ຂ່າວຫຼ້າສຸດ

ອິນ​ເດຍ-ຣັດ​ເຊຍ ບັນລຸ​ຂໍ້​ຕົກລົງ​ກ່ຽວ​ກັບ​ຮູບ​ການ​ຊຳລະ​ສັນຍາ​ດ້ານ​ອາວຸດ

163 19 ກ.ລ. 2019 ຂ່າວຕ່າງປະເທດ
ອິນ​ເດຍ-ຣັດ​ເຊຍ ບັນລຸ​ຂໍ້​ຕົກລົງ​ກ່ຽວ​ກັບ​ຮູບ​ການ​ຊຳລະ​ສັນຍາ​ດ້ານ​ອາວຸດ

     ວັນ​ທີ 16 ກໍລະກົດ​ນີ້ ອິນ​ເດຍ ແລະ ຣັດ​ເຊຍ ໄດ້​ບັນລຸ​ຄວາມ​ເຫັນ​ພ້ອມ​ນຳ​ກັນ ກ່ຽວ​ກັບ​ຮູບ​ການ​ຊຳລະ​ແບບ​ໃໝ່ ໃຫ້​ແກ່​ບັນດາ​ສັນຍາ​ຊື້​ຂາຍ​ອາວຸດ​ທີ່​ມີ​ມູນ​ຄ່າ​ຫຼາຍ ຊຶ່ງ​ຕາມ​ນັ້ນແລ້ວ ບັນດາ​ສັນຍາ​ດ້ານ​ປ້ອງ​ກັນ​ຊາດ​ລະຫວ່າງ​ສອງ​ປະເທດ ຈະ​ໄດ້​ຊຳລະ​ດ້ວຍ​ເງິນ​ຣຸບ ຂອງ​ຣັດ​ເຊຍ ຫຼື​ເງິນ ຣູ​ປີ ຂອງ​ອິນ​ເດຍ ໂດຍ​ຜ່ານ​ການ​ຕົກລົງ ຊຶ່ງ​ທະນາຄານ​ກາງຂອງ​ສອງ​ປະເທດ ໄດ້​ຮັບຮອງ. ດັ່ງນັ້ນ ສອງ​ຝ່າຍ​ຈະ​ບໍ່​ຂຶ້ນ​ກັບ​ເງິນ​ໂດ​ລາ​ສະຫະລັດ ໃນ​ເວລາ​ທີ່​ປະຕິບັດ​ການ​ຊຳລະ​ສັນຍາ​ການ​ຊື້​ຂາຍ​ອາວຸດ.

     ຂໍ້​ຕົກລົງ​ດັ່ງກ່າວ ຈະ​ອະນຸຍາດ​ໃຫ້​ອິນ​ເດຍ ຊຳລະ​ງວດ​ທຳ​ອິດ ໃຫ້​ແກ່​ກຳປັ່ນ​ສູ້​ຮົບ 2 ລຳ ຊຶ່ງ​ຣັດ​ເຊຍ​ພວມ​ປະກອບ​ໃຫ້​ແກ່​ກອງທັບ​ເຮືອ​ອິນ​ເດຍ. ໃນ​ຂະນະ​ດຽວ​ກັນ ຣັດ​ເຊຍ​ກໍ​ຫວັງ​ວ່າ ຈະ​ໄດ້​ຮັບ​ບ້ວງ​ຊຳລະ​ລ່ວງ​ໜ້າ​ຈາກ​ອິນ​ເດຍ ສຳລັບ​ລະບົບ​ລູກ​ສອນ​ໄຟ​ປ້ອງ​ກັນ​ອາກາດ S-400 ໃນ​ເວລາ​ກ່ອນ​ທ້າຍ​ປີ 2019 ເພື່ອ​ວ່າການ​ສົ່ງ​ມອບ​ສິນຄ້າ ສາມາດ​ເລີ່ມ​ຂຶ້ນ​ໃນ​ປີ 2020 ແລະ ສຳເລັດ​ໃນ​ປີ 2025.

    ເມື່ອ​ຕົ້ນ​ເດືອນ​ຕຸລາ ປີ 2018 ຣັດ​ເຊຍ ແລະ ອິນ​ເດຍ ໄດ້​ລົງ​ນາມ​ສັນຍາ​ກ່ຽວ​ກັບ​ການ​ທີ່​ຣັດ​ເຊຍ​ສະໜອງ​ກຸ່ມ​ລູກ​ສອນ​ໄຟ S-400 ມູນ​ຄ່າ 5,43 ຕື້​ໂດ​ລາ​ສະຫະລັດ ໃຫ້​ແກ່​ອິນ​ເດຍ. ນອກຈາກ S-400 ແລ້ວ ອິນ​ເດຍ ແລະ ຣັດ​ເຊຍ ກໍ​ໄດ້​ລົງ​ນາມ​ຂໍ້​ຕົກລົງ ກ່ຽວ​ກັບ​ການ​ຮ່ວມ​ມື​ຜະລິດ​ເຮືອບິນ​ເອ​ລີ ກອບ​ແຕ Kamov Ka-226T ເປັນ​ມູນ​ຄ່າ 1 ຕື້​ໂດ​ລາ​ສະຫະລັດ ລວມ​ເຖິງ​ກຳປັ່ນ​ສູ້​ຮົບ​ຂອງ​ກອງທັບ​ເຮືອ 4 ລຳ ແລະ ປືນ  Kalashnikov AK-203 ຈຳນວນ 750.000 ກະບອກ.

ຂ່າວທີ່ກ່ຽວຂ້ອງ