ນັກວິທະຍາສາດ ຢ້ານດວງຕາເວັນຈະຫຼັບຍາວ ໂລກຈະເຂົ້າສູ່ຍຸກໜາວເຢັນຍາວນານ

145 23 ກ.ລ. 2019 ຫົວຂໍ້ຂ່າວອື່ນໆ

    ຂະ­ນະ​ທີ່​ຫຼາຍ​ຄົນ​ອາດ​ກຳ­ລັງ​ລໍ­ຄອຍ​ທີ່​ຈະ​ໄດ້​ສຳ­ຜັດ​ອາ­ກາດ​ໜາວ​ເຢັນ ຊຶ່ງ​ກົມ​ອຸ­ຕຸ­ນິ­ຍົມ​ວິ­ທະ­ຍາ ພະ­ຍາ­ກອນ​ວ່າ​ຈະ​ເກີດ​ຂຶ້ນ​ໃນ​ມໍ່ໆ​ນີ້ ແຕ່​ສຳ­ລັບ​ນັກ­ວິ­ທະ­ຍາ­ສາດ​ທີ່​ສຶກ​ສາ​ດວງ​ຕາ­ເວັນ ກຳ­ລັງ​ເບິ່ງ​ໄປ​ໄກ​ກວ່າ​ນັ້ນ ນັ້ນ​ຄື ໂລກ​ອາດ​ປະ​ເຊີນ​ກັບ​ຍຸກ​ໜາວ​ເຢັນ​ຕໍ່​ເນື່ອງ​ພາຍ​ໃນ​ອີກ​ບໍ່​ເທົ່າ­ໃດ​ປີ​ຂ້າງ​ໜ້າ​ນີ້.

    ນັກ­ວິ­ຊາ­ການ​ສະ­ມາ­ຄົມ​ດາ­ລາ­ສາດ​ຂອງ​ຕ່າງ­ປະ­ເທດ ອະ­ທິ­ບາຍ​ວ່າ ຕາ­ເວັນ​ກໍ​ຈະ​ມີ​ວັດ­ຕະ​ຈັກ​ຂອງ​ຕົວ​ເອງ​ໝູ­ນວຽນ​ປ່ຽນ​ໄປ​ເລື້ອຍໆ ເອີ້ນ​ວ່າ​ວັດ­ຕະ​ຈັກ​ຂອງ​ກຳ​ມັນ​ຕະ​ພາບ​ສຸ­ລິ­ຍະ ເຊັ່ນ ການ​ເກິດ​ຈຸດ​ມືດ (sunspot) ການ​ຮຸ່ງ​ແຈ້ງ(Flare) ຊີ​ເອັມ​ອີ ຊຶ່ງ​ເປັນ​ສາ­ເຫດ​ຫຼັກ​ຂອງ​ພາ­ຍຸ​ສຸ­ລິ­ຍະ ໂດຍ​ໄລ­ຍະ​ເວ­ລາ​ໃດ​ທີ່​ດວງ​ຕາ­ເວັນ​ມີ​ປະ­ຕິ­ກິ­ລິ­ຍາ​ຫຼາຍ ໂດຍ​ປົກ­ກະ­ຕິ ກຳ​ມັນ​ຕະ​ພາບ​ຂອງ​ດວງ​ຕາ­ເວັນ ມີ​ຂຶ້ນ​ລົງ​ເປັນ​ວັດ­ຕະ​ຈັກ ໄລ­ຍະ​ທີ່​ກຳ​ມັນ​ຕະ​ພາບ​ຂຶ້ນ​ສູງ​ສຸດ ຫຼື ໂຊ​ລາ​ແມັກຊ໌ ດວງ​ຕາ­ເວັນ​ຈະ​ແຜ່​ພະ­ລັງ­ງານ​ອອກ​ມາ​ສູງ​ກວ່າ​ໄລ­ຍະ​ອື່ນ ໂດຍ​ສະ­ເພາະ ໃນ​ຍ່ານ​ອັລ​ຕຣາ​ໄວ​ໂອ​ເລດ ຫຼື​ລັງ­ສີ​ຢູ​ວີ ປົກ­ກະ­ຕິ ວັດ­ຕະ​ຈັກ​ຂອງ​ລະ­ບົບ​ສຸ­ລິ­ຍະ ມີ​ຜົນ​ຕໍ່​ສະ­ພາບ​ພູມ​ອາ­ກາດ​ຂອງ​ໂລກ ເຖິງ​ແມ່ນ​ຈະ​ບໍ່​ເດັ່ນ​ປານ­ໃດ ແຕ່​ຫາກ​ວັດ­ຕະ​ຈັກ​ມີ​ຄວາມ​ຜິດ​ປົກ­ກະ­ຕິ​ເປັນ​ໄລ­ຍະ​ເວ­ລາ​ຍາວ ກໍ​ອາດ​ມີ​ຜົນ​ຕໍ່​ສະ­ພາບ​ພູມ​ອາ­ກາດ​ໂລກ​ຢ່າງ​ຫຼວງ­ຫຼາຍ ແລະ ສິ່ງ​ນັ້ນ​ກໍ​ເບິ່ງ​ເໝືອນ​ວ່າ​ກຳ­ລັງ​ຈະ​ເກີດ​ຂຶ້ນ.

