ຂ່າວຫຼ້າສຸດ

ລ່າ

147 17 ກ.ລ. 2019 ຫົວຂໍ້ຂ່າວອື່ນໆ

    ວັນ​ທີ 13 ກໍ­ລະ­ກົດ 2019 ຜ່ານ​ມາ​ຫຼາຍ​ບ່ອນ​ໄດ້​ຈັດ​ພິ­ທີ​ສະ­ເຫຼີມ­ສະ­ຫຼອງ​ວັນ​ປ່ອຍ​ປາ ອະ­ນຸ​ຮັກ​ສັດ​ນ້ຳ ແລະ ສັດ­ປ່າ​ແຫ່ງ​ຊາດ​ຂຶ້ນ​ໂດຍ​ການ​ໃຫ້​ກຽດ​ເຂົ້າ​ຮ່ວມ​ຂອງ​ການ​ນຳ​ພັກ-ລັດ​ຫຼາຍ​ທ່ານ​ໂດຍ​ເຫັນ​ໄດ້​ຄວາມ​ສຳ­ຄັນ​ຂອງ​ປາ ສັດ​ນ້ຳ ແລະ ສັດ­ປ່າ​ຕໍ່​ການ​ພັດ­ທະ­ນາ​ເສດ­ຖະ­ກິດ-ສັງ­ຄົມ​ແຫ່ງ​ຊາດ ແລະ ຕໍ່​ການ​ປັບ­ປຸງ​ຊີ­ວິດ​ການ​ເປັນ​ຢູ່ ແລະ ຫຼຸດ­ຜ່ອນ​ຄວາມ­ທຸກ​ຍາກ​ຂອງ​ປະ­ຊາ­ຊົນ​ລາວ​ບັນ­ດາ­ເຜົ່າ​ເພື່ອ​ເປັນ​ການ​ອະ­ນຸ​ຮັກ ແລະ ປັກ​ປັກ​ຮັກ­ສາ​ຊີ­ວະ​ນາໆພັນ​ໃຫ້​ມີ​ຄວາມ​ຍືນ​ຍົງ.

