ເກີດ​ອຸບັດເຫດ​ອາຄານ​ພັງ​ຖະ​ຫຼົ່ມ​ຢູ່​ໃນ​ອິນ​ເດຍ ແລະ ນີ​ເຊຣີ

142 19 ກ.ລ. 2019 ຂ່າວຕ່າງປະເທດ
ເກີດ​ອຸບັດເຫດ​ອາຄານ​ພັງ​ຖະ​ຫຼົ່ມ​ຢູ່​ໃນ​ອິນ​ເດຍ ແລະ ນີ​ເຊຣີ

   ອົງການ​ຄຸ້ມ​ຄອງ​ໄພພິບັດ ຂອງ​ສະພາ​ນະຄອນ​ມູມ​ບາຍ (ອິນ​ເດຍ) ໃຫ້​ຮູ້​ວ່າ ມີ​ຜູ້​ເສຍ​ຊີວິດ 4 ຄົນ ແລະ ຍັງ​ມີ​ຜູ້​ຖືກ​ຕິດ​ຄ້າງ​ອີກ 12 ຄົນ ຢູ່​ໃນ​ຊາກ​ຫັກ​ພັງ​ຂອງ​ອາຄານ​ສູງ 4 ຊັ້ນ​ຫຼັງ​ໜຶ່ງ ທີ່​ໄດ້​ພັງ​ຖະ​ຫຼົ່ມ​ລົງ​ມາ​ເມື່ອ​ວັນ​ທີ 16 ກໍລະກົດ​ນີ້ ຢູ່​ໃນ​ພື້ນ​ທີ່​ນະຄອນ​ມູມ​ບາຍ ຂອງ​ອິນ​ເດຍ.

    ປະຊາຊົນ​ໃນ​ທ້ອງຖິ່ນ ກ່າວ​ຜ່ານ​ໂທລະພາບ NDTV (ຂອງ​ອິນ​ເດຍ) ວ່າ​ອາຄານ​ທີ່​ພັງ​ຖະ​ຫຼົ່ມ​ລົງ​ມາ​ນັ້ນ ຄ້າຍ​ກັບ​ວ່າ​ເກີດ​ເຫດການ​ແຜ່ນດິນ​ໄຫວ ຫຼັງ​ຈາກ​ທີ່​ມີ​ສຽງ​ດັງ​ຢ່າງ​ແຮງ​ອອກ​ມາ. ໃນ​ຂະນະ​ດຽວ​ກັນ ຜູ້​ເຫັນ​ເຫດການ​ເລົ່າ​ວ່າ ອາຄານ​ທີ່​ພັງ​ຖະ​ຫຼົ່ມ​ດັ່ງກ່າວ ມີ​ອາຍຸ​ກວ່າ​ໜຶ່ງ​ສະຕະວັດ ຊຶ່ງ​ມີ​ສະພາບ​ຊຸດໂຊມ ແລະ ໃນ​ເວລາ​ທີ່​ເກີດ​ເຫດ ມີ 10 ຄອບຄົວ​ອາ​ໃສ​ຢູ່​ໃນ​ອາຄານ​ຫຼັງ​ນັ້ນ.

    ໃນ​ຂະນະ​ດຽວ​ກັນ ເຈົ້າ​ໜ້າທີ່​ຂອງ​ນີ​ເຊຣີ ແຈ້ງ​ໃຫ້​ຮູ້ເມື່ອ​ວັນ​ທີ 16 ກໍລະກົດ​ນີ້​ວ່າ ອາຄານ 3 ຊັ້ນ​ຫຼັງ​ໜຶ່ງ ຢູ່​ໃນ​ນະຄອນ ​ຈົສ (ພາກ​ກາງ​ນີ​ເຊຣີ) ໄດ້​ເກີດ​ພັງ​ຖະ​ຫຼົ່ມ​ລົງ ຫຼັງ​ຈາກ​ທີ່​ເກີດ​ຝົນຕົກ​ໜັກ ສົ່ງ​ຜົນ​ໃຫ້​ມີ​ຜູ້​ເສບ​ຊີວິດ 13 ຄົນ ແລະ ມີ​ຜູ້​ເອົາ​ຊີວິດ​ລອດ​ອອກ​ມາ​ໄດ້ 7 ຄົນ.

ຂ່າວທີ່ກ່ຽວຂ້ອງ