ຂ່າວຫຼ້າສຸດ

ມີ​ຜູ້​ຕິດພະຍາດ​ໄຂ້ເລືອດອອກ​ເພີ່ມ​ຂຶ້ນ​ອີກ ຢູ່​ໃນ​ສິງກະໂປ

216 19 ກ.ລ. 2019 ຂ່າວຕ່າງປະເທດ
ມີ​ຜູ້​ຕິດພະຍາດ​ໄຂ້ເລືອດອອກ​ເພີ່ມ​ຂຶ້ນ​ອີກ ຢູ່​ໃນ​ສິງກະໂປ

   ອົງການ​ສິ່ງແວດລ້ອມ​ແຫ່ງ​ຊາດ​ສິງກະໂປ (NEA) ແຈ້ງ​ໃຫ້​ຮູ້ເມື່ອ​ວັນ​ທີ 16 ກໍລະກົດ​ນີ້​ວ່າ ໃນ​ອາທິດ​ທີ່​ຜ່ານ​ມາ ໄດ້​ບັນທຶກ​ຜູ້​ເປັນ​ພະຍາດ​ໄຂ້ເລືອດອອກ 666 ຄົນ ນັບ​ວ່າ​ເປັນ​ຕົວ​ເລກ​ທີ່​ເພີ່ມ​ຂຶ້ນ 73 ຄົນ ເມື່ອ​ທຽບໃສ່​ອາທິດ​ກ່ອນ​ໜ້າ​ນັ້ນ ແລະ ນີ້​ກໍ​ເປັນ​ປະລິມານ​ຜູ້​ເປັນ​ໄຂ້ເລືອດອອກ​ສູງ​ສຸດ​ເມື່ອ​ໄລ່​ຕາມ​ອາທິດ ພາຍ​ໃນ 3 ປີ​ທີ່​ຜ່ານ​ມາ.

    ໄລ່​ແຕ່​ຕົ້ນ​ປີ​ນີ້ ມາ​ຮອດ​ວັນ​ທີ 13 ກໍລະກົດ​ທີ່​ຜ່ານ​ມາ ຍອດ​ຈຳນວນ​ຜູ້​ເປັນ​ພະຍາດ​ໄຂ້ເລືອດອອກ​ຢູ່​ໃນ​ສິງກະໂປ ຢູ່​ທີ່ 7.374 ຄົນ ສູງ​ທົບ 5 ເທົ່າ​ຕົວ ເມື່ອ​ທຽບໃສ່​ຕົວ​ເລກ​ຜູ້​ຕິດພະຍາດ​ດັ່ງກ່າວ 1.481 ຄົນ ທີ່​ບັນທຶກ​ໄວ້​ໃນ​ໄລຍະ​ເວລາ​ດຽວ​ກັນ​ຂອງ​ກາຍ. ສະເພາະ​ແຕ່​ໄລຍະ​ວັນ​ທີ 14 ກໍລະກົດ ຮອດ​ຕອນ​ບ່າຍ​ວັນ​ທີ 15 ກໍລະກົດ​ນີ້ NEA ໄດ້​ຮັບ​ຮູ້​ຜູ້​ຕິດພະຍາດ​ດັ່ງກ່າວ​ເປັນ​ລາຍ​ໃໝ່ 109 ກໍລະນີ. ຈຸດ​ທີ່​ລະບາດ​ພະຍາດ​ໄຂ້ເລືອດອອກ​ໃຫຍ່​ສຸດ​ໃນ​ສິງກະໂປ ກໍ​ແມ່ນ​ກຳນົດ​ໄດ້​ຢູ່​ໃນ​ເຂດ Woodlands ໂດຍ​ມີ​ຜູ້​ຕິດພະຍາດ 216 ລາຍ.

    NEA ໄດ້​ຮຽກຮ້ອງ​ໄປ​ຍັງ​ປະຊາຊົນ​ທຸກໆ​ຄົນ ຕະຫຼອດ​ຮອດ​ບັນດາ​ວິ​ສາ​ຫະ​ກິດ ແລະ ອົງ​ການຈັດຕັ້ງ ໃຫ້​ມີ​ການ​ດຳເນີນ​ການ​ຢ່າງ​ຂ້ຽວຂາດ ເພື່ອ​ກຳຈັດ​ຍຸງ (ຍຸງ​ລາຍ) ທີ່​ເປັນ​ພາຫະນະ​ນຳ​ເຊື້ອ​ພະຍາດ​ໄຂ້ເລືອດອອກ ໂດຍ​ສະກັດ​ກັ້ນ​ການ​ແພ່​ພັນ​ຂອງ​ພວກ​ມັນ ກໍ​ຄື​ການ​ຜັນ​ຂະຫຍາຍ​ບັນດາ​ມາດ​ຕະການ ໃນ​ການ​ເຮັດອະນາໄມ​ຢູ່​ໃນ​ບ່ອນຢູ່​ອາ​ໃສ ແລະ ສະຖານທີ່​ເຮັດ​ວຽກ.

ຂ່າວທີ່ກ່ຽວຂ້ອງ