ຂີດລະລ້ານ !

258 19 ກ.ລ. 2019 ຫົວຂໍ້ຂ່າວອື່ນໆ

    ການ​ຊື້-ຂາຍ​ຫງາຍ​ມື​ຕ່າງໆ​ນອກ­ຈາກ​ຕ້ອງ​ຖືກ­ຕ້ອງ​ຕາມ​ລະ­ບຽບ​ກົດ­ໝາຍ ບໍ່​ຄ້າ­ຂາຍ​ສິນ­ຄ້າ​ທີ່​ກົດ­ໝາຍ​ເກືອດ​ຫ້າມ​ແລ້ວ ສິ່ງ​ໜຶ່ງ​ທີ່​ສຳ­ຄັນ​ເຊິ່ງ​ຖື​ວ່າ​ເປັນ​ຈັນ­ຍາ­ທຳ​ຈັນ​ຍາ​ບັນ​ຂອງ​ຊາວ​ຄ້າ­ຂາຍ​ນັ້ນ​ກໍ​ຄື​ຄວາມ​ຊື່­ສັດ​ບໍ­ລິ­ສຸດ ແລະ ເປັນ​ທຳ​ທີ່​ມີ​ໃຫ້​ແກ່​ຜູ້​ມາ​ອຸດ​ໝູນ (ຊື້) ແນ່­ນອນ​ວ່າ​ຜູ້​ຊື້​ເມື່ອ​ເຂົາ​ເສຍ​ເງິນ​ຊື້ ແລກ​ກັບ​ສິນ­ຄ້າ​ຂອງ​ທ່ານ​ແລ້ວ​ເຂົາ​ຕ້ອງ​ຢາກ​ໄດ້​ສິນ­ຄ້າ​ເຫຼົ່າ­ນັ້ນ​ດ້ວຍ​ຄຸນ​ນະ​ພາບ ແລະ ປະ­ລິ­ມານ​ນ້ຳ­ໜັກ​ເຕັມ​ອັດ­ຕາ​ເພາະ​ມັນ​ແມ່ນ​ຂອງ​ຊື້​ຂອງ​ຂາຍ ບໍ່​ມີ​ໃຜ​ປາດ​ຖະ​ໜາ​ຈ່າຍ​ເງິນ​ຊື້​ສິນ­ຄ້າ​ໃນ​ນ້ຳ­ໜັກ 1 ກິ​ໂລ​ກຼາມ​ແຕ່​ໄດ້​ສິນ­ຄ້າ​ຕົວ​ຈິງ​ພຽງ​ແຕ່ 8 ຫຼື 9 ຂີດ​ເທົ່າ​ນັ້ນ. ຕ້ອງ​ຄຳ­ນຶງ​ຢູ່​ສະ­ເໝີ​ວ່າ­ການ​ຄ້າ­ຂາຍ​ຈະ​ໄດ້​ກຳ­ໄລ ແລະ ສາ­ມາດ​ດຳ­ເນີນ​ກິດ­ຈະ­ການ​ໃຫ້​ດຳ­ລົງ​ຄົງ​ຕົວ ແລະ ເຮັດ​ໃຫ້​ທຸ­ລະ​ກິດ​ຂະ­ຫຍາຍ­ຕົວ​ຍິ່ງໆ​ຂຶ້ນ​ຕ້ອງ​ຢືນ​ຢູ່​ບົນ​ພື້ນ­ຖານ​ແຫ່ງ​ຄວາມ​ຊື່­ສັດ​ສຸ​ຈະ­ລິດ​ດັ່ງ​ຄຳ​ເວົ້າ​ທີ່​ວ່າ​ຊື່​ກິນ​ບໍ່​ໝົດ​ຄົດ​ກິນ​ບໍ່​ນານ.