    ວັນ​ປ່ອຍ​ປາ ວັນ​ອະ­ນຸ​ຮັກ​ສັດ​ນ້ຳ ແລະ ສັດ­ປ່າ​ແຫ່ງ​ຊາດ​ຂອງ ສປປ ລາວ ເຊິ່ງ​ໄດ້​ບັນ­ຍັດ​ໄວ້​ໃນ​ກົດ­ໝາຍ​ວ່າ​ດ້ວຍ​ສັດ​ນ້ຳ ແລະ ສັດ­ປ່າ ກໍ​ຄື ກົດ­ໝາຍ​ວ່າ​ດ້ວຍ​ການ​ປະ­ມົງ ແລະ ຍັງ​ເປັນ​ການ​ລະ­ນຶກ​ເຖິງ​ວັນ​ຄ້າຍ​ວັນ​ເກີດ​ຂອງ​ປະ­ທານ​ ສຸ​ພາ­ນຸ​ວົງ ​ທີ່​ມີ​ຄຸນ­ງາມ­ຄວາມ­ດີ ແລະ ຜົນ­ງານ​ອັນ​ໃຫຍ່​ຫຼວງ ​ທີ່​ໄດ້​ອຸ­ທິດ​ໃຫ້​ແກ່​ພາ­ລະ­ກິດ​ແຫ່ງ​ການ​ຕໍ່­ສູ້​ກູ້​ຊາດ​ ກໍ​ຄື​ການ​ປົກ​ປັກ​ຮັກ­ສາ ແລະ ສ້າງ­ສາ​ປະ­ເທດ​ຊາດ​ທັງ​ເປັນ​ການ​ປູກ​ຈິດ​ສຳ­ນຶກໃຫ້​ແກ່​ອະ­ນຸ­ຊົນ ເຍົາ­ວະ​ຊົນ​ຂອງ​ຊາດ ​ກໍ​ຄື​ລູກ​ຫຼານ​ຜູ້​ເກີດ​ໃໝ່​ໃຫຍ່​ລຸນ​ໃຫ້​ມີ​ສະ­ຕິ​ຮັກ​ຫວງ​ແຫນ​ສັດ​ນ້ຳ ແລະ ສັດ­ປ່າ​ທັງ​ເປັນ​ການ​ປຸກ­ລະ­ດົມ​ທົ່ວ​ປວງ​ຊົນ​ເຂົ້າ​ຮ່ວມ​ການ​ຄຸ້ມ​ຄອງ ປົກ​ປັກ​ຮັກ­ສາ ພັດ­ທະ­ນາ ແລະ ນຳ​ໃຊ້​ສັດ​ນ້ຳ ແລະ ສັດ­ປ່າ​ແນ­ໃສ່​ເພື່ອ​ເຮັດ​ໃຫ້​ປະ­ຊາ­ກອນ​ສັດ​ນ້ຳ ແລະ ສັດ­ປ່າ​ໃຫ້​ນັບ​ມື້​ມີ​ຄວາມ​ອຸ­ດົມ­ສົມ­ບູນ ແລະ ກາຍ­ເປັນ​ທ່າ­ແຮງ​ໃນ​ການ​ຄ້ຳ­ປະ­ກັນ​ດ້ານ​ສະ­ບຽງ​ອາ­ຫານ ໂພ­ຊະ​ນາ​ການ​ ກໍ​ຄື​ການ​ປັບ­ປຸງ​ຊີ­ວິດ​ການ​ເປັນ​ຢູ່​ຂອງ​ປະ­ຊາ­ຊົນ​ລາວ​ໃຫ້​ນັບ​ມື້​ດີ​ຂຶ້ນ ແລະ ເປັນ​ການ​ສືບ​ສານ​ຮີດ­ຄອງ​ປະ­ເພ­ນີ​ ໃນ​ໄລ­ຍະ​ເຂົ້າ​ພັນ​ສາ​ຫ້າມ​ບໍ່​ໃຫ້​ຂ້າ​ສັດ​ຕັດ​ຊີ­ວິດ​ໃຫ້​ມີ​ຄວາມ​ໝາຍ​ຄວາມ​ສຳ­ຄັນ​ຍິ່ງ​ຂຶ້ນ. ສປປ ລາວ ​ຍັງ​ໄດ້​ເຄື່ອນ​ໄຫວ​ວຽກ​ງານ​ອະ­ນຸ​ຮັກ​ສັດ​ນ້ຳ ແລະ ສັດ­ປ່າ​ຮ່ວມ​ກັບ​ພາກ​ພື້ນ ແລະ ສາ­ກົນ​ຢ່າງ​ຕັ້ງ­ໜ້າ ພວກ​ເຮົາ​ໄດ້​ເຂົ້າ​ເປັນ​ພາ­ຄີ​ສົນ­ທິ­ສັນ­ຍາ​ສາ­ກົນ ເຊັ່ນ:  ສົນ­ທິ­ສັນ­ຍາ​ວ່າ​ດ້ວຍ​ຊີ­ວະ​ນາໆພັນ (CBD) ສົນ­ທິ­ສັນ­ຍາ​ວ່າ​ດ້ວຍ​ການ​ຄ້າ­ຂາຍ​ສັດ­ປ່າ ແລະ ພືດ​ປ່າ​ທີ່​ໃກ້​ຈະ​ສູນ­ພັນ​ລະ­ຫວ່າງ​ຊາດ (CITES) ຮ່ວມ​ມື​ກັບ​ອົງ­ການ​ພັດ­ທະ­ນາ​ປະ­ມົງ​ອາ­ຊີ​ຕາ ວັນ​ອອກ​ສ່ຽງ​ໃຕ້ (SEAFDEC) ອົງ­ການ​ເຄືອ​ຂ່າຍ​ການ​ລ້ຽງ​ປາ​ອາ­ຊີ ແລະ ປາ​ຊີ​ຟິກ (NACA) ອົງ­ການ​ແມ່­ນ້ຳ​ຂອງ​ຮ່ວມ​ມື​ກັບ​ກອງ​ທຶນ​ອະ­ນຸ​ຮັກ​ທຳ​ມະ​ຊາດ​ໂລກ (WWF) ແລະ ບໍ­ລິ­ສັດ​ທີ່​ປຶກ­ສາ​ດ້ານ​ການ​ປະ­ມົງ (Fish-Bio) ໃນ​ການ​ສ້າງ ແລະ ຄຸ້ມ​ຄອງ​ວັງ​ສະ­ຫງວນ​ອົງ­ການ​ອະ­ນຸ­ລັກ​ສາ­ກົນ (IUCN) ໃນ​ການ​ອະ­ນຸ​ຮັກ​ຊະ­ນິດ​ປາ​ທີ່​ຈະ​ສູນ­ພັນ ແລະ ໂຄງ­ການ​ອະ­ນຸ­ລັກ​ສັດ​ນ້ຳ ແລະ ສັດ­ປ່າ​ອື່ນໆ​ຈຳ­ນວນ​ໜຶ່ງ. ການ​ລັກ­ລອບ​ລ່າ​ສັດ​ນ້ຳ-ສັດ­ປ່າ​ເຊິ່ງ​ເປັນ​ປະ­ກົດ​ການ​ຫຍໍ້­ທໍ້​ໜຶ່ງ​ທີ່​ເກີດ​ຂຶ້ນ​ໃນ​ສັງ­ຄົມ​ເຊິ່ງ​ມາດ­ຕາ 141 ວ່າ​ດ້ວຍ​ການ​ລ່າ­ເນື້ອ​ໂດຍ​ບໍ່​ຖືກ­ຕ້ອງ​ຕາມ​ກົດ­ໝາຍ ​ຂອງ​ກົດ­ໝາຍ​ວ່າ​ດ້ວຍ​ອາ­ຍາ ແຫ່ງ ສປປ ລາວ (ສະ­ບັບ​ປັບ­ປຸງ​ໃໝ່) ໄດ້​ລະ­ບຸ​ໄວ້​ວ່າ: ...ບຸກ­ຄົນ​ຜູ້​ໃດ​ຫາກ​ໄດ້​ລ່າ­ເນື້ອ​ໂດຍ​ບໍ່​ຖືກ­ຕ້ອງ​ຕາມ​ລະ­ບຽບ​ການ​ ກ່ຽວ​ກັບ​ການ​ລ່າ­ເນື້ອ​ເຊັ່ນ​ລ່າ​ສັດ​ທີ່​ຫວງ​ຫ້າມ ລ່າ­ເນື້ອ​ໃນ​ລະ­ດູ ຫຼື ໃນ​ເຂດ​ທີ່​ຫວງ​ຫ້າມ ຫຼື ດ້ວຍ​ເຄື່ອງ­ມື​ທີ່​ເກືອດ​ຫ້າມ ແລະ ອື່ນໆ​ຈະ​ຖືກ​ລົງ­ໂທດ​ຕັດ​ອິດ­ສະ­ຫຼະ­ພາບ​ແຕ່ 3 ເດືອນ​ຫາ 2 ປີ ແລະ ຈະ​ຖືກ​ປັບ​ໃໝ​ຕາມ​ລະ­ບຽບ​ການ​ກ່ຽວ​ກັບ​ການ​ລ່າ­ເນື້ອ...

