ເສີມສ້າງຄວາມເຂັ້ມແຂງ ໃຫ້ແກ່ນັກທຸລະກິດໜຸ່ມອາຊຽນ

846 23 ກ.ລ. 2019 ຂ່າວໜ້າ​ໜຶ່ງ
ເສີມສ້າງຄວາມເຂັ້ມແຂງ ໃຫ້ແກ່ນັກທຸລະກິດໜຸ່ມອາຊຽນ

    ກອງ​ປະ­ຊຸມ​ສັບ­ປະ­ດາ​ຊາວ​ໜຸ່ມ​ອາ​ຊຽນ ຄັ້ງ​ທີ 23 ຈັດ​ຂຶ້ນ​ວັນ​ທີ 18 ກໍ­ລະ­ກົດ 2019 ທີ່​ໂຮງ­ແຮມ​ລາວ​ພລາ​ຊາ ນະ­ຄອນ­ຫຼວງ​ວຽງ​ຈັນ ເປັນ​ປະ­ທານ​ຂອງ​ທ່ານ ອາ​ລຸນ​ໄຊ ສູນ​ນະ­ລາດ ເລ­ຂາ​ຄະ­ນະ​ບໍ­ລິ­ຫານ​ງານ​ສູນ​ກາງ​ຊາວ​ໜຸ່ມ ປະ­ຊາ­ຊົນ ປະ­ຕິ­ວັດ​ລາວ ມີ​ບັນ­ດາ​ນັກ­ທຸ­ລະ­ກິດ​ຊາວ​ໜຸ່ມ 10 ປະ­ເທດ​ອາ​ຊຽນ ເຂົ້າ​ຮ່ວມ.

    ກອງ​ປະ­ຊຸມ​ຄັ້ງ​ນີ້ ແມ່ນ​ມີ​ຄວາມ​ສຳ­ຄັນ​ຕໍ່​ກັບ​ບົດ­ບາດ​ຂອງ​ນັກ­ທຸ­ລະ­ກິດ​ໜຸ່ມ ເພື່ອ​ສ້າງ​ປະ­ຊາ​ຄົມ​ອາ​ຊຽນ​ຕາມ​ວິ­ໄສ​ທັດ ເພື່ອ​ເສີມ​ສ້າງ​ຄວາມ​ເຂັ້ມ­ແຂງ​ທາງ​ດ້ານ​ຄວາມ​ສາ­ມັກ­ຄີ ຄວາມ​ຍືນ​ຍົງ ແລະ ຄວາມ​ອຸ­ດົມ­ສົມ­ບູນ​ໃນ​ໝູ່​ຊາວ​ໜຸ່ມ​ອາ​ຊຽນ ພ້ອມ​ນັ້ນ ເພື່ອ​ສົ່ງ­ເສີມ​ຄວາມ​ເຂົ້າ­ໃຈ ການ​ແລກ­ປ່ຽນ​ປະ­ສົບ​ການ ທັດ­ສະ­ນະ ແລະ ຄວາມ​ຄິດ​ເຫັນ​ໃນ​ໝູ່​ຊາວ​ໜຸ່ມ​ອາ​ຊຽນ ແລະ ເພື່ອ​ຄວາມ​ສຳ­ເລັດ ສືບ­ຕໍ່​ສ້າງ​ເປົ້າ​ໝາຍ​ສູ່​ສັນ­ຕິ­ພາບ ແລະ ຄວາມ​ເຫັນ​ດີ​ໃນ​ຊາວ​ໜຸ່ມ​ອາ​ຊຽນ.