    “ຂະ­ນະ​ນີ້ ເຮົາ​ຍັງ​ຢູ່​ໃນ​ວັດ­ຕະ​ຈັກ​ທີ 24 (ນັບ​ຈາກ​ປີ 1755) ຊຶ່ງ​ໄດ້​ຜ່ານ​ໄລ­ຍະ​ສູງ​ສຸດ​ມາ​ແລ້ວ​ໃນ​ປີ 2013 ຊຶ່ງ​ເປັນ​ວັດ­ຕະ​ຈັກ​ທີ່​ດວງ​ຕາ­ເວັນ​ບໍ່​ຄ່ອຍ​ຈະ​ມີ​ປະ­ຕິ​ກະ​ລະ​ຍາ​ຫຼາຍ​ປານ­ໃດ ແລະ ຈາກ​ການ​ສຶກ​ສາ​ຂອງ​ນັກ​ດາ­ລາ­ສາດ​ຈາກ​ຫຼາຍ​ສຳ­ນັກ ພົບ​ວ່າ ໃນ​ວັດ­ຕະ​ຈັກ​ທີ 25 ຊຶ່ງ​ຈະ​ເລີ່ມ​ໃນ​ປະ­ມານ​ປີ 2020 ມີ​ທ່າ​ອ່ຽງ​ວ່າ​ຈະ​ຍິ່ງ​ຫງ່ວມ­ເຫງົາ​ລົງ​ໄປ​ອີກ ອາດ​ເປັນ​ວັດ­ຕະ​ຈັກ​ທີ່​ມີ​ປະ­ຕິ­ກິ­ລິ­ຍາ​ໜ້ອຍ​ທີ່​ສຸດ​ໃນ​ຮອບ 100 ປີ​ກໍ​ໄດ້ ແນ່­ນອນ​ວ່າ​ຫາກ​ດວງ​ຕາ­ເວັນ​ມີ​ປະ­ຕິ­ກິ­ລິ­ຍາ​ໜ້ອຍ​ເປັນ​ໄລ­ຍະ​ຍາວ​ຕໍ່​ເນື່ອງ​ຫຼາຍ​ວັດ­ຕະ​ຈັກ​ຕິດ​ກັນ ກໍ​ຈະ​ເກີດ​ຄວາມ​ປ່ຽນ­ແປງ​ທາງ​ສະ­ພາບ​ພູມ​ອາ­ກາດ​ຢ່າງ​ຫຼວງ­ຫຼາຍ ສິ່ງ​ນີ້​ເຄີຍ​ເກີດ​ຂຶ້ນ​ມາ​ແລ້ວ​ໃນ​ໄລ­ຍະ​ປີ 1645-1715 ຊຶ່ງ​ເອີ້ນ​ວ່າ​ເປັນ​ໄລ­ຍະ​ຕ່ຳ​ສຸດ​ມອນ​ເດີ ໃນ​ໄລ­ຍະ​ເວ­ລາ​ດັ່ງ­ກ່າວ​ພົບ​ວ່າ​ມີ​ອາ­ກາດ​ແຫ້ງ­ແລ້ງ ແລະ ໜາວ​ເຢັນ​ເຖິງ​ຂະ­ໜາດ​ທີ່​ແມ່­ນ້ຳ​ເທມສ໌ ໃນ​ປະ­ເທດ​ອັງ­ກິດ ກາຍ­ເປັນ​ນ້ຳ­ກ້ອນ​ໃນ​ລະ­ດູ​ໜາວ​ເລີຍ.

    ຢ່າງ­ໃດ​ກໍ​ຕາມ ຍັງ​ບໍ່​ອາດ​ຢືນ­ຢັນ​ວ່າ​ດວງ​ຕາ­ເວັນ ຈະ​ເຂົ້າ​ສູ່​ໄລ­ຍະ​ຫຼັບ​ຍາວ​ແບບ​ໄລ­ຍະ​ຕ່ຳ​ສຸດ​ມອນ​ເດີ​ອີກ​ຄັ້ງ​ຫຼື​ບໍ່ ໂລກ​ເຮົາ​ຈະ​ເຂົ້າ​ສູ່​ຍຸກ​ແຫ່ງ​ຄວາມ​ໜາວ​ເຢັນ​ອີກ​ຄັ້ງ​ຫຼື​ບໍ່ ຍັງ​ຄົງ​ຕ້ອງ​ຕິດ­ຕາມ​ສຶກ​ສາ​ດວງ​ຕາ­ເວັນ​ກັນ​ຕໍ່​ໄປ​ຢ່າງ​ໃກ້­ຊິດ.

ຂ່າວທີ່ກ່ຽວຂ້ອງ