຄາ​ໂອະ ອິ​ຄາ​ໂດະ ຜູ້​ຊ່ຽວ­ຊານ​ດ້ານ​ການ­ທ່ອງ­ທ່ຽວ​ກ່າວ​ເສີມ​ວ່າ ຫຼາຍ​ເມືອງ​ທ່ອງ​ທ່ຽວ​ຍອດ​ນິ­ຍົມ​ໃນ​ຍີ່­ປຸ່ນ ໄດ້­ແກ່ ໂຕ​ກຽວ ກຽວ​ໂຕ ໂອ­ຊາ​ກາ ຟູ​ຈິ ແລະ ຮອກ​ໄກ​ໂດ ກຳ­ລັງ​ປະ­ສົບ​ບັນ­ຫາ​ຈາກ​ຈຳ­ນວນ​ນັກ​ທ່ອງ​ທ່ຽວ​ທີ່​ຫຼາຍ​ເກີນ​ໄປ ໂດຍ​ເອີ້ນ​ບັນ­ຫາ​ນີ້​ວ່າ “kanko kogai” ຫຼື “ມົນ​ລະ​ພິດ​ການ­ທ່ອງ­ທ່ຽວ” ນັ້ນ​ຄື​ການ​ສົ່ງ­ເສີມ​ການ­ທ່ອງ­ທ່ຽວ​ທີ່​ບໍ່​ສຳ­ພັນ​ກັບ​ພື້ນ​ທີ່ ສິ່ງ​ອຳ­ນວຍ​ຄວາມ​ສະ­ດວກ ແລະ ໂຄງ​ສ້າງ​ພື້ນ­ຖານ.

    ບົດ​ຄວາມ​ຂອງ “ອາ­ຊາ​ອີ ຊິມ​ບຸນ” ເຄີຍ​ຢິບ​ຍົກ​ປະ­ເດັນ​ນີ້​ຂຶ້ນ​ຕັ້ງ​ຂໍ້​ສັງ­ເກດ ໂດຍ​ອ້າງ​ຄຳ​ເວົ້າ​ຂອງ​ທ່ານ ມັສ​ຊາ​ຣຸ ທາ​ຄາ​ຢາ​ມາ” ຜູ້​ບໍ­ລິ­ຫານ​ລະ­ດັບ​ສູງ​ບໍ­ລິ­ສັດ​ທ່ອງ​ທ່ຽວ​ແຫ່ງ​ໜຶ່ງ​ໃນ​ເມືອງ​ກຽວ​ໂຕ ທີ່​ລະ­ບຸ​ວ່າ ໃນ​ຖາ­ນະ​ທີ່­ຢູ່​ໃນ​ວົງ​ການ­ທ່ອງ­ທ່ຽວ ແລະ​ເປັນ​ຄົນ​ກຽວ​ໂຕ​ສາ­ມາດ​ເວົ້າ​ໄດ້​ວ່າ ຄົນ​ທ້ອງ­ຖິ່ນ​ທີ່​ນີ້ ແລະ ໃນ​ອີກ​ຫຼາຍ​ເມືອງ ສ່ວນ​ໃຫຍ່​ບໍ່​ມີ​ຄວາມ­ສຸກ​ກັບ​ຈຳ­ນວນ​ນັກ​ທ່ອງ​ທ່ຽວ​ທີ່​ຫຼາຍ​ເກີນ​ໄປ.

    ຕົວ­ຢ່າງ ເຊັ່ນ: ລົດ­ເມ​ໂດຍ­ສານ​ທີ່​ແອ​ອັດ​ໄປ​ດ້ວຍ​ຄົນ​ທ້ອງ­ຖິ່ນ ແລະ ນັກ​ທ່ອງ​ທ່ຽວ​ຕ່າງ­ປະ­ເທດ ຮ້ານ​ອາ­ຫານ​ບາງ​ແຫ່ງ​ທີ່​ເຕັມ​ໄປ​ດ້ວຍ​ນັກ​ທ່ອງ​ທ່ຽວ​ຕ່າງ­ປະ­ເທດ ນອກ­ຈາກ​ນີ້ ຮ້ານ​ອາ­ຫານ​ບາງ​ແຫ່ງ​ຍັງ​ມີ​ເງື່ອນ­ໄຂ​ເປິດ​ໃຫ້​ຈອງ​ໂຕ໊ະ​ທາງ​ອອນ​ລາຍ​ເທົ່າ​ນັ້ນ.

