ຂ່າວຫຼ້າສຸດ

ຮ່ວມພັດທະນາ ແລະ ຈັດແຂ່ງຂັນກີລາມວຍລາວ

399 24 ກ.ລ. 2019 ວົງຈອນກີລາ
ຮ່ວມພັດທະນາ ແລະ ຈັດແຂ່ງຂັນກີລາມວຍລາວ

    ພິ­ທີ​ລົງ​ນາມ​ສັນ­ຍາ ແລະ ຖະ­ແຫຼງ​ຂ່າວ​ຮ່ວມ​ກັນ​ພັດ­ທະ­ນາ ແລະ ຈັດ​ແຂ່ງ­ຂັນ​ມວຍ​ລາວ ຢູ່​ສະ­ໜາມ​ກີ­ລາ​ມວຍ​ບຶງ​ຂະ​ຫຍອງ ຈັດ​ຂຶ້ນ​ວັນ​ທີ 21 ກໍ­ລະ­ກົດ 2019 ຢູ່​ສະ­ໜາມ​ກີ­ລາ​ດັ່ງ­ກ່າວ ລະ­ຫວ່າງ ທ່ານ ຄຳ​ເສັງ ສູນ​ດາ­ລາ ປະ­ທານ​ສະ­ຫະ­ພັນ​ມວຍ​ລາວ-ມວຍ​ສາ­ກົນ ມວຍ​ວູ​ຊູ ແລະ ປັນ​ຈັກ​ສີ​ລັດ ນະ­ຄອນ­ຫຼວງ​ວຽງ​ຈັນ ແລະ ທ່ານ ກໍ່​ກຽດ ພາ​ນິ​ຍະ​ລົມ ປະ­ທານ​ບໍ­ລິ­ສັດ ກໍ່​ກຽດ​ບ໋ອກ​ຊິງ​ກຣຸບ ຈຳ­ກັດ ໂດຍ​ມີ​ທ່ານ ກອງ​ແກ້ວ ແຫ່ງ​ດາ​ວົງ​ໄຊ ຫົວ­ໜ້າ​ຂະ­ແໜງ​ກີ­ລາ​ລະ­ດັບ​ສູງ ພະ​ແນກ​ສຶກ​ສາ​ທິ​ການ ແລະ ກີ­ລາ​ນະ­ຄອນ­ຫຼວງ​ວຽງ​ຈັນ ພ້ອມ​ດ້ວຍ​ພາກ­ສ່ວນ​ກ່ຽວ­ຂ້ອງ ເຂົ້າ​ຮ່ວມ.

    ສັນ­ຍາ​ຮ່ວມ​ກັນ​ພັດ­ທະ­ນາ ແລະ ຈັດ­ການ​ແຂ່ງ­ຂັນ​ມວຍ​ລາວ ຢູ່​ສະ­ໜາມ​ກີ­ລາ​ມວຍ​ບຶງ​ຂະ​ຫຍອງ ຈັດ​ແຂ່ງ­ຂັນ 4 ຄັ້ງ​ຕໍ່​ເດືອນ ໃນ​ໄລ­ຍະ​ເວ­ລາ 5 ປີ ເລີ່ມ​ແຕ່​ວັນ​ທີ 1 ສິງ­ຫາ 2019-1 ສິງ­ຫາ 2024 (ໃນ​ແຕ່​ລະ​ປີ​ຕ້ອງ​ມີ​ການ​ປະ​ເມີນ​ຄືນ) ໃຫ້​ບຸ­ລິ­ມະ­ສິດ​ທ່ານ ກໍ່​ກຽດ ພາ​ນິ​ຍະ​ລົມ ຕໍ່​ສັນ­ຍາ​ໄດ້​ທຸກໆ 5 ປີ.

    ນອກ​ນີ້​ສອງ​ຝ່າຍ​ຍັງ​ໄດ້​ຕົກ­ລົງ​ຈັດ​ແຂ່ງ­ຂັນ ມວຍ​ຕາມ​ງານ​ບຸນ​ປະ­ເພ­ນີ​ປະ­ຈຳ​ປີ​ຂອງ ສປປ ລາວ ເຊັ່ນ: ງານ​ແຂ່ງ­ຂັນ​ຊ່ວງ​ເຮືອ​ຢູ່​ຫຼວງ​ພະ​ບາງ ງານ​ແຂ່ງ­ຂັນ​ຊ່ວງ​ເຮືອ​ຢູ່​ນະ­ຄອນ­ຫຼວງ​ວຽງ​ຈັນ ງານ​ບຸນ­ຊ່ວງ­ເຮືອ​ຊະ­ນະ​ຄາມ-ຊຽງ​ຄານ ໄທ (ເດືອນ​ຕຸ­ລາ) ງານ​ບຸນ​ພຣະ​ທາດ­ຫຼວງ (ເດືອນ​ພະ­ຈິກ) ແລະ ງານ​ບຸນ​ພະ­ທາດ​ອີງ​ຮັງ​ຢູ່​ສະ­ຫວັນ​ນະ​ເຂດ (ເດືອນ​ທັນ­ວາ) ຕື່ມ​ອີກ.

ຂ່າວທີ່ກ່ຽວຂ້ອງ