ຂ່າວຫຼ້າສຸດ

ປະຊາກອນ​ໃນ​ອາ​ເມ​ຣິ​ກາ ລາ​ຕິນ ຈະ​ບັນລຸ​ລະດັບ​ສູງ​ສຸດ​ພາຍ​ໃນ​ກາງ​ສະຕະວັດ 21

121 19 ກ.ລ. 2019 ຂ່າວຕ່າງປະເທດ
ປະຊາກອນ​ໃນ​ອາ​ເມ​ຣິ​ກາ ລາ​ຕິນ ຈະ​ບັນລຸ​ລະດັບ​ສູງ​ສຸດ​ພາຍ​ໃນ​ກາງ​ສະຕະວັດ 21

   ຄະນະ​ກຳມະການ​ເສດຖະກິດ ອາ​ເມ​ຣິ​ກາ ລາ​ຕິນ ແລະ  ກາ​ຣາ​ອິບ ຂອງ​ອົງການ​ສະຫະ​ປະຊາ​ຊາດ (Cepal) ມີ​ບົດ​ລາຍ​ງານ​ອອກ​ມາ​ເປີດເຜີຍ​ເມື່ອ​ວັນ​ທີ 13 ກໍລະກົດ​ນີ້ ໂດຍ​ລະບຸ​ວ່າ ປະຊາກອນ​ຢູ່​ໃນ​ພາກ​ພື້ນ​ດັ່ງກ່າວ ຈະ​ບັນລຸ​ລະດັບ​ສຸດ​ຍອດ ພາຍ​ໃນ​ປີ 2058 ໂດຍ​ມີ 767 ລ້ານ​ຄົນ ກ່ອນ​ທີ່​ຈະ​ເລີ່ມ​ສູ່​ທ່າ​ອ່ຽງ​ຄ່ອຍໆ​ຫຼຸດ​ລົງ​ພາຍ​ໃນ​ປີ​ຖັດ​ໄປ.

    ບົດ​ລາຍ​ງານ​ຂອງ Cepal ໃຫ້​ຮູ້​ວ່າ ການ​ຄາດ​ຄະເນ​ດັ່ງກ່າວ ຖືກ​ນຳ​ອອກ​ມາ ຫຼັງ​ຈາກ​ທີ່​ໄດ້​ວິໄຈ​ເຖິງ​ທ່າ​ອ່ຽງ​ການ​ຜັນ​ແປ​ໄປ​ຂອງ​ພົນລະເມືອງ ຢູ່​ໃນ​ເຂດ ອາ​ເມ​ຣິ​ກາ ລາ​ຕິນ ໃນ​ໄລຍະ​ປີ 2015-2020 ໂດຍ​ທີ່​ຈັງຫວະ​ຄວາມ​ເຕີບ​ໂຕ​ຂອງ​ປະຊາກອນ ນັບ​ມື້​ນັບ​ຕ່ຳ​ກວ່າ ເມື່ອ​ທຽບໃສ່​ອັດຕາ​ການ​ເກີດ​ຫຼຸດ​ລົງ ແລະ ຂາດ​ດຸນ ຢູ່​ໃນ​ການ​ຜັນ​ຜວນ​ຂອງ​ຜູ້​ຍ້າຍ​ຖິ່ນ​ຖານ​ອອກ ແລະ ເຂົ້າ​ພາກ​ພື້ນ.

    ການ​ຄາດ​ຄະເນ​ດັ່ງກ່າວ ເປັນ​ການ​ແຕກ​ຕ່າງ​ກັບ​ທ່າ​ອ່ຽງ​ລວມ​ຂອງ​ໂລກ ຊຶ່ງ​ຕາມ​ນັ້ນແລ້ວ ຍອດ​ຈຳນວນ​ປະຊາກອນ​ໃນ​ທົ່ວ​ໂລກ ຈະ​ຍັງ​ບໍ່​ທັນ​ບັນລຸ​ຈຸດ​ສຸດ​ຍອດ ພາຍ​ໃນ​ເວລາ 80 ປີ​ຕໍ່ໜ້າ.

ບົດ​ລາຍ​ງານ​ດັ່ງກ່າວ ໃຫ້​ຮູ້​ວ່າ ຈັງຫວະ​ຄວາມ​ເຕີບ​ໂຕ​ປະຊາກອນ ຢູ່​ໃນ​ອາ​ເມ​ຣິ​ກາ ລາ​ຕິນ  ໄດ້​ເພີ່ມ​ຂຶ້ນ​ຈາກ​ລະດັບ​ໂດຍ​ສະເລ່ຍ 4,8 ລ້ານ​ຄົນ/ປີ ໃນ​ໄລຍະ​ປີ 1950-1955 ຂຶ້ນ​ສູ່​ລະດັບ  8,2 ລ້ານ​ຄົນ/ປີ ໃນ​ໄລຍະ​ປີ 1985-1990 ແຕ່​ວ່າ ນັບ​ແຕ່​ເວລາ​ນັ້ນ​ເປັນຕົ້ນ​ມາ ລະດັບ​ເພີ່ມ​ຂຶ້ນ​ດັ່ງກ່າວ​ນີ້ ໄດ້​ຄ່ອຍໆ​ຫຼຼຸ​​ຸ​ດລົງ​ສູ່​ລະດັບ​ປະມານ 6 ລ້ານ​ຄົນ/ປີ ພາຍ​ໃນ​ໄລຍະ 5 ປີ​ໃນ​ປັດຈຸບັນ.

    ໃນ​ຂະນະ​ດຽວ​ກັນ ອາຍຸ​ຍືນ​ສະເລ່ຍ​ຂອງ​ພາກ​ພື້ນ​ດັ່ງກ່າວ ຢູ່​ທີ່​ລະດັບ 75 ກວ່າ​ປີ ໃນ​ຂະນະ​ທີ່​ອັດຕາ​ສ່ວນ​ການ​ເກີດ​ໃນ​ປັດຈຸບັນ ຢູ່​ທີ່​ລະດັບ​ເດັກນ້ອຍ 2,04 ຄົນ​ຕໍ່​ແມ່ຍິງ 1 ຄົນ ຊຶ່ງ​ນັບ​ວ່າ​ເປັນ​ເທື່ອ​ທຳ​ອິດ​ທີ່​ຫຼຸດ​ລົງ​ຕ່ຳ​ກວ່າ​ລະດັບ​ເດັກນ້ອຍ 2,1 ຄົນ​ຕໍ່​ແມ່ຍິງ 1 ຄົນ. ບົດ​ລາຍ​ງານ​ຂອງ  Cepal ໃຫ້ການ​ຄາດ​ຄະເນ​ວ່າ ອັດຕາ​ສ່ວນ​ການ​ເກີດ​ຢູ່​ໃນ ອາ​ເມ​ຣິ​ກາ ລາ​ຕິນ ຍັງ​ຈະ​ຫຼຸດ​ລົງ​ສູ່​ລະດັບ​ເດັກນ້ອຍ 1,72 ຄົນ​ຕໍ່​ແມ່ຍິງ 1 ຄົນ ໃນ​ໄລຍະ​ປີ 2070-2075.

ຂ່າວທີ່ກ່ຽວຂ້ອງ