    ລາຍ​ງານ​ຂອງ “ເຈ​ແປນ​ທາມສ໌” ລະ­ບຸ​ວ່າ ມົນ​ລະ​ພິດ​ການ­ທ່ອງ­ທ່ຽວ​ໃນ​ຍີ່­ປຸ່ນ ມາ​ຈາກ​ລັດ­ຖະ­ບານ​ສົ່ງ­ເສີມ​ການ­ທ່ອງ­ທ່ຽວ​ໃນ​ເມືອງ​ອື່ນ​ຊ້າ​ເກີນ​ໄປ ເຖິງ​ແມ່ນ​ອອກ​ມາດ​ຕະ­ການ​ເກັບ​ພາ­ສີ​ນັກ​ທ່ອງ​ທ່ຽວ​ຂາ​ອອກ​ນອກ​ປະ­ເທດ​ຄົນ​ລະ 1.000 ເຢນ ເມື່ອ​ປີ​ທີ່​ຜ່ານ​ມາ ເພື່ອ​ນຳ­ໄປ​ປັບ­ປຸງ​ໂຄງ​ສ້າງ​ພື້ນ­ຖານ ແຕ່​ນັກ​ວິ­ເຄາະ​ເຫັນ​ວ່າ​ອັດ­ຕາ​ພາ­ສີ​ດັ່ງ­ກ່າວ​ໜ້ອຍ​ໄປ ເມື່ອ​ທຽບ​ກັບ​ໂຄງ​ສ້າງ​ພື້ນ­ຖານ​ທີ່​ຍີ່­ປຸ່ນ​ຕ້ອງ​ປັບ­ປຸງ ເຊັ່ນ ລະ­ບົບ​ການ​ຂົນ­ສົ່ງ​ສາ­ທາ­ລະ­ນະ ທີ່​ພັກ​ອາ­ໄສ​ທີ່​ສາ­ມາດ​ຮອງ​ຮັບ​ນັກ​ທ່ອງ​ທ່ຽວ​ຕ່າງ­ປະ­ເທດ​ໄດ້.

    ພາກ​ທຸ­ລະ​ກິດ​ທ່ອງ​ທ່ຽວ​ຂອງ​ຍີ່­ປຸ່ນ​ສ່ວນ​ໃຫຍ່​ຍັງ​ມີ​ຂະ­ໜາດ​ນ້ອຍ ແລະ ບໍ່​ມີ​ເງິນ​ທຶນ​ໃນ​ການ​ປັບ­ປຸງ​ເລັ່ງ​ດ່ວນ ອີກ​ທັງ​ຍີ່­ປຸ່ນ​ຍັງ​ປັບ​ຕົວ​ຂ້ອນ​ຂ້າງ​ຊ້າ​ ກ່ຽວ​ກັບ​ການ​ໃຊ້​ລະ­ບົບ​ທຸ­ລະ​ກຳ​ການ​ເງິນ​ແບບ​ເອ​ເລັກ​ໂຕຣ​ນິກ.

    ທ່ານ ທາ​ຄາ​ໂອະ ກ່າວ​ປິດ​ທ້າຍ​ວ່າ ສິ່ງ​ທີ່​ໜ້າ​ຢ້ານ​ຍິ່ງ​ກວ່າ​ມົນ​ລະ​ພິດ​ການ­ທ່ອງ­ທ່ຽວ ຄື​ບໍ່​ມີ​ນັກ​ທ່ອງ​ທ່ຽວ​ເລີຍ ແຕ່​ທີ່​ສຳ­ຄັນ​ຍິ່ງ​ກວ່າ​ນັ້ນ​ກໍ​ຄື ການ​ບັນ­ລຸ​ເປົ້າ​ໝາຍ​ທ່ອງ​ທ່ຽວ​ແບບ​ໝັ້ນ­ຄົງ ນັ້ນ​ໝາຍ​ເຖິງ “ການ​ຢ້ຽມ­ຢາມ​ຊ້ຳ”.

    ດັ່ງ­ນັ້ນ ນອກ­ຈາກ​ລັດ­ຖະ­ບານ​ຕ້ອງ​ເພີມ​ຄວາມ​ສະ­ດວກ​ສະ­ບາຍ​ຮອງ​ຮັບ​ກຸ່ມ​ນັກ​ທ່ອງ​ທ່ຽວ ແລະ ສົ່ງ­ເສີມ​ການ​ທ່ອງ ທ່ຽວ​ໃນ​ເມືອງ​ອື່ນໆ​ແລ້ວ ຍັງ​ຕ້ອງ​ປັບ​ທັດ­ສະ­ນະ​ຄະ­ຕິ​ຂອງ​ຄົນ​ໃນ​ຊາດ​ໃຫ້​ເປີດ​ຮັບ​ສິ່ງ​ໃໝ່ໆ​ຫຼາຍ​ຂຶ້ນ​ດ້ວຍ ເພາະ​ຍັງ​ມີ​ຄົນ​ຍີ່­ປຸ່ນ​ບາງ​ກຸ່ມ​ທີ່​ມີ​ຄວາມ​ເປັນ​ຊາດ​ນິ­ຍົມ​ສູງ.

ວ. ດາ­ລາ​ວົງ - ນຳ​ສະ­ເໜີ

ຂ່າວທີ່ກ່ຽວຂ້ອງ