    ກົດ­ໝາຍ​ວ່າ​ດ້ວຍ​ອາ­ຍາ​ແຫ່ງ ສປປ ລາວ (ສະ­ບັບ​ປັບ­ປຸງ​ໃໝ່) ໝວດ​ທີ V ມາດ­ຕາ 120 ໄດ້​ລະ­ບຸ​ໄວ້​ວ່າ: ບຸກ­ຄົນ​ໃດ​ຫາກ​ໄດ້​ໃຊ້​ເລ່​ລ່ຽມ​ຕົວະ​ຍົວະ​ຫຼອກ​ລວງ​ດ້ວຍ​ວິ­ທີ​ໃດ​ກໍ​ຕາມ​ເພື່ອ​ໃຫ້​ຜູ້​ອື່ນ​ເອົາ​ຊັບ​ໃຫ້​ຕົນ​ຈະ​ຖືກ​ລົງ­ໂທດ​ຕັດ​ອິດ­ສະ­ຫຼະ­ພາບ​ແຕ່ 3 ເດືອນ​ຫາ 2 ປີ ແລະ ຈະ​ຖືກ​ປັບ​ໃໝ​ແຕ່ 200.000 ກີບ​ຫາ 5.000.000 ກີບ ໃນ​ກໍ­ລະ­ນີ​ທີ່​ຜູ້​ກະ­ທຳ​ຜິດ​ຫາກ​ໄດ້​ເອົາ​ການ​ສໍ້​ໂກງ​ຊັບ​ເປັນ​ອາ­ຈີນ ມີ​ການ­ຈັດ­ຕັ້ງ​ເປັນ​ກຸ່ມ ຫຼື ໃນ​ກໍ­ລະ­ນີ​ທີ່​ມີ​ຄວາມ​ເສຍ​ຫາຍ​ຢ່າງ​ໃຫຍ່​ຫຼວງ​ຈະ​ຖືກ​ລົງ­ໂທດ​ຕັດ​ອິດ­ສະ­ຫຼະ­ພາບ ແຕ່ 2 ປີ​ຫາ 5 ປີ ແລະ ຈະ​ຖືກ​ປັບ​ໃໝ​ແຕ່ 500.000 ກີບ​ຫາ 10.000.000 ກີບ. ຂະ­ນະ​ທີ່​ມາດ­ຕາ 121 ຍັງ​ລະ­ບຸ​ຕື່ມ​ວ່າ: ບຸກ­ຄົນ​ໃດ​ຫາກ​ໄດ້​ສວຍ​ໃຊ້​ຄວາມ​ເຊື່ອ​ໃຈ​ເພື່ອ​ລັກ​ໂລບ​ເອົາ ຕັດ​ຮອນ​ເອົາ ຫຼື ສັບ​ປ່ຽນ​ເອົາ​ຊັບ​ທີ່​ຕົນ​ໄດ້​ຖືກ​ມອບ​ໝາຍ​ໃຫ້​ຮັກ­ສາ ຫຼື ເພື່ອ​ຈຸດ­ປະ­ສົງ​ໃດ​ໜຶ່ງ​ຈະ​ຖືກ​ລົງ­ໂທດ​ຕັດ​ອິດ­ສະ­ຫຼະ­ພາບ​ແຕ່ 3 ເດືອນ​ຫາ 2 ປີ ແລະ ຈະ​ຖືກ​ປັບ​ໃໝ​ແຕ່ 200.000 ກີບ​ຫາ 5.000.000 ກີບ ໃນ​ກໍ­ລະ­ນີ​ທີ່​ຜູ້​ກະ­ທຳ​ຜິດ​ຫາກ​ໄດ້​ເອົາ​ການ​ຍັກ​ຍອກ​ຊັບ​ເປັນ​ອາ­ຈີນ ມີ​ການ­ຈັດ­ຕັ້ງ​ເປັນ​ກຸ່ມ ຫຼື ໃນ​ກໍ­ລະ­ນີ ທີ່​ມີ​ຄວາມ​ເສຍ​ຫາຍ​ຢ່າງ​ໃຫຍ່​ຫຼວງ​ຈະ​ຖືກ​ລົງ­ໂທດ​ຕັດ​ອິດ­ສະ­ຫຼະ­ພາບ​ແຕ່ 2 ປີ​ຫາ 5 ປີ ແລະ ຈະ​ຖືກ​ປັບ​ໃໝ​ແຕ່ 500.000 ກີບ​ຫາ 10.000.000 ກີບ​ເຊິ່ງ​ຄວາມ​ພະ­ຍາ­ຍາມ​ກໍ່​ການ​ກະ­ທຳ​ຜິດ (ທັງ​ສໍ້​ໂກງ​ທັງ​ຍັກ​ຍອກ) ກໍ​ຈະ​ຖືກ​ລົງ­ໂທດ​ຄື​ກັນ.

