ທົ່ວປະເທດ ມີຜູ້ເສຍຊີວິດຍ້ອນພະຍາດໄຂ້ຍຸງລາຍ 32 ຄົນ

219 19 ກ.ລ. 2019 ຂ່າວໜ້າ​ໜຶ່ງ

    ປັດ­ຈຸ­ບັນ​ພະ­ຍາດ​ໄຂ້­ຍຸງ​ລາຍ​ໄດ້​ເກີດ​ຢູ່​ຫຼາຍ​ແຂວງ ສົ່ງ​ຜົນ​ໃຫ້​ມີ​ຜູ້​ເສຍ​ຊີ­ວິດ​ເພີ່ມ​ຂຶ້ນ ແລະ ຈຳ­ນວນ​ຄົນ​ເຈັບ​ກໍ​ເພີ່ມ​ຂຶ້ນ​ເຊັ່ນ​ກັນ ເຊິ່ງ​ທາງ​ດຽວ​ທີ່​ຈະ​ປ້ອງ​ກັນ​ພະ­ຍາດ​ນີ້​ໄດ້​ນັ້ນ ທຸກ​ຄົນ​ຕ້ອງ​ພ້ອມ​ກັນ​ເອົາ­ໃຈ­ໃສ່​ປະ­ຕິ­ບັດ​ຫຼັກ­ການ 5 ປ ໄປ​ພ້ອມ​ກັບ​ການ​ທຳ­ລາຍ​ແຫຼ່ງ​ເພາະ​ພັນ​ໜອນ​ຍຸງ​ຢ່າງ​ເປັນ​ປະ­ຈຳ​ໃນ​ທຸກ​ອາ­ທິດ.

   ອີງ​ຕາມ​ການ​ລາຍ​ງານ​ຂອງ​ກົມ​ຄວບ​ຄຸມ­ພະ​ຍາດ​ຕິດ­ຕໍ່ ກະ­ຊວງ​ສາ­ທາ­ລະ­ນະ​ສຸກ​ໄດ້​ລາຍ​ງານ​ໃຫ້​ຮູ້​ວ່າ: ມາ​ຮອດ​ວັນ​ທີ 17 ກໍ­ລະ­ກົດ 2019 ທົ່ວ​ປະ­ເທດ​ມີ​ຄົນ​ເຈັບ​ຍ້ອນ​ພະ­ຍາດ​ໄຂ້­ຍຸງ​ລາຍ 506 ກໍ­ລະ­ນີ ໃນ​ນັ້ນ ນະ­ຄອນ­ຫຼວງ​ວຽງ​ຈັນ 256 ກໍ­ລະ­ນີ ແຂວງ​ຈຳ­ປາ​ສັກ 22 ກໍ­ລະ­ນີ ສະ­ຫວັນ​ນະ​ເຂດ 43 ກໍ­ລະ­ນີ ສາ­ລະ​ວັນ 49 ກໍ­ລະ­ນີ ຄຳ​ມ່ວນ 46 ກໍ­ລະ­ນີ ອັດ​ຕະ​ປື 17 ກໍ­ລະ­ນີ ບໍ​ລິ​ຄຳ​ໄຊ 5 ກໍ­ລະ­ນີ ຫຼວງ​ນ້ຳ​ທາ 2 ກໍ­ລະ­ນີ ວຽງ​ຈັນ 10 ກໍ­ລະ­ນີ ເຊ​ກອງ 13 ກໍ­ລະ­ນີ ໄຊ​ຍະ​ບູ​ລີ 19 ກໍ­ລະ­ນີ ຫຼວງ​ພະ​ບາງ 11 ກໍ­ລະ­ນີ ໄຊ​ສົມ­ບູນ 5 ກໍ­ລະ­ນີ ອຸ­ດົມ​ໄຊ 2 ກໍ­ລະ­ນີ ບໍ່​ແກ້ວ 2 ກໍ­ລະ­ນີ ແລະ ແຂວງ​ຊຽງ​ຂວາງ 4 ກໍ­ລະ­ນີ ມາ​ເຖິງ​ປັດ­ຈຸ­ບັນ​ທົ່ວ​ປະ­ເທດ​ມີ​ຈຳ­ນວນ​ກໍ­ລະ­ນີ​ຄົນ​ເຈັບ​ສະ​ສົມ ຈຳ­ນວນ 14.744 ກໍ­ລະ­ນີ ແລະ ເສຍ​ຊີ­ວິດ 32 ກໍ­ລະ­ນີ.

    ເພື່ອ​ຕ້ານ ແລະ ສະ­ກັດ​ກັ້ນ​ພະ­ຍາດ​ດັ່ງ­ກ່າວ​ບໍ່​ໃຫ້​ມີ​ກໍ­ລະ­ນີ​ເກີດ​ຂຶ້ນ​ໃໝ່​ນັ້ນ ທຸກ​ຄົນ​ຕ້ອງ​ພ້ອມ​ກັນ​ປະ­ກອບ­ສ່ວນ​ຢ່າງ​ຕັ້ງ­ໜ້າ​ໃນ​ການ​ລົງ­ມື​ປະ­ຕິ­ບັດ​ດ້ວຍ​ຕົນ​ເອງ ທຳ­ລາຍ​ແຫຼ່ງ​ເພາະ​ພັນ​ໜອນ​ນ້ຳ​ຍຸງ​ລາຍ ອະ­ນາ­ໄມ​ສິ່ງ­ແວ­ດລ້ອມ​ອ້ອມ​ເຮືອນ ແລະ ເກັບ​ມ້ຽນ​ພາ­ຊະ­ນະ​ເພື່ອ​ບໍ່​ໃຫ້​ຍຸງ​ລາຍ​ມາ​ໄຂ່​ໃສ່ ແລະ ຖ້າ​ນຳ​ໃຊ້​ໄຫ ອ່າງ​ນ້ຳ ຕ້ອງ​ປິດ​ຝາ ຫຼື ນຳ​ເອົາ​ປາ​ຫາງ​ນົກ​ຍຸງ​ມາ​ປ່ອຍ​ໃສ່​ເພື່ອ​ກິນ​ໜອນ​ນ້ຳ ປ້ອງ​ກັນ​ບໍ່​ໃຫ້​ຍຸງ​ລາຍ​ກັດ ແລະ ທີ່​ສຳ­ຄັນ ຖ້າ​ເປັນ­ໄຂ້​ຕ້ອງ​ໄປ​ພົບ​ແພດ ບໍ່​ຄວນ​ຊື້​ຢາ​ມາ​ກິນ​ເອງ.

ຂ່າວທີ່ກ່ຽວຂ້ອງ