    ກອງ​ປະ­ຊຸມ​ບັນ­ດາ​ຊາວ​ໜຸ່ມ​ແຕ່​ລະ​ປະ­ເທດ​ອາ​ຊຽນ​ໄດ້​ຂຶ້ນ​ນຳ​ສະ­ເໜີ​ຜົນ­ງານ​ຂອງ​ຕົນ​ທີ່​ໄດ້​ຜ່ານ​ການ​ຄັດ​ເລືອກ​ຜົນ­ງານ​ດີ­ເດັ່ນ ເພື່ອ​ຮັບ​ລາ­ງວັນ​ຊາວ​ໜຸ່ມ​ດີ­ເດັ່ນ ປະ­ຈຳ​ປີ 2019 ໂດຍ​ເລີ່ມ​ຈາກ​ປະ­ເທດ ບຣູ​ໄນ ດາ​ລູ​ສະ​ລາມ ນຳ​ສະ ເໜີ​ຫົວ­ຂໍ້​ກ່ຽວ​ກັບ​ການ​ແບ່ງ­ປັນ ແລກ­ປ່ຽນ​ຄວາມ​ຄິດ​ເຫັນ​ຂອງ​ຄົນ​ຮຸ່ນ​ໜຸ່ມ ຕົວ​ແທນ​ຊາວ​ໜຸ່ມ ກຳ­ປູ­ເຈຍ ສະ­ເໜີ​ຜົນ­ງານ​ການ​ເປັນ​ອາ­ສາ​ສະ­ໝັກ​ຊ່ວຍ­ເຫຼືອ​ສັງ­ຄົມ ຕົວ​ແທນ​ຊາວ​ໜຸ່ມ ອິນ​ໂດ​ເນ​ເຊຍ ນຳ​ສະ­ເໜີ​ການ​ເຮັດ​ກະ­ສິ­ກຳ​ເພື່ອ​ອາ­ຫານ​ສະ­ອາດ ຕົວ​ແທນ​ຊາວ​ໜຸ່ມ ສສ ຫວຽດ­ນາມ ສະ­ເໜີ​ກ່ຽວ​ກັບ​ການ​ສ້າງ​ອະ­ນາ­ຄົດ​ຂອງ​ຊາດ ຕ້ອງ​ສ້າງ​ຄົນ​ຮຸ່ນ​ໜຸ່ມ ແລະ ປະ­ເທດ​ອື່ນໆ ສຳ­ລັບ​ນັກ­ທຸ­ລະ­ກິດ​ໜຸ່ມ​ແຫ່ງ​ຊາດ​ລາວ​ໄດ້​ຮັບ​ລາ­ງວັນ​ແມ່ນ​ກຸ່ມ​ບໍ­ລິ­ສັດ ລ່ອງ​ແຈ້ງ​ພັດ­ທະ­ນາ ຈຳ­ກັດ ຂອງ​ທ່ານ ຖາ­ວອນ ອາດ​ສະ­ໝຸດ ທີ່​ໄດ້​ນຳ​ສະ­ເໜີ ກ່ຽວ​ກັບ​ໂຄງ­ການ​ພັດ­ທະ­ນາ​ການ­ທ່ອງ­ທ່ຽວ​ທີ່​ຕິດ​ພັນ​ກັບ​ການ​ຊຸກ­ຍູ້​ສ້າງ​ວຽກ​ເຮັດ​ງານ​ທຳ​ໃຫ້​ກັບ​ຊາວ​ໜຸ່ມ ແລະ ການ​ພັດ­ທະ­ນາ​ການ​ສຶກ​ສາ ການ​ປະ­ກອບ­ສ່ວນ​ສ້າງ​ໂຮງ­ຮຽນ.

    ໃນ​ກອງ​ປະ­ຊຸມ​ດັ່ງ­ກ່າວ ທ່ານ ອາ​ລຸນ​ໄຊ ສູນ​ນະ­ລາດ ໄດ້​ໃຫ້​ກຽດ​ມອບ​ລາ­ງວັນ​ແກ່​ນັກ­ທຸ­ລະ­ກິດ​ໜຸ່ມ​ດີ­ເດັ່ນ​ແຫ່ງ​ຊາດ​ລາວ ປະ­ກອບ​ມີ ບໍ­ລິ­ສັດ​ທີ່​ປຶກ­ສາ​ຟ້າ​ວັດ­ທະ­ນາ ໂຮງ­ຮຽນ​ນາໆຊາດ ອົດ​ສະ​ຕຣາ​ລີ ຮ້ານ​ຂາຍ​ຄຳ​ພູ​ວົງ ແລະ ບໍ­ລິ­ສັດ​ອື່ນໆ ລວມ​ທັງ​ໝົດ 38 ຫົວ­ໜ່ວຍ​ທຸ­ລະ​ກິດ ເຊິ່ງ​ການ​ມອບ​ລາ­ງວັນ​ດັ່ງ­ກ່າວ ​ໄດ້​ສະ­ແດງ​ໃຫ້​ເຫັນ​ເຖິງ​ການ​ເຄື່ອນໄຫວ​ທີ່​ດີ­ເດັ່ນ​ຂອງ​ບັນ­ດາ​ນັກ­ທຸ­ລະ­ກິດ​ໜຸ່ມ ທີ່​ມີ​ຄວາມ​ຫ້າວ­ຫັນ​ໃນ​ການ­ຈັດ­ຕັ້ງ​ຜັນ​ຂະ­ຫຍາຍ​ແຜນ​ຍຸດ​ທະ​ສາດ​ຂອງ​ບໍ­ລິ­ສັດ ເຫັນ​ໄດ້​ກົນ​ໄກ​ການ​ຄຸ້ມ​ຄອງ ເຮັດ​ໃຫ້​ຫົວ­ໜ່ວຍ​ບໍ­ລິ­ສັດ ຫ້າງ​ຮ້ານ​ປະ­ສົບ​ຜົນ­ສຳ­ເລັດ​ສູງ ກາຍ­ເປັນ​ຕົວ​ແທນ​ດີ­ເດັ່ນ​ໃນ​ຂົງ­ເຂດ​ເສດ­ຖະ­ກິດ ແລະ ກາຍ­ເປັນ​ປັດ​ໄຈ​ໜຶ່ງ​ຊຸກ­ຍູ້​ສ້າງ​ທ່າ­ແຮງ​ໃຫ້​ແກ່​ສັງ­ຄົມ​ກ້າວ​ໄປ​ເຖິງ​ການ​ພັດ­ທະ­ນາ​ປະ­ເທດ​ຊາດ.

ຂ່າວທີ່ກ່ຽວຂ້ອງ