    ຫຼາຍ​ທ່ານ​ເຄີຍ​ໄດ້​ຍິນ​ຫາງ​ສຽງ ຫຼື ອາດ​ຈະ​ປະ­ສົບ​ພົບ­ພໍ້​ດ້ວຍ​ຕົນ​ເອງ​ມາ​ແລ້ວ​ກໍ​ເປັນ​ໄປ​ໄດ້​ຕໍ່​ກໍ­ລະ­ນີ​ການ​ໂກງ​ຕາ​ຊີງ​ຊັ່ງ​ສິນ­ຄ້າ​ເຖິງ​ແມ່ນ​ວ່າ​ໃນ​ໄລ­ຍະ​ຜ່ານ​ມາ​ເຈົ້າ​ໜ້າ­ທີ່​ຜູ້​ຮັບ­ຜິດ­ຊອບ​ການ​ຄຸ້ມ​ຄອງ​ເລື່ອງ​ຂອງ​ຕາ​ຊີງ​ຊັ່ງ​ສິນ­ຄ້າ​ຈະ​ມີ​ບາງ​ມາດ​ຕະ­ການ​ປ້ອງ​ກັນ ແລະ ແກ້​ໄຂ​ປະ­ກົດ​ການ​ດັ່ງ­ກ່າວ​ແລ້ວ​ເປັນ­ຕົ້ນ​ແມ່ນ​ໄດ້​ຕິດ​ຕັ້ງ​ຕາ​ຊີງ​ກາງ​ຢູ່​ຕະ­ຫຼາດ​ຊື້-ຂາຍ​ບາງ​ແຫ່ງ​ເພື່ອ​ຄວາມ​ເປັນ​ເອ­ກະ​ພາບ ແລະ ເປັນ​ທຳ​ກັນ​ລະ­ຫວ່າງ​ແມ່​ຄ້າ​ຊາວ​ຂາຍ​ດ້ວຍ​ກັນ ແລະ ລະ­ຫວ່າງ​ຜູ້​ຊື້-ຜູ້​ຂາຍ​ແລ້ວ​ກໍ​ຕາມ ແຕ່​ກໍ​ຍັງ​ຄຸ້ມ​ຄອງ​ບໍ່​ໄດ້​ທົ່ວ​ເຖິງ​ເພາະ​ເຫັນ​ວ່າ​ຍັງ​ມີ​ປະ­ກົດ​ການ​ໂກງ​ຕາ​ຊີງ​ຊັ່ງ​ສິນ­ຄ້າ​ເຄື່ອງ​ຂອງ​ຈົນ​ເຮັດ​ໃຫ້​ຜູ້​ຊື້​ກໍ​ຄື​ຜູ້​ອຸ­ປະ­ໂພກ ແລະ ບໍ­ລິ­ໂພກ​ໄດ້​ສິນ­ຄ້າ​ທີ່​ມີ​ນ້ຳ­ໜັກ​ບໍ່​ເຕັມ​ຈຳ­ນວນ​ຕາມ​ເງິນ​ທີ່​ຊື້​ໄປ​ເກີດ​ມີ​ຫາງ​ສຽງ​ຈົ່ມ​ວ່າ​ຕໍ່​ຄວາມ​ບໍ່​ຊອບ​ມາ​ພາ​ກົນ​ຂອງ​ຜູ້​ຂາຍ. ດັ່ງ­ນັ້ນ​ຫວ່າງ​ມໍ່ໆມານີ້​ເຈົ້າ​ໜ້າ­ທີ່ໆ​ກ່ຽວ­ຂ້ອງ​ທຸກ​ພາກ­ສ່ວນ​ເພິ່ນ​ຈຶ່ງ​ອອກ​ມາດ​ຕະ­ການ​ປັບ​ໃໝ​ພິ­ເສດ​ທີ່​ໜັກ­ໜ່ວງ​ຂຶ້ນ​ຕື່ມ​ຄື: ຈະ​ປັບ​ໃໝ​ຂີດ​ລະ1.000.000 ກີບ​ຖ້າ​ຊາວ​ຄ້າ­ຂາຍ​ຫາກ​ຍັງ​ປອມ​ແປງ​ຕາ­ຊິງ ຫຼື ສໍ້​ໂກງ​ການ​ວັດ­ແທກ​ຊັ່ງ​ນ້ຳ­ໜັກ​ຂອງ​ສິນ­ຄ້າ​ຕໍ່​ຜູ້​ຊື້​ຖ້າ​ບໍ່​ພໍ 1 ຂີດ​ໃດ​ຈະ​ຖືກ​ປັບ​ໃໝ 1.000.000 ກີບ (ຕົວ­ຢ່າງ: ຖ້າ​ສໍ້​ໂກງ​ຊັ່ງ​ນ້ຳ­ໜັກ​ຂອງ​ສິນ­ຄ້າ​ບໍ່​ພໍ 3 ຂີດ​ກໍ​ຈະ​ຖືກ​ປັບ​ໃໝ 3.000.000 ກີບ).

ໂດຍ: ມະ­ຕິ​ຊົນ

ຂ່າວທີ່ກ່ຽວຂ້ອງ