ເບິ່ງບ້ານເຂົາເອົາບົດຮຽນ 23-07-2019

253 23 ກ.ລ. 2019 ຫົວຂໍ້ຂ່າວອື່ນໆ

    ເລື່ອງ​ສັນ​ຫາ​ມາ​ເລົ່າ​ໃນ​ບົດ​ນີ້​ໄດ້­ແກ່​ຂ່າວ ບັ້ນ​ຮົບ​ຕ້ານ​ຂີ້​ເຫຍື້ອ​ປະ­ເພດ​ຢາງ​ໃນ​ອິນ​ໂດ​ເນ​ເຊຍ ແລະ ສຸດ​ທ້າຍ​ແມ່ນ ມາດ​ຕະ­ການ​ຂອງ​ຈີນ ເພື່ອ​ຫຼຸດ­ຜ່ອນ​ຈຳ­ນວນ​ລົດ​ແລ່ນ​ຢູ່​ນະ­ຄອນ­ຫຼວງ​ປັກ​ກິ່ງ.

    ທີ່ ອິນ​ໂດ​ເນ​ເຊຍ: ສະ­ໜາມ­ຮົບ​ຕ້ານ​ຖົງ​ຢາງ (ປະ­ລາ­ສະ­ຕິກ) ຢູ່​ອິນ​ໂດ​ເນ​ເຊຍ​ນັ້ນ​ດຳ­ເນີນ​ໄປ​ຢ່າງ​ດຸ­ເດືອດ ຂ້ຽວ­ຂາດ ເປັນ​ສະ­ໜາມ­ຮົບ​ທີ່​ເຮັດ​ໄປ​ພ້ອມ​ກັນ​ໃນ​ທົ່ວ​ປະ­ເທດ ແລະ ມີ​ການ​ເນັ້ນ​ໃນ​ບາງ​ເຂດ​ທີ່​ປະ​ເຊີນ​ກັບ​ບັນ­ຫາ​ຖົງ​ປາ​ລາ​ສະ​ຕິກ​ຢ່າງ​ຮ້າຍ​ແຮງ ເຊັ່ນ: ຢູ່​ນະ­ຄອນ​ບາ​ຫຼີ ສະ­ຖານ­ທີ່​ທ່ອງ​ທ່ຽວ​ລະ­ດັບ​ໂລກ​ກໍ​ໄດ້​ປະ­ກາດ​ກຳ­ຈັດ​ຖົງ​ຢາງ​ທີ່​ຖິ້ມ​ຊະ​ຕາມ​ທ້ອງ​ທະ­ເລ​ອ້ອມ­ແອ້ມ​ນະ­ຄອນ​ໃຫ້​ໄດ້ 70% ແລະ ມີ​ມາດ​ຕະ­ການ​ປັບ​ໃໝ​ຢ່າງ​ໜັກ​ກັບ​ພາກ­ສ່ວນ​ປະ­ກອບ​ການ​ໃນ​ການ​ຜະ­ລິດ ແລະ ຈຳ­ໜ່າຍ​ຖົງ​ປາ​ລາ​ສະ ຕິກ​ທີ່​ລະ­ເມີດ​ຂໍ້​ຫ້າມ ດ້ວຍ​ການ​ຢຶດ​ຄືນ​ໃບ​ອະ­ນຸ­ຍາດ​ປະ­ກອບ​ການ.

