ຂ່າວຫຼ້າສຸດ

FAO ປະກາດ​ບົດ​ລາຍ​ງານ​ຄວາມ​ສະຫງົບ​ທາງ​ດ້ານ​ສະບຽງ​ອາຫານ ແລະ ໂພ​ສະ​ນາ​ການ​ປີ 2019

158 19 ກ.ລ. 2019 ຂ່າວຕ່າງປະເທດ
FAO ປະກາດ​ບົດ​ລາຍ​ງານ​ຄວາມ​ສະຫງົບ​ທາງ​ດ້ານ​ສະບຽງ​ອາຫານ ແລະ ໂພ​ສະ​ນາ​ການ​ປີ 2019

 

     ບົດ​ລາຍ​ງານ​ກ່ຽວ​ກັບ​ຄວາມ​ສະຫງົບ​ທາງ​ດ້ານ​ສະບຽງ​ອາຫານ ແລະ ໂພ​ສະ​ນາ​ການ​ຂອງ​ໂລກ ປີ 2019 ໂດຍ​ແມ່ນ​ອົງການ​ອາຫານ ແລະ ກະສິກຳ ຂອງ​ສະຫະ​ປະຊາ​ຊາດ (FAO) ນຳ​ອອກ​ມາ​ເປີດເຜີຍ​ເມື່ອ​ວັນ​ທີ 15 ກໍລະກົດ​ນີ້ ລະບຸ​ວ່າ ມີ​ເກືອບ​ເຄິ່ງ​ໜຶ່ງ​ຂອງ​ຈຳນວນ​ປະຊາກອນ ​ສປປ ເກົາຫຼີ ຂາດແຄນ​ອາຫານ​ການ​ກິນ.

    ບົດ​ລາຍ​ງານ​ດັ່ງກ່າວ ໃຫ້​ຮູ້​ວ່າ ໃນ​ໄລຍະ​ແຕ່​ປີ 2016-2018 ມີ​ປະຊາກອນ​ໃນ ​ສປປ ເກົາຫຼີ  47,8% ຕົກ​ຢູ່​ໃນ​ສະພາບ​ຂາດແຄນ​ອາຫານ​ການ​ກິນ​ເປັນ​ປະຈຳ ຊຶ່ງ​ນັບ​ວ່າ​ສູງ​ກວ່າ​ຫຼາຍ ເມື່ອ​ທຽບໃສ່​ສະພາບ​ການ​ດຽວ​ກັນ ທີ່​ລະດັບ 35,4% ໃນ​ໄລຍະ​ປີ 2004-2006 ແລະ  43,4% ໃນ​ໄລຍະ​ປີ  2015-2017.

    ເຖິງ​ຢ່າງໃດ​ກໍ​ຕາມ ໃນ​ໂລກ​ຍັງ​ມີ​ອີກ 3 ປະເທດ ທີ່​ມີ​ອັດຕາ​ສ່ວນ​ຂາດແຄນ​ອາຫານ​ການ​ກິນ ສູງ​ກວ່າ ​ສປປ ເກົາຫຼີ ນັ້ນ​ກໍ​ຄື ສາທາລະນະ​ລັດ ອາ​ຟະ​ຣິກ​ກາ​ກາງ ຊິມ​ບັບ​ເວ ແລະ ໄຮ​ຕີ.

    ໃນ​ບົດ​ລາຍ​ງານ​ໜຶ່ງ​ອີກ​ຕ່າງຫາກ ທີ່​ໄດ້​ນຳ​ອອກ​ມາ​ເປີດເຜີຍ​ເມື່ອ​ຕົ້ນ​ເດືອນ​ລະ​ກົດ​ນີ້  FAO ແລະ ໂຄງການ​ສະບຽງ​ອາຫານ​ໂລກ (WFP) ໃຫ້​ຮູ້​ວ່າ ປະລິມານ​ການ​ຜະລິດ​ສະບຽງ​ອາຫານ​ຂອງ ​ສປປ ເກົາຫຼີ ໃນ​ປີ​ກາຍ ໄດ້​ຕົກລົງ​ສູ່​ລະດັບ​ຕ່ຳ​ສຸດ ນັບ​ແຕ່​ປີ 2008 ເປັນຕົ້ນ​ມາ ເຮັດ​ໃຫ້​ປະຊາຊົນ​ໃນ​ປະເທດ​ນີ້​ປະມານ 10 ລ້ານ​ຄົນ (ເທົ່າ​ກັບ 40% ຂອງ​ຈຳນວນ​ປະຊາກອນ) ຕ້ອງການ​ຄວາມ​ຊ່ວຍເຫຼືອ​ສະບຽງ​ອາຫານ​ເປັນ​ການ​ສຸກ​ເສີນ.

    ເຖິງ​ຢ່າງໃດ​ກໍ​ຕາມ ໃນ​ສະພາບ​ການ​ທີ່​ຂາດແຄນ​ສະບຽງ​ອາຫານ​ຢູ່​ນັ້ນ ບົດ​ລາຍ​ງານ​ດັ່ງກ່າວ​ພັດ​ໃຫ້​ຮູ້​ວ່າ ​ສປປ ເກົາຫຼີ ຍາດ​ໄດ້​ໝາກຜົນ​ຈຳນວນ​ໜຶ່ງ ໃນ​ການ​ຫຼຸດ​ອັດຕາ​ສ່ວນ​ຂາດ​ໂພ​ສະ​ນາ​ການ ຢູ່​ໃນ​ໝູ່​ເດັກນ້ອຍ ໂດຍ​ລະບຸ​ວ່າ ອັດຕາ​ສ່ວນ​ຂາດ​ໂພ​ສະ​ນາ​ການ ຢູ່​ໃນ​ໝູ່​ເດັກນ້ອຍ​ໃນ ​ສປປ ເກົາຫຼີ ໃນ​ໄວ​ຕ່ຳ​ກວ່າ 5 ປີ ໄດ້​ຫຼຸດ​ລົງ​ຈາກ 27,9% ໃນ​ປີ 2012 ມາ​ຢູ່​ທີ່ 19,1% ໃນ​ປີ 2018.

ຂ່າວທີ່ກ່ຽວຂ້ອງ