Boeing ຈັດ​ສັນ​ເງິນ 50 ລ້ານ​ໂດ​ລາ​ໃຫ້​ແກ່​ຜູ້​ປະສົບ​ເຄາະ​ຮ້າຍ​ຈາກ​ອຸບັດເຫດທີ່​ພົວພັນ​ເຖິງ 737 MAX

95 23 ກ.ລ. 2019 ຂ່າວຕ່າງປະເທດ
Boeing ຈັດ​ສັນ​ເງິນ 50 ລ້ານ​ໂດ​ລາ​ໃຫ້​ແກ່​ຜູ້​ປະສົບ​ເຄາະ​ຮ້າຍ​ຈາກ​ອຸບັດເຫດທີ່​ພົວພັນ​ເຖິງ 737 MAX

   ກຸ່ມ​ບໍລິສັດ​ຜະລິດ​ເຮືອບິນ Boeing ຂອງ ສ ອາ​ເມ​ຣິ​ກາ ແຈ້ງ​ໃຫ້​ຮູ້ເມື່ອ​ວັນ​ທີ 17 ກໍລະກົດ​ທີ່​ຜ່ານ​ມາ ວ່າ​ຈະ​ຫັກ​ເອົາ​ເຄິ່ງ​ໜຶ່ງ ຂອງ​ຈຳນວນ​ເງິນ​ໃນ​ບ້ວງ​ກອງ​ທຶນ 100 ລ້ານ​ໂດ​ລາ​ສະຫະລັດ ທີ່​ກໍ່​ຕັ້ງ​ຂຶ້ນ​ມາ ຫຼັງ​ເກີດ​ອຸບັດເຫດ​ການບິນ​ສອງ​ລາຍ ທີ່​ພົວພັນ​ເຖິງ​ເຮືອບິນ​ໂບ​ອິງ ລຸ້ນ 737 MAX ເພື່ອ​ນຳໄປ​ຊ່ວຍເຫຼືອ​ຄອບຄົວ​ຂອງ​ບັນດາ​ຜູ້​ທີ່​ເສຍ​ຊີວິດ ຢູ່​ໃນ​ບັນດາ​ອຸບັດເຫດ​ດັ່ງກ່າວ.

    Boeing ໄດ້​ວ່າ​ຈ້າງ​ທ່ານ ເຄນ ເຟ​ອິນ​ເບີດ ຊ່ຽວຊານ​ໃນ​ບັນຫາ​ຈ່າຍ​ຄ່າ​ຊົດ​ເຊີຍ ເຮັດ​ໜ້າທີ່​ໃນ​ການ​ຕິດຕາມ​ກວດກາ ການ​ຈັດ​ສັນ​ກອງ​ທຶນ​ດັ່ງກ່າວ ໂດຍ​ທ່ານ ເຄນ ເຟ​ອິນ​ເບີດ ໄດ້​ກ່າວ​ຕໍ່​ຜູ້​ສື່​ຂ່າວ​ວ່າ ໜ່ວຍ​ປະຕິບັດ​ງານ​ຂອງ​ເຂົາ ຈະ​ຮ່າງ​ແບບ​ເອກະສານ​ການ​ຈ່າຍ​ຄ່າ​ຊົດ​ເຊີຍ​ຄວ​ຍາມ​ເສຍ​ຫາຍ​ອອກ​ມາ​ທັນທີ ເພື່ອ​ສົ່ງ​ໄປ​ໃຫ້​ຄອບຄົວ​ຂອງ​ບັນດາ​ຜູ້​ໄດ້​ຮັບ​ເຄາະ​ຮ້າຍ ໃນ​ຂະນະ​ທີ່​ຊຸກຍູ້​ການ​ພົບ​ປະ​ເປັນ​ເທື່ອ​ທຳ​ອິດ​ກັບ​ຕົວ​ແທນ​ຂອງ Boeing ຢູ່​ທີ່​ນະຄອນຫຼວງ ວໍ​ຊິງ​ຕັນ.

    ທ່ານ ເຄນ ເຟ​ອິນ​ເບີດ ໃຫ້​ຮູ້​ຕື່ມ​ວ່າ ທີ່​ຍັງ​ເຫຼືອ​ອີກ 50 ລ້ານ​ໂດ​ລາ​ສະຫະລັດ ຢູ່​ໃນ​ກອງ​ທຶນ​ດັ່ງກ່າວ ແມ່ນ​ໄດ້​ຈັດ​ສັນ​ເປັນ​ການ​ສະເພາະ ໃຫ້​ແກ່​ບັນດາ​ໂຄງການ​ຂອງ​ລັດຖະບານ ແລະ ຊຸມ​ຊົນ.

ຂ່າວທີ່ກ່ຽວຂ້ອງ