    ມາ​ຫວ່າງ​ບໍ່​ດົນ​ມາ​ນີ້ (ວຽງ​ຈັນ​ທາມ ວັນ​ທີ 4 ກໍ­ລະ­ກົດ 2019) ກໍ​ໃຫ້​ຮູ້​ວ່າ: ທາງ​ກະ­ຊວງ​ການ​ເງິນ​ອິນ​ໂດ​ເນ​ເຊຍ​ຈະ​ເລີ່ມ​ເກັບ​ພາ­ສີ​ຖົງ​ຢາງ​ປະ­ເພດ​ຕ່າງໆ ແນ­ໃສ່​ຫຼຸດ­ຜ່ອນ​ຂີ້​ເຫຍື້ອ​ຖົງ​ຢາງ ຈຳ­ນວນ​ເງິນ​ພາ­ສີ​ທີ່​ຈະ​ເກັບ​ສຳ­ລັບ​ຖົງ​ຢາງ​ແຕ່​ລະ​ຖົງ​ນັ້ນ​ແມ່ນ 200 ຣູ​ເປຍ​ຕໍ່​ຖົງ (2 ຣູ​ເປຍ ຕໍ່ 1 ກີບ​ລາວ) ເຈົ້າ​ໜ້າ­ທີ່​ສະ­ຫະ​ກົມ​ພາ­ສີ ແລະ ດ່ານ​ພາ­ສີ ທີ່​ຂຶ້ນ​ກັບ​ກະ­ຊວງ​ການ​ເງິນ​ອິນ​ໂດ​ເນ​ເຊຍ​ໃຫ້​ຮູ້​ຕື່ມ​ກ່ຽວ​ກັບ​ເລື່ອງ​ນີ້​ວ່າ: ແຜນ​ເກັບ​ພາ­ສີ​ຖົງ​ຢາງ​ໄດ້​ຜ່ານ​ການ​ຄົ້ນ­ຄວ້າ​ລະ­ອຽດ​ກ່ຽວ​ກັບ​ປັດ​ໄຈ​ສິ່ງ­ແວ­ດລ້ອມ ກຳ­ລັງ​ການ​ຊື້​ຂອງ​ຜູ້​ຊົມ­ໃຊ້ ກໍ​ຄື ຜົນ​ກະ­ທົບ​ຕໍ່​ພາກ­ສ່ວນ​ປະ­ກອບ​ການ​ຜະ­ລິດ ແລະ ຈຳ­ໜ່າຍ​ຖົງ​ຢາງ ຖົງ​ຢາງ​ທີ່​ເນັ້ນ​ເກັບ​ພາ­ສີ​ເພື່ອ​ຈຳ­ກັດ​ການ​ຊົມ­ໃຊ້​ນັ້ນ​ໄດ້­ແກ່​ປະ­ເພດ​ທີ່​ຜະ­ລິດ​ຈາກ​ຢາງ ຫຼື ບັນ­ດາ​ວັດ­ຖຸ​ທີ່​ບໍ່​ສາ­ມາດ​ປຸງ​ແຕ່ງ​ຄືນ​ເພື່ອ​ນຳ​ໃຊ້​ໃໝ່​ໄດ້ (ຣີ​ໄຊ​ເຄິນ) ສ່ວນ​ຜູ້​ຜະ­ລິດ ແລະ ຈຳ­ໜ່າຍ​ຖົງ​ຢາງ​ຈາກ​ວັດ­ຖຸ​ທີ່​ສາ­ມາດ​ຣີ​ໄຊ​ເຄິນ​ໄດ້​ນັ້ນ​ຈະ​ໄດ້​ຮັບ​ສ່ວນ​ຫຼຸດ​ພາ­ສີ.

    ທີ່ ສປ ຈີນ: ນັບ​ແຕ່​ວັນ​ທີ 1 ເດືອນ​ພະ­ຈິກ ປີ​ນີ້​ເປັນ­ຕົ້ນ​ໄປ ລົດ​ທີ່​ຕິດ​ປ້າຍ​ທະ­ບຽນ​ຂຶ້ນ​ກັບ​ເຂດ ແຂວງ​ອື່ນ​ຂອງ ສປ ຈີນ ນັ້ນ ຈະ​ບໍ່​ສາ­ມາດ​ແລ່ນ​ເຂົ້າ​ນະ​ຄອຍ​ຫຼວງ​ປັກ​ກິ່ງ​ໄດ້​ຕາມ­ໃຈ​ອີກ​ຄື­ເກົ່າ​ແລ້ວ ຍ້ອນ​ວ່າ​ທາງ​ການ​ນະ­ຄອນ­ຫຼວງ​ມີ​ແຜນ​ຫຼຸດ­ຜ່ອນ​ສະ­ພາບ​ແອ​ອັດ​ຕາມ​ຖະ­ໜົນ ຍ້ອນ​ຈຳ­ນວນ​ລົດ​ມີ​ຫຼາຍ​ລົ້ນ​ພົ້ນ​ປະ­ມານ.

