ຂ່າວຫຼ້າສຸດ

ອະດີດ​ປະທານາທິບໍດີ​ເປ​ຣູ ຖືກ​ຈັບ​ກຸມ​ຢູ່​ໃນ ສ ອາ​ເມ​ຣິ​ກາ

142 19 ກ.ລ. 2019 ຂ່າວຕ່າງປະເທດ
ອະດີດ​ປະທານາທິບໍດີ​ເປ​ຣູ ຖືກ​ຈັບ​ກຸມ​ຢູ່​ໃນ ສ ອາ​ເມ​ຣິ​ກາ

   ອົງການ​ໄອ​ຍະ​ການ​ຂອງ​ເປ​ຣູ ແຈ້ງ​ໃຫ້​ຮູ້ເມື່ອ​ວັນ​ທີ 16 ກໍລະກົດ​ນີ້​ວ່າ ທ່ານ ອາ​ເລ​ຈານ​ໂດຣ ໂຕ​ເລ​ໂດ ອະດີດ​ປະທານາທິບໍດີ​ເປ​ຣູ ໄດ້​ຖືກ​ຈັບ​ກຸມ​ຢູ່​ໃນ ສ ອາ​ເມ​ຣິ​ກາ ຕາມ​ການ​ສະເໜີ​ສົ່ງ​ຕົວ​ຜູ້​ຮ້າຍ​ຂ້າມ​ແດນ ຂອງ​ອົງການ​ທີ່​ກ່ຽວຂ້ອງ​ຂອງ​ເປ​ຣູ ເພື່ອ​ດຳເນີນ​ການ​ສືບສວນ​ສອບ​ສວນ ກ່ຽວ​ກັບ​ການ​ກ່າວ​ຫາ​ສໍ້​ລາດ​ບັງ​ຫຼວງ ໃນ​ໄລຍະ​ທີ່​ເຂົາ​ຢູ່​ໃນ​ຕຳແໜ່ງ​ປະທານາທິບໍດີ​ເປ​ຣູ (2001-2006).

     ແຈ້ງ​ການ​ຂອງ​ອົງການ​ທີ່​ກ່ຽວຂ້ອງ​ຂອງ​ເປ​ຣູ ໃຫ້​ຮູ້​ວ່າ ການ​ຈັບ​ກຸມ​ທ່ານ ໂຕ​ເລ​ໂດ ໄດ້​ຮັບ​ການ​ປະຕິບັດ​ຢ່າງ​ຖືກຕ້ອງ​ຕາມ​ຈິດໃຈ​ຂອງ​ສັນຍາ​ວ່າ​ດ້ວຍ​ການ​ສົ່ງ​ຕົວ​ຜູ້​ຮ້າຍ​ຂ້າມ​ແດນ  ທີ່​ໄດ້​ຮັບ​ການ​ລົງ​ນາມ​ລະຫວ່າງ​ເປ​ຣູ ກັບ ສ ອາ​ເມ​ຣິ​ກາ. ໃນ​ໄລຍະ​ປະກອບ​ເອກະສານ​ໃຫ້​ສຳເລັດ ເພື່ອ​ສົ່ງ​ຕົວ​ກັບ​ຄືນ​ປະເທດ​ນັ້ນ ທ່ານ ໂຕ​ເລ​ໂດ ຈະ​ຖືກ​ກັກ​ຂັງ​ເປັນ​ການ​ຊົ່ວຄາວ ພາຍ​ໃຕ້​ການ​ຕິດຕາມ​ກວດກາ​ຂອງ​ອົງການ​ຍຸຕິ​ທຳ​ຂອງ ສ ອາ​ເມ​ຣິ​ກາ.

     ອະດີດ​ປະທານາທິບໍດີ ໂຕ​ເລ​ໂດ ຖືກ​ສືບສວນ​ສອບ​ສວນ​ຈາກ​ອົງການ​ທີ່​ກ່ຽວຂ້ອງ​ໃນ​ເປ​ຣູ ຍ້ອນ​ວ່າ​ມີ​ການ​ພົວພັນ​ກັບ​ການເຄື່ອນໄຫວ​ສໍ້​ລາດ​ບັງ​ຫຼວງ ຂອງ​ກຸ່ມ​ບໍລິສັດ​ກໍ່ສ້າງ ໂອ​ເດບ​ເຣັກ (Odebrecht) ຂອງ​ບຣາ​ຊີ​​ລ. ຜູ້​ທີ່​ຮູ້​ເຫັນ​ຢູ່​ໃນ​ເຫດການ ໃຫ້​ສາລະພາບ​ວ່າ ທ່ານ ໂຕ​ເລ​ໂດ ໄດ້​ຮັບ​ເງິນ 20 ລ້ານ​ໂດ​ລາ​ສະຫະລັດ ຈາກ​ກຸ່ມ​ບໍລິສັດ​ດັ່ງກ່າວ ເພື່ອ​ອຳນວຍ​ຄວາມ​ສະດວກ ໃຫ້​ແກ່​ການ​ຊະນະ​ການ​ປະມູນ​ບັນດາ​ໂຄງການ​ສາທາລະນະ​ຢູ່​ໃນ​ເປ​ຣູ. ທາງ​ດ້ານ​ທ່ານ ໂຕ​ເລ​ໂດ ໄດ້​ປະຕິເສດ​ຕໍ່​ການ​ກ່າວ​ຫາ​ນັ້ນ ພ້ອມ​ທັງ​ເວົ້າ​ວ່າ ນີ້​ເປັນ​ກົນອຸບາຍ​ຂອງ​ບັນດາ​ຄູ່​ແຂ່ງ​ທາງ​ດ້ານ​ການເມືອງ.

ຂ່າວທີ່ກ່ຽວຂ້ອງ