ຂ່າວຫຼ້າສຸດ

ເບິ່ງບ້ານເຂົາເອົາບົດຮຽນ 18-07-2019

218 18 ກ.ລ. 2019 ຫົວຂໍ້ຂ່າວອື່ນໆ

    ຄໍ​ລຳ​ສຳ­ລັບ​ມື້­ນີ້ ປະ­ກອບ​ດ້ວຍ​ຂ່າວ​ທາງ​ການ​ມາ​ເລ​ເຊຍ ມີ​ແຜນ​ປັບ­ປຸງ​ກົດ­ໝາຍ​ອາ­ຍາ ແລະ ເລື່ອງ​ການ​ຕັດ­ສິນ​ຄະ­ດີ​ລວນ​ລາມ​ທາງ​ເພດ​ຢູ່ ສ ເກົາ­ຫຼີ.

    ທີ່ ມາ​ເລ​ເຊຍ: ຂ່າວ​ຕ່າງ­ປະ­ເທດ ໃນ​ຕົ້ນ​ເດືອນ​ກໍ­ລະ­ກົດ​ປີ​ນີ້ ໃຫ້​ຮູ້​ວ່າ: ລັດ­ຖະ­ບານ​ປະ­ເທດ​ມາ​ເລ​ເຊຍ ໄດ້​ວາງ​ແຜນ​ປັບ­ປຸງ​ກົດ­ໝາຍ​ອາ­ຍາ ໂດຍ​ຈະ​ຍົກ­ເລີກ​ໂທດ​ທາງ​ອາ­ຍາ​ສຳ­ລັບ​ການ​ເດີນ​ປະ​ທ້ວງ​ຕາມ​ຖະ­ໜົນ ກົດ­ໝາຍ​ອາ­ຍາ​ໃນ​ປັດ­ຈຸ­ບັນ ໄດ້​ກຳ­ນົດ​ຄວາມ​ຜິດ​ຂອງ​ຜູ້​ເຮັດ​ການ​ປະ​ທ້ວງ​ເປັນ​ໂທດ​ທາງ​ອາ­ຍາ.

    ທ່ານ ມູ​ຮິ​ດິນ ຢາ​ຊິນ (Muhyiddin Yassin) ລັດ­ຖະ­ມົນ­ຕີ​ກະ­ຊວງ​ພາຍ​ໃນ​ມາ​ເລ​ເຊຍ ບອກ​ວ່າ: ເຫດ­ຜົນ​ທີ່​ຈະ​ມີ​ການ​ຍົກ­ເລີກ​ໂທດ​ທາງ​ອາ­ຍາ ສຳ­ລັບ​ຄວາມ​ຜິດ​ຍ້ອນ​ການ​ເດີນ​ປະ​ທ້ວງ​ນັ້ນ ແມ່ນ​ຍ້ອນ​ວ່າ​ມາ​ເລ​ເຊຍ​ມີ​ກົດ­ໝາຍ​ອື່ນໆ​ຫຼາຍ​ສະ­ບັບ​ແລ້ວ ທີ່​ເຮັດ​ໜ້າ­ທີ່​ປົກ​ປ້ອງ​ຄວາມ​ໝັ້ນ­ຄົງ​ຂອງ​ປະ­ເທດ ໃນ​ປີ 2012 ມາ​ເລ​ເຊຍ ໄດ້​ປະ­ກາດ​ໃຊ້​ກົດ­ໝາຍ​ວ່າ​ດ້ວຍ​ການ​ຊຸມ­ນຸມ​ຢ່າງ​ສັນ­ຕິ ທີ່​ມີ​ມາດ­ຕາ​ກຳ­ນົດ​ໂທດ​ທາງ​ອາ­ຍາ ສຳ­ລັບ​ຜູ້​ຮ່ວມ​ຂະ​ບວນ​ປະ​ທ້ອງ​ຕາມ​ຖະ­ໜົນ.

    ທີ່ ສ ເກົາ­ຫຼີ: ເລື່ອງ​ນີ້​ອ່າວ​ເກົ່າ ອອກ​ມາ​ແຕ່​ຕົ້ນ​ປີ​ນີ້ (The Nation 24 ມັງ­ກອນ 2019) ແຕ່​ມັນ​ກໍ​ເປັນ​ອຸ­ທາ­ຫອນ​ສອນ​ໃຈ​ກ່ຽວ​ກັບ​ຜົນ​ຮ້າຍ​ທີ່​ເກີດ​ມາ​ຈາກ​ນິ­ໄສ “ມື​ໄວ ໃຈ​ກ້າ ໜ້າ­ດ້ານ” ຂອງ​ບາງ​ຄົນ ໂດຍ​ສະ­ເພາະ​ແມ່ນ​ເພດ​ຊາຍ ເລື່ອງ​ມີ​ຢູ່​ວ່າ: ທ່ານ ອານ ແຕ ເງິນ (Ahn Tae?geun) ນັກ​ກົດ­ໝາຍ​ທີ່​ມີ​ຖາ­ນະ​ເປັນ​ຮອດ​ຈ່າ​ສານ​ສຳ­ຄັນ​ຄົນ​ໜຶ່ງ ຖືກ​ຕັດ­ສິນ​ໂທດ​ຈຳ​ຄຸກ​ເປັນ​ເວ­ລາ 2 ປີ ຍ້ອນ​ເຮັດ​ໜ້າ­ດ້ານ​ລວນ​ລາມ​ທາງ​ເພດ​ສາວ​ພະ­ນັກ­ງານ​ຄົນ​ໜຶ່ງ​ໃນ​ງານ​ສົບ ສາວ​ຜູ້​ເຄາະ​ຮ້າຍ​ດັ່ງ­ກ່າວ ຊື່­ວ່າ​ນາງ ຊຽວ ຈີ ຮຸນ ທີ່​ເຮັດ​ໜ້າ­ທີ່​ເຝິກ​ງານ​ຢູ່​ຫ້ອງ­ການ​ຂອງ​ທ່ານ​ຈ່າ​ສານ (ຕາມ​ການ​ສັນ­ນິ­ຖານ).

