ການ​ຄ້າ​ກັບ​ຕ່າງປະເທດ​ຂອງ​ຈີນ ມີ​ຄວາມ​ໜຽວ​ແໜ້ນ

178 19 ກ.ລ. 2019 ຂ່າວຕ່າງປະເທດ
ການ​ຄ້າ​ກັບ​ຕ່າງປະເທດ​ຂອງ​ຈີນ ມີ​ຄວາມ​ໜຽວ​ແໜ້ນ

     ວັນ​ທີ 12 ກໍລະກົດ​ທີ່​ຜ່ານ​ມາ ອົງການ​ພາສີ​ຂອງ​ຈີນ ໄດ້​ເປີດເຜີຍ​ຂໍ້​ມູນ​ການ​ຄ້າ​ຂາ​ເຂົ້າຂາ​ອອກ​ໃນ 6 ເດືອນ​ຕົ້ນ​ປີ​ນີ້ ສະແດງ​ໃຫ້​ເຫັນ​ວ່າ ຍອດ​ມູນ​ຄ່າ​ການ​ຄ້າ​ຂາ​ເຂົ້າຂາ​ອອກ​ຂອງ​ຈີນ ບັນລຸ​ເຖິງ 14670 ຕື້​ຢວນ (ສະກຸນ​ເງິນ​ຂອງ​ຈີນ) ເພີ່ມ​ຂຶ້ນ 3,9% ເມື່ອ​ທຽບໃສ່​ໄລຍະ​ດຽວ​ກັນ​ປີ​ກາຍ ຊຶ່ງ​ສະແດງ​ໃຫ້​ເຫັນ​ວ່າການ​ຄ້າ​ກັບ​ຕ່າງປະເທດ​ຂອງ​ຈີນ ມີ​ຄວາມ​ໜຽວ​ແໜ້ນ​ຫຼາຍ ໃນ​ຂະນະ​ທີ່​ເສດຖະກິດ​ຈີນ ມີ​ທ່ວງ​ທ່າ​ທີ່​ດີ ມີ​ຄວາມ​ໝັ້ນ​ທ່ຽງ​ໃນ​ໄລຍະ​ຍາວ​ນານ​ນັ້ນ​ບໍ່​ໄດ້​ປ່ຽນແປງ.

    ເມື່ອ​ເບິ່ງ​ລະອຽດ​ແລ້ວ ເຫັນ​ວ່າ ໃນ 6 ເດືອນ​ຕົ້ນ​ປີ​ນີ້ ການ​ຄ້າ​ຂາ​ເຂົ້າຂາ​ອອກ​ຂອງ​ຈີນ ມີ​ຈຸດ​ພິເສດ​ຄື​ມີ​ຄວາມ​ໝັ້ນ​ທ່ຽງ​ໂດຍ​ລວມ ກ້າວ​ໄປ​ໜ້າ​ດ້ວຍ​ຄວາມ​ໝັ້ນ​ທ່ຽງ ພັດທະນາ​ຢ່າງ​ມີ​ຄຸນ​ນະ​ພາບ​ສູງ ແລະ ເປັນ​ລະບຽບ​ຮຽບ​ຮ້ອຍ ຕົ້ນຕໍ​ສະແດງ​ອອກ​ໃນ 3 ດ້ານ ຄື ກຳລັງ​ແຮງ​ດ້ານ​ການ​ເຕີບ​ໂຕ​ຂອງ​ການ​ຄ້າ​ກັບ​ຕ່າງປະເທດ​ມີ​ຄວາມ​ແຂງແຮງ​ກວ່າ​ເກົ່າ; ຄູ່​ການ​ຄ້າ​ນັບ​ມື້​ນັບ​ຫຼາຍ​ຂຶ້ນ; ແລະ ໂຄງ​ປະກອບ​ຜະລິດ​ຕະ​ພັນ​ຂາ​ອອກ​ໄດ້​ປັບປຸງ​ດີ​ຂຶ້ນ​ກວ່າ​ເກົ່າ.

ທ່ານ ຫຼີ​ຂຸຍ​ເຫວີນ ໂຄສົກ​ອົງການ​ພາສີ​ແຫ່ງ​ຊາດ​ຈີນ ກ່າວ​ໃນ​ວັນ​ດັ່ງກ່າວ​ວ່າ ໃນ 6 ເດືອນ​ຕົ້ນ​ປີ​ນີ້ ການ​ນຳ​ເຂົ້າ​ແລະ ສົ່ງ​ອອກ​ຂອງ​ຈີນ ມີ​ຄວາມ​ໝັ້ນ​ທ່ຽງ​ໂດຍ​ລວມ ທັງ​ມີ​ການ​ພັດທະນາ ການ​ພັດທະນາ​ການ​ຄ້າ​ຕ່າງປະເທດ ໃຫ້​ມີ​ຄຸນ​ນະ​ພາບ​ສູງ ກໍ​ມີ​ຄວາມ​ຄືບ​ໜ້າ​ຢ່າງ​ຮຽບ​ຮ້ອຍ​ດີ. ເຖິງ​ວ່າ​ສະພາບ​ແວດ​ລ້ອມ​ພາຍ​ນອກ​ໃນ​ປັດຈຸບັນ ໄດ້​ມີ​ການ​ຜັນ​ແປ​ຢ່າງ​ສັບສົນ​ແລະ ຂ້ຽວຂາດ ທັງ​ສົ່ງ​ຜົນ​ເຮັດ​ໃຫ້ການ​ພັດທະນາ​ການ​ຄ້າ​ຕ່າງປະເທດ​ຂອງ​ຈີນ ຜະເຊີນ​ກັບ​ສິ່ງ​ທ້າ​ທາຍ​ຕ່າງໆ​ນາໆ​ກໍ​ຕາມ ແຕ່​ພື້ນຖານ​ການ​ພັດທະນາ​ການ​ຄ້າ​ຕ່າງປະເທດ​ຂອງ​ຈີນ ໃນ​ໄລຍະ​ຍາວ​ບໍ່​ມີ​ການ​ປ່ຽນແປງ​ແຕ່​ປະການ​ໃດ ທ່າ​ອ່ຽງ​ແຫ່ງ​ການ​ປັບປຸງ​ໂຄງ​ປະກອບ​ການ​ຄ້າ​ຕ່າງປະເທດ ແລະ  ການ​ຫັນປ່ຽນ​ຮູບ​ແບບ​ໃໝ່​ເຂົ້າ​ແທນ​ທີ່​ຮູບ​ແບບ​ດັ້ງເດີມ ເລັ່ງ​ລັດ​ໃຫ້​ໄວ​ຂຶ້ນ​ນັ້ນ​ກໍ​ບໍ່​ມີ​ການ​ປ່ຽນແປງ​ເຊັ່ນ​ກັນ.

ຂ່າວທີ່ກ່ຽວຂ້ອງ