    ຂ່າວ​ກ່ຽວ​ກັບ​ມາດ​ຕະ­ການ​ນີ້​ອອກ​ມາ​ແຕ່​ຕົ້ນ​ເດືອນ​ມິ­ຖຸ­ນາ 2018 ພຸ້ນ (ວຽງ​ຈັນ​ທາມ 18 ມິ­ຖຸ­ນາ 2018) ຕາມ​ສະ­ຖິ­ຕິ​ໃນ​ເດືອນ​ເມ­ສາ 2018 ລົດ​ທີ່​ຈົດ​ທະ­ບຽນ​ໃນ​ນະ­ຄອນ­ຫຼວງ​ປັກ​ກິ່ງ​ນັ້ນ ມີ​ທັງ​ໝົດ 5,97 ລ້ານ​ຄັນ ສ່ວນ​ລົດ​ຈາກ​ຕ່າງ​ເຂດ ຕ່າງ​ແຂວງ​ທີ່​ແລ່ນ​ເຂົ້າ​ນະ­ຄອນ­ຫຼວງ​ເປັນ​ປະ­ຈຳ​ນັ້ນ​ມີ​ຫຼາຍ​ກວ່າ 7 ແສນ​ຄັນ ຫຼື ສ່ຳໆກັບ​ຈຳ­ນວນ​ລົດ​ຢູ່​ຮົງ​ກົງ ເຂດ​ປົກ­ຄອງ​ພິ­ເສດ​ຂອງ ສປ ຈີນ.

    ນັບ​ແຕ່​ວັນ​ທີ 1 ພະ­ຈິກ ປີ​ນີ້​ເປັນ­ຕົ້ນ​ໄປ ລົດ​ທີ່​ຈົດ​ທະ­ບຽນ​ຢູ່​ເຂດ-ແຂວງ​ນອກ​ຈະ​ມີ​ສິດ​ແລ່ນ​ເຂົ້າ​ເຂດ​ນະ­ຄອນ­ຫຼວງ​ປັກ​ກິ່ງ​ໄດ້ 12 ຄັ້ງ​ຕໍ່​ປີ ແຕ່​ລະ​ຄັ້ງ​ອະ­ນຸ­ຍາດ​ໃຫ້ 7 ວັນ​ຕິດ­ຕໍ່​ກັນ ເຊິ່ງ​ລວມ​ແລ້ວ​ເຈົ້າ​ຂອງ​ລົດ​ຈາກ​ເຂດ​ນອກ​ສາ­ມາດ​ແລ່ນ​ລົດ​ເຂົ້າ​ນະ­ຄອນ­ຫຼວງ​ປັກ​ກິ່ງ​ໄດ້ 84 ວັນ​ຕໍ່​ປີ ທີ່​ຕ້ອງ​ນຳ​ໃຊ້​ມາດ​ຕະ­ການ​ດັ່ງ­ກ່າວ ນອກ­ຈາກ​ເພື່ອ​ຫຼຸດ­ຜ່ອນ​ສະ­ພາບ​ຈະ­ລາ­ຈອນ​ຕິດ​ຂັດ ແລະ ມົນ​ລະ​ພິດ​ຈາກ​ຄວັນ​ລົດ​ແລ້ວ ຍັງ​ເພື່ອ​ກຳ­ຈັດ​ຄົນ​ນະ­ຄອນ­ຫຼວງ​ທີ່​ລັກ­ລອບ​ຂຶ້ນ​ທະ­ບຽນ​ປ້າຍ​ລົດ​ຢູ່​ຕ່າງ​ເຂດ-ແຂວງ ເພື່ອ​ໃຫ້​ໄດ້​ໂຄ​ຕາ​ຊື້​ລົດ ແລ້ວ​ເອົາ​ມາ​ແລ່ນ​ຢູ່​ນະ­ຄອນ­ຫຼວງ.

ຂ່າວທີ່ກ່ຽວຂ້ອງ