ຈຳປາສັກ ຖອດຖອນບົດຮຽນວຽກງານປະຕູດຽວ ຢູ່ຫ້ອງວ່າການ ນວ

310 22 ກ.ລ. 2019 ຂ່າວໜ້າ​ໜຶ່ງ

    ວັນ​ທີ 15 ກໍ­ລະ­ກົດ ຜ່ານ​ມາ ທີ່​ຫ້ອງ​ວ່າ­ການ​ປົກ­ຄອງ​ນະ­ຄອນ­ຫຼວງ​ວຽງ​ຈັນ (ນວ) ທ່ານ ພູ​ວົງ ວົງ​ຄຳ​ຊາວ ຫົວ­ໜ້າ​ຫ້ອງ​ວ່າ­ການ ນວ ໄດ້​ຕ້ອນ­ຮັບ​ທ່ານ ບົວ​ລີ ເພັດ​ສົງ­ຄາມ ຫົວ­ໜ້າ​ຫ້ອງ​ວ່າ­ການ​ປົກ­ຄອງ​ແຂວງ​ຈຳ­ປາ​ສັກ ພ້ອມ​ຄະ­ນະ ໂອ­ກາດ​ທີ່​ເດີນ­ທາງ​ມາ​ທັດ­ສະ­ນະ​ແລກ­ປ່ຽນ​ບົດ­ຮຽນ​ກ່ຽວ​ກັບ​ວຽກ​ງານ​ການ​ບໍ­ລິ­ການ​ລະ­ບົບ​ເອ­ກະ­ສານ​ຜ່ານ​ປະ­ຕູ​ດຽວ​ກັບ​ຫ້ອງ​ວ່າ­ການ​ປົກ­ຄອງ ນວ.

    ໂອ­ກາດ​ນີ້ ທ່ານ ວຽງ​ສະ­ໄໝ ພາ​ສະ­ເຫຼີມ​ສຸກ ຮອງ​ຫົວ­ໜ້າ​ຫ້ອງ​ວ່າ­ການ​ປົກ­ຄອງ ນວ ໄດ້​ລາຍ​ງານ​ການ­ຈັດ­ຕັ້ງ​ປະ­ຕິ­ບັດ​ວຽກ​ງານ​ປະ­ຕູ​ດຽວ 6 ເດືອນ​ຕົ້ນ​ປີ 2019 ແລະ ທິດ​ທາງ​ແຜນ­ການ​ຕໍ່­ໜ້າ​ວ່າ: ໄລ­ຍະ 6 ເດືອນ​ຜ່ານ​ມາ ໜ່ວຍ​ງານ​ປະ­ຕູ​ດຽວ​ຫ້ອງ​ວ່າ­ການ ນວ ໄດ້​ຮັບ​ເອ­ກະ­ສານ​ຂາ​ເຂົ້າ​ທັງ​ໝົດ 2.823 ສະ­ບັບ ໃນ​ນີ້ ມີ​ເອ­ກະ­ສານ​ແຈກ​ຢາຍ​ໃຫ້​ພາກ­ສ່ວນ​ອື່ນ​ພາຍ​ໃນ​ຕຶກ 955 ສະ­ບັບ ເອ­ກະ­ສານ​ຂາ​ອອກ​ມີ​ຄຳ​ເຫັນ​ຈ້ຳ​ກາ​ຂາ​ອອກ​ເປັນ​ທາງ​ການ​ທັງ​ໝົດ 2.930 ສະ­ບັບ ໄດ້​ກວດ­ກາ ແລະ ຈັດ​ສົ່ງ​ເອ­ກະ­ສານ​ທັງ​ໝົດ 1.819 ສະ­ບັບ  ເອ­ກະ­ສານ​ຂາ​ອອກ (ລັບ) 3 ສະ­ບັບ ເອ­ກະ­ສານ​ຂາ​ເຂົ້າ (ລັບ) ຂອງ​ທ່ານ​ເຈົ້າ​ຄອງ ນວ 149 ສະ­ບັບ ນຳ​ໃຊ້​ລະ­ບົບ​ການ​ສຳ​ເນົາ​ເອ­ກະ­ສານ​ແບບ​ທັນ​ສະ­ໄໝ ກໍ​ຄື​ການ​ເກັບ​ຮັກ­ສາ​ໄວ້​ໃນ​ຄອມ​ພິວ​ເຕີ ແລະ ສະ​ແກນ​ເຂົ້າ​ໃນ​ລະ­ບົບ​ຂາ​ອອກ ທຸກ​ເອ­ກະ­ສານ​ລວມ​ທັງ​ໝົດ​ມີ 19 ລາຍ­ການ ມີ 5.753 ສະ­ບັບ (ສະ­ເພາະ​ເອ­ກະ­ສານ​ຂອງ​ຫ້ອງ​ວ່າ­ການ) ໄດ້​ນຳ​ໃຊ້​ລະ­ບົບ​ເອ­ກະ­ສານ​ແບບ​ທັນ​ສະ­ໄໝ (ລະ­ບົບ​ຊຸດ​ໃໝ່) ໄດ້​ສຳ­ເລັດ​ຕາມ​ເປົ້າ​ໝາຍ ເຊິ່ງ​ເລີ່ມ​ໃຊ້​ໃນ​ວັນ​ທີ 3 ມິ­ຖຸ­ນາ 2019 ພ້ອມ​ນັ້ນ ໄດ້​ເປີດ​ກອງ​ປະ­ຊຸມ​ສະ­ຫຼຸບ​ຖອດ​ຖອນ​ບົດ­ຮຽນ​ເຄື່ອນ​ໄຫວ​ວຽກ​ງານ​ຢູ່​ໜ່ວຍ​ບໍ­ລິ­ການ​ປະ­ຕູ​ດຽວ​ໃນ​ໄລ­ຍະ 6 ເດືອນ ໄດ້​ກອບ​ປີ້​ສຳ​ເນົາ​ເອ­ກະ­ສານ​ທາງ​ການ​ເພື່ອ​ໃຫ້​ພາກ­ສ່ວນ​ກ່ຽວ­ຂ້ອງ​ໄດ້​ຕິດ­ຕາມ ໄດ້​ແກ້​ໄຂ​ເອ­ກະ­ສານ​ກັບ​ທີ່ ທີ່​ເຫັນ​ວ່າ​ຍັງ​ບໍ່​ທັນ​ຄົບ​ຖ້ວນ ເພື່ອ​ບໍ່​ໃຫ້​ເສຍ​ເວ­ລາ​ກັບ​ໄປ​ກັບ​ມາ​ຫຼາຍ​ເທື່ອ ນອກ​ນີ້ ຍັງ​ໄດ້​ຮັບ​ເອ­ກະ­ສານ​ຕ່າງໆ ເປັນ­ຕົ້ນ ບົດ​ສະ­ຫຼຸບ ບັດ​ເຊີນ ຈົດ­ໝາຍ​ວຽກ ແລະ ເອ­ກະ­ສານ​ຈາກ​ພາກ­ສ່ວນ​ຕ່າງໆ​ແມ່ນ​ໄດ້​ຈັດ​ສົ່ງ ແຈກ​ຢາຍ​ໃຫ້​ຄະ­ນະ​ຫ້ອງ​ວ່າ­ການ ພະ­ແນກ­ການ​ພາຍ​ໃນ​ຕຶກ​ສຳ­ນັກ­ງານ​ປົກ­ຄອງ ນວ ແລະ ທ່ານ​ເຈົ້າ​ຄອງ ນວ ເປັນ​ປົກ­ກະ­ຕິ​ທຸກ​ວັນ.

