ຂ່າວຫຼ້າສຸດ

ໄຊເສດຖາ ເຂົ້າຮ່ວມເຕະບານມິດຕະພາບທີ່ປະເທດໄທ

740 18 ກ.ລ. 2019 ວົງຈອນກີລາ
ໄຊເສດຖາ ເຂົ້າຮ່ວມເຕະບານມິດຕະພາບທີ່ປະເທດໄທ

    ຖື​ວ່າ​ເປັນ​ອີກ​ໜຶ່ງ​ກິດ­ຈະ­ກຳ​ສຳ­ລັບ​ກີ­ລາ​ບານ­ເຕະ​ເຍົາ­ວະ​ຊົນ​ທີ່​ໄດ້​ນຳ​ເອົາ​ຄວາມ​ຮູ້​ແລກ­ປ່ຽນ​ປະ­ສົມ​ການ ແລະ ທັງ​ເປັນ​ການ​ສົ່ງ­ເສີມ​ສ້າງ​ໃຫ້​ວົງ​ການ​ກີ­ລາ​ບານ­ເຕະ​ເຍົາ­ວະ​ຊົນ​ລາວ​ເຮົາ​ມີ​ຄວາມ​ຟົດ­ຟື້ນ ແລະ ເປັນ​ການ​ພັດ­ທະ­ນາ​ທັກ​ສະ​ໃຫ້​ກ້າວ​ເຂົ້າ​ສູ່​ເປັນ​ລະ­ດັບ​ທີມ​ຊາດ ດັ່ງ­ນັ້ນ​ຈຶ່ງ​ໄດ້​ຈັດ​ກິດ­ຈະ­ກຳ​ແຂ່ງ­ຂັນ​ກີ­ລາ​ບານ­ເຕະ​ເຍົາ­ວະ​ຊົນ​ຮຸ່ນ​ອາ­ຍຸ 8-15 ປີ​ເພື່ອ​ສ້າງ​ຂະ​ບວນ​ການ​ມິດ­ຕະ­ພາບ​ລາວ-ໄທ ໃນ​ນັ້ນ​ທີມ​ສະ­ໂມ­ສອນ​ໄຊ​ເສດ​ຖາ​ຮຸ່ນ​ອາ­ຍຸ 15 ປີ​ໄດ້​ຊະ­ນະ​ເລີດ​ຈາກ​ການ​ແຂ່ງ­ຂັນ​ດັ່ງ­ກ່າວ.

    ວັນ​ທີ 14 ກໍ­ລະ­ກົດ 2019 ທີມ​ສະ­ໂມ­ສອນ​ໄຊ​ເສດ​ຖາ​ໄດ້​ໄປ​ຮ່ວມ​ແຂ່ງ­ຂັນ​ກີ­ລາ​ບານ­ເຕະ​ມິດ­ຕະ­ພາບ​ລາວ-ໄທ ທີ່​ສະ­ໜາມ​ກີ­ລາ ChikChikairpot ແຂວງ​ໜອງ​ຄາຍ ປະ­ເທດ​ໄທ ນຳ­ພາ​ໂດຍ​ທ່ານ ໄຊ​ເສດ​ຖາ ຄຳ​ວຽງ​ງາມ ຄູ​ເຝິກ​ກີ­ລາ​ບານ­ເຕະ​ສະ­ໂມ­ສອນ​ໄຊ​ເສດ​ຖາ ກິດ­ຈະ­ກຳ​ເປັນ​ການ​ແຂ່ງ­ຂັນ​ກີ­ລາ​ບານ­ເຕະ​ເຍົາ­ວະ​ຊົນ​ທີ່​ມີ​ອາ­ຍຸ 8-15 ປີ ເພື່ອ​ເປັນ​ການ​ສ້າງ​ຂະ​ບວນ​ການ​ມິດ­ຕະ­ພາບ​ລາວ-ໄທ​ໃຫ້​ຄວາມ​ຟົດ­ຟື້ນ ແລະ ເປັນ​ການ​ພັດ­ທະ­ນາ​ທັກ​ສະ​ຄວາມ​ຮູ້​ໃຫ້​ນັກ­ກີ­ລາ 2 ປະ­ເທດ ເຊິ່ງ​ໝົດ​ມີ 12 ທີມ​ເຂົ້າ​ຮ່ວມ ໃນ​ນັ້ນ​ທີມ​ສະ­ໂມ­ສອນ​ໄຊ​ເສດ​ຖາ ຄວ້າ​ລາ­ງວັນ​ຊະ­ນະ​ເລີດ​ອັນ​ດັບ​ໜຶ່ງ​ມາ​ໄດ້.

    ທ່ານ ໄຊ​ເສດ​ຖາ ຄຳ​ວຽງ​ງາມ ກ່າວ​ວ່າ: ການ​ເຂົ້າ​ຮ່ວມ​ແຂ່ງ­ຂັນ​ຄັ້ງ​ນີ້ ເປັນ​ການ​ສ້າງ​ກິດ­ຈະ­ກຳ​ດີໆໃຫ້​ເຍົາ­ວະ​ຊົນ ກໍ​ຄື​ສ້າງ​ຄວາມ​ເຂັ້ມ­ແຂງ​ນັກ­ກີ­ລາ ຜ່ານ​ມາ​ສະ­ໂມ­ສອນ​ເຄີຍ​ໄປ​ແຂ່ງ­ຂັນ​ຫຼາຍ​ບ່ອນ ສະ­ເພາະ​ຢູ່​ໃນ​ນະ­ຄອນ­ຫຼວງ​ວຽງ​ຈັນ​ຄັ້ງ​ນີ້ ໄດ້​ເຂົ້າ​ຮ່ວມ​ແຂ່ງ­ຂັນ​ຢູ່​ຕ່າງ­ປະ­ເທດ ເຫັນ​ວ່າ​ຜົນ​ການ​ແຂ່ງ­ຂັນ​ລາຍ­ການ​ນີ້ ໄດ້­ຜົນ​ຕອບ​ຮັບ​ເປັນ​ຢ່າງ​ດີ​ຈາກ​ເຕັກ­ນິກ​ການ​ຫຼິ້ນ​ບານ​ນັກ­ກີ­ລາ​ໃນ​ທີມ​ເຮົາ ແລະ ປີ​ນີ້​ໂຄງ­ການ​ແຂ່ງ­ຂັນ​ຄັ້ງ​ຕໍ່​ໄປ​ໄດ້​ວາງ​ເປົ້າ​ໝາຍ​ໄວ້​ວ່າ ເດືອນ​ສິງ­ຫາ​ຈະ​ຈັດ­ການ​ແຂ່ງ­ຂັນ​ມິດ­ຕະ­ພາບ​ຢູ່​ເມືອງ​ວັງ​ວຽງ ເພື່ອ​ສົ່ງ­ເສີມ​ສ້າງ​ໃຫ້​ວົງ​ການ​ກີ­ລາ​ບານ­ເຕະ​ເຍົາ­ວະ​ຊົນ​ລາວ​ມີ​ຄວາມ​ຟົດ­ຟື້ນ ແລະ ເປັນ​ການ​ພັດ­ທະ­ນາ​ໃຫ້​ສາ­ມາດ​ກ້າວ​ເຂົ້າ​ສູ່​ລະ­ດັບ​ທີມ​ຊາດ.

ຂ່າວທີ່ກ່ຽວຂ້ອງ