    ພາຍ­ຫຼັງ​ໄດ້​ມີ​ການ​ລວນ​ລາມ​ທາງ​ເພດ ດ້ວຍ​ການ​ຈັບ​ເນື້ອ​ຕ້ອງ​ກາຍ​ເຫຍື່ອ​ຕໍ່­ໜ້າ​ສາຍ­ຕາ​ຫຼາຍ​ຄົນ​ແລ້ວ ຝ່າຍ​ທ່ານ​ຈ່າ​ສານ​ໜ້າ­ດ້ານ ກໍ​ໄດ້​ໃຊ້​ກົນ­ອຸ­ບາຍ​ໂຍກ​ຍ້າຍ​ສາວ​ພະ­ນັກ­ງານ ລົງ​ໄປ​ປະ­ຈຳ​ຢູ່​ຫ້ອງ­ການ​ກົດ­ໝາຍ​ແຂວງ ບ່ອນ​ທີ່​ນາງ​ຕ້ອງ​ທົນ​ທຸກ­ທໍ­ລະ­ມານ​ໃຈ ຍ້ອນ​ການ​ຖືກ​ຢຽບ​ຢ່ຳ​ນ້ຳ­ໃຈ ແລະ ຍ້ອນ​ໜ້າ­ທີ່​ວຽກ​ງານ​ບໍ່​ຂຶ້ນ​ບໍ່​ເກີນ ແຕ່​ສຸດ​ທ້າຍ ໂດຍ​ອາ­ໄສ​ຂະ​ບວນ​ການ “ມີ​ທູ-MeToo” ທີ່​ເປີດ​ໂອ­ກາດ​ໃຫ້​ຜູ້​ຖືກ​ລວນ​ລາມ​ທາງ​ເພດ​ເປີດ​ໂປງ​ຜູ້​ກໍ່​ເຫດ ສາວ​ພະ­ນັກ­ງານ​ດັ່ງ­ກ່າວ ຈຶ່ງ​ໄດ້​ຕັດ­ສິນ​ໃຈ​ເປີດ­ເຜີຍ​ເລື່ອງ​ທີ່​ບຸກ­ຄົນ​ຂັ້ນ​ຫົວ­ໜ້າ​ກະ­ທຳ​ຕໍ່​ຕົນ.

    ການ​ເປີດ­ເຜີຍ​ຂອງ​ພະ­ນັກ­ງານ​ສາວ ໄດ້​ນຳ­ໄປ​ສູ່​ການ​ຕັດ­ສິນ​ຄະ­ດີ ທ່ານ ອານ ແຕ ເງິນ ໃນ​ການ​ຕັດ­ສິນ​ຄະ­ດີ​ນີ້ ທ່ານ ລີ ຊັງ ຈູ່ ຫົວ­ໜ້າ​ຄະ­ນະ​ສານ​ເຂດ​ກາງ ນະ­ຄອນ­ຫຼວງ​ເຊ​ອູນ ໄດ້​ຊີ້​ອອກ​ວ່າ: ມີ​ຫຼັກ​ຖານ​ຢ່າງ​ພຽງ­ພໍ​ທີ່​ຢັ້ງ­ຢືນ​ວ່າ ການ​ທີ່​ນາງ ຊຽວ ຈີ ຮຸນ (ຜູ້​ເຄາະ​ຮ້າຍ) ຖືກ​ໂຍກ​ຍ້າຍ​ໄປ​ປະ­ຈຳ­ການ​ຢູ່​ແຂວງ​ນັ້ນ ແມ່ນ​ຍ້ອນ​ວ່າ​ຈຳ­ເລີຍ​ຢ້ານ​ພະ­ນັກ­ງານ​ສາວ​ທີ່​ຕົກ​ເປັນ​ເຫຍື່ອ ການ​ລວນ​ລາມ​ທາງ​ເພດ​ຄົນ​ນີ້ ຈະ​ເປີດ­ເຜີຍ​ຂີ້​ພື້ນ​ຄວາມ​ຜິດ​ຂອງ​ຕົນ​ໃຫ້​ສາ­ທາ­ລະ­ນະ​ຊົນ​ຊາບ ສ່ວນ​ທ່ານ ອານ ແຕ ເງິນ ຈ່າ​ສານ​ມື​ໄວ ໃຈ​ກ້າ ໜ້າ­ດ້ານ​ຄົນ​ນີ້​ຜັດ​ແກ້­ໂຕ​ວ່າ “ບໍ່​ໄດ້​ຕັ້ງ­ໃຈ ເພາະ​ຕອນ​ໄປ​ຮ່ວມ​ງານ​ສົບ​ນັ້ນ​ຕົນ​ມີ​ອາ­ການ​ມຶນ­ເມົາ ແຕ່​ທາງ​ເບື້ອງ​ສານ​ກໍ​ຊັດ​ຄືນ​ວ່າ “ຕອນ​ສັ່ງ​ໂຍກ​ຍ້າຍ​ນາງ ຊຽວ ຈີ ຮຸນ ໄປ​ປະ­ຈຳ​ຢູ່​ແຂວງ​ນັ້ນ ແນ່­ນອນ​ຈຳ­ເລີຍ​ຄົງ​ມີ​ສະ­ຕິ​ຄົບ​ຖ້ວນ ບໍ່​ມຶນ­ເມົາ”.

ຂ່າວທີ່ກ່ຽວຂ້ອງ