    ສຳ­ລັບ​ທິດ​ທາງ​ຕໍ່­ໜ້າ ເພື່ອ​ຈັດ​ຕັ້ງ​ປະ­ຕິ­ບັດ​ຕາມ​ການ​ຕົກ­ລົງ​ຂອງ​ທ່ານ​ເຈົ້າ​ຄອງ ນວ ສະ­ບັບ​ລົງ​ວັນ​ທີ 4 ທັນ­ວາ 2018 ວ່າ​ດ້ວຍ​ການ​ອະ­ນຸ­ມັດ​ຈັດ​ຕັ້ງ​ປະ­ຕິ­ບັດ​ວຽກ​ງານ​ບໍ­ລິ­ການ​ປະ­ຕູ​ດຽວ​ຢູ່​ສຳ­ນັກ­ງານ​ປົກ­ຄອງ ນວ ໃຫ້​ປະ­ສົບ​ຜົນ­ສຳ­ເລັດ ແລະ ໄດ້​ຮັບ​ໝາກ­ຜົນ​ນັ້ນ ສືບ­ຕໍ່​ປະ­ຕິ­ບັດ​ວຽກ​ງານ​ບໍ­ລິ­ການ​ປະ­ຕູ​ດຽວ ກໍ​ຄື ວຽກ​ງານ​ຂາ​ເຂົ້າ-ຂາ​ອອກ​ໃຫ້​ວ່ອງ­ໄວ​ທັນ​ເວ­ລາ 10 ວັນ​ລັດ​ຖະ​ການ ໃຫ້​ເອ­ກະ­ສານ​ສຳ­ເລັດ​ຕາມ​ລະ­ບຽບ ແລະ ນິ­ຕິ​ກຳ​ຂອງ​ລັດ­ຖະ­ບານ​ວາງ​ອອກ ສືບ­ຕໍ່​ປັບ­ປຸງ​ລະ­ບົບ​ການ​ສຳ​ເນົາ​ເອ­ກະ­ສານ​ໃຫ້​ໄດ້​ຮ່ວມ​ກັບ​ລະ­ບົບ​ທັນ​ສະ­ໄໝ  ເພື່ອ​ຄຸ້ມ​ຄອງ​ຮັກ­ສາ​ໄດ້​ດ້ວຍ​ຄວາມ​ລັບ​ຂອງ​ເອ­ກະ­ສານ ສືບ­ຕໍ່​ຄົ້ນ­ຄວ້າ​ປັບ­ປຸງ​ການ​ຈໍ​ລະ​ຈອນ ຈັດ​ສົ່ງ​ເອ­ກະ­ສານ​ໃຫ້​ວ່ອງ­ໄວ ແລະ ທັນ​ສະ­ໄໝ​ຂຶ້ນ​ຕື່ມ ໂດຍ​ໃຊ້​ລະ­ບົບ Smart Document.

ຂ່າວທີ່ກ່ຽວຂ້ອງ