ປູກຜັກປອດສານພິດຂາຍ ສາມາດເຮັດໃຫ້ຄອບຄົມກຸ້ມກິນ

154 23 ກ.ລ. 2019 ຂ່າວໜ້າ​ໜຶ່ງ
ປູກຜັກປອດສານພິດຂາຍ ສາມາດເຮັດໃຫ້ຄອບຄົມກຸ້ມກິນ

    ພັກ ແລະ ລັດ­ຖະ­ບານ ກໍ​ຄື ຂະ­ແໜງ­ການ​ກ່ຽວ­ຂ້ອງ​ໄດ້​ຊຸກ­ຍູ້​ສົ່ງ­ເສີມ​ໃຫ້​ປະ­ຊາ­ຊົນ​ຜູ້​ທີ່​ມີ​ຄວາມ​ດຸ­ໝັ່ນ ແລະ ມັກ​ຮັກ​ໃນ​ການ​ປູກ­ຝັງ​ໃຫ້​ມາ​ປູກ​ຜັກ​ປອດ​ສານ­ພິດ ເພື່ອ​ຕອບ​ສະ­ໜອງ​ຄວາມ​ຕ້ອງ ການ​ຂອງ​ຕະ­ຫຼາດ ກໍ​ຄື ຜູ້​ບໍ­ລິ­ໂພກ​ໃຫ້​ມີ​ສຸ­ຂະ­ພາບ​ທີ່​ແຂງ­ແຮງ ດັ່ງ­ນັ້ນ ນາງ ວາດ​ສະ­ໜາ ພົມ­ມາ​ເສີດ ເປັນ​ບຸກ­ຄົນ​ໜຶ່ງ​ທີ່​ຢຶດ​ຖື​ອາ­ຊີບ​ປູກ​ຜັກ​ປອດ​ສານ­ພິດ​ຂາຍ ສ້າງ​ລາຍ​ຮັບ​ໃຫ້​ກັບ​ຄອບ­ຄົວ ທັງ​ເປັນ​ການ​ຮັກ­ສາ​ສຸ­ຂະ­ພາບ​ຂອງ​ຕົນ​ເອງ​ຕື່ມ​ອີກ.

    ນາງ ວາດ​ສະ­ໜາ ພົມ­ມາ​ເສີດ ບ້ານ​ບຸ່ງ​ພ້າວ ເມືອງ​ທຸ­ລະ­ຄົມ ແຂວງ​ວຽງ​ຈັນ ໃຫ້​ສຳ­ພາດ ໂອ­ກາດ​ທີ່​ມາ​ວາງ​ຂາຍ​ຜັກ​ປອດ​ສານ­ພິດ​ຢູ່​ເດີ່ນ​ສູນ​ການ​ຄ້າ​ລາວ-ໄອ​ເຕັກ ເມື່ອ​ບໍ່​ດົນ​ມາ​ນີ້​ວ່າ: ກຸ່ມ​ປູກ​ຜັກ​ປອດ​ສານ­ພິດ​ບຸ່ງ​ພ້າວ-ໂພນ​ແຕ້ ມີ​ຈຳ­ນວນ​ສະ­ມາ­ຊິກ​ທັງ​ໝົດ 21 ຄອບ­ຄົວ ໃນ​ນີ້ ຕົນ​ໄດ້​ເລີ່ມ​ເຂົ້າ​ກຸ່ມ​ປີ 2010 ມີ​ເນື້ອ­ທີ່​ປູກ 2 ໄລ່ ໃນ​ເບື້ອງ​ຕົ້ນ​ໄດ້​ປູກ​ຜັກ​ສະ­ຫຼັດ ຜັກ­ກາດ­ຊອມ ແລະ ໝາກ­ເຂືອ ເຫັນ​ວ່າ​ໄດ້­ຜົນ​ຕອບ​ຮັບ​ດີ​ສົມ­ຄວນ​ຈາກ​ຜູ້​ບໍ­ລິ­ໂພກ ແລະ ເຫັນ​ວ່າ­ຄວາມ​ຕ້ອງ­ການ​ຂອງ​ຕະ­ຫຼາດ​ນັບ​ມື້​ນັບ​ຫຼາຍ​ຂຶ້ນ ປັດ­ຈຸ­ບັນ​ຕົນ​ໄດ້​ຂະ­ຫຍາຍ​ເນື້ອ­ທີ່​ປູກ​ຜັກ​ເພີ່ມ​ຕື່ມ​ມາ​ເປັນ 7-8 ໄລ່ ເຊິ່ງ​ໄດ້​ປູກ​ຜັກ​ຫຼາຍ​ຊະ­ນິດ ເຊັ່ນ: ຜັກ­ບົ່ວ ຫອມ­ລາບ ໝາກ­ຫຸ່ງ ໜໍ່­ໄມ້​ຝຣັ່ງ ໝາກ­ເຜັດ ແລະ ອື່ນໆ.

    ສ່ວນ​ພືດ​ຜັກ​ທີ່​ຕົນ​ເອງ​ປູກ​ນັ້ນ ໄດ້​ຂາຍ​ເອງ​ຢູ່​ຕະ­ຫຼາດ​ຜັກ​ປອດ​ສານ­ພິດ​ທີ່​ພາກ­ສ່ວນ​ກ່ຽວ­ຂ້ອງ​ກຳ­ນົດ​ໃຫ້ ເຊັ່ນ: ສູນ​ການ​ຄ້າ​ລາວ-ໄອ​ເຕັກ ຕະ­ຫຼາດ​ຫ້ວຍ​ຫົງ ໂດຍ​ຜັກ​ແຕ່​ລະ​ປະ­ເພດ​ຈະ​ມີ​ລາ­ຄາ​ຂາຍ​ແຕ່​ກິ​ໂລ 15.000-20.000 ກີບ ແຕ່​ລາ­ຄາ​ຂາຍ​ຈະ​ບໍ່​ຄົງ​ທີ່ ເນື່ອງ​ຈາກ​ມີ​ການ​ເພີ່ມ​ລາ­ຄາ ຫຼື ຫຼຸດ​ລົງ ໂດຍ​ອີງ​ຕາມ​ການ​ເໜັງ​ຕີງ​ຂອງ​ລາ­ຄາ​ຜັກ​ຕາມ​ຕະ­ຫຼາດ ເຊິ່ງ​ສະ­ເລ່ຍ​ອາ­ທິດ​ໜຶ່ງ​ສາ­ມາດ​ສ້າງ​ລາຍ​ຮັບ​ຈາກ​ການ​ຂາຍ​ຜັກ​ປະ­ມານ 5-8 ແສນ​ກີບ ເຖິງ​ວ່າ​ລາຍ​ຮັບ​ຈະ​ບໍ່​ສູງ ແຕ່​ກໍ​ສາ­ມາດ​ລ້ຽງ​ກຸ້ມ​ຄອບ­ຄົວ ແລະ ເຮັດ​ໃຫ້​ຄອບ­ຄົວ​ມີ​ວຽກ​ເຮັດ​ງານ​ທຳ ມີ​ລາຍ​ຮັບ​ເປັນ​ປະ­ຈຳ ແລະ ຊີ­ວິດ​ການ​ເປັນ​ຢູ່​ກໍ​ນັບ​ມື້​ດີ​ຂຶ້ນ​ເລື້ອຍໆ.

ຂ່າວທີ່ກ່ຽວຂ້ອງ