    ໄລ­ຍະ​ລະ­ດູ­ຝົນ ກໍ​ຄື ໄລ­ຍະ​ເຂົ້າ​ພັນ​ສາ ເຊິ່ງ​ເປັນ​ຍາມ​ທີ່​ສັດ​ນ້ຳ ໂດຍ​ສະ­ເພາະ ແມ່ນ​ກຸ້ງ ຫອຍ ປູ ປາ... ພວມ​ວາງ​ໄຂ່ ຫຼື ພວມ​ຂະ­ຫຍາຍ​ການ​ແຜ່­ພັນ ອອກ​ແມ່​ແຜ່​ລູກ​ຕໍ່​ໄປ ແຕ່​ກໍ​ຍັງ​ເຫັນ​ປະ­ຊາ­ຊົນ​ຈຳ­ນວນ​ໜຶ່ງ​ຍັງ​ສືບ­ຕໍ່​ການ​ລ່າ​ຢູ່ ເຊິ່ງ​ນັ້ນ​ເປັນ​ການ​ກະ­ທຳ​ຜິດ​ຕາມ​ມາດ­ຕາ 142 ວ່າ​ດ້ວຍ​ການ​ຫາ​ປາ ຫຼື ສັດ​ນ້ຳ​ອື່ນໆ​ໂດຍ​ບໍ່​ຖືກ­ຕ້ອງ​ຕາມ​ກົດ­ໝາຍ​ວ່າ​ດ້ວຍ​ອາ­ຍາ​ແຫ່ງ ສປປ ລາວ ຍັງ​ໄດ້​ລະ­ບຸ​ໄວ້​ຢ່າງ​ຈະ­ແຈ້ງ​ເຖິງ​ບຸກ­ຄົນ​ຜູ້​ໃດ​ຫາກ​ໄດ້​ຫາ​ປາ ຫຼື ສັດ​ນ້ຳ​ອື່ນໆ ​ໂດຍ​ບໍ່​ຖືກ­ຕ້ອງ​ຕາມ​ລະ­ບຽບ​ການ​ກ່ຽວ​ກັບ​ການ​ຫາ​ປາ​ ເຊັ່ນ​ຫາ​ປາ​ດ້ວຍ​ການ​ໃຊ້​ລະ­ເບີດ ຢາ­ເບື່ອ ທາດ​ເຄ​ມີ ຫຼື ເຄື່ອງ­ມື​ອື່ນໆ​ທີ່​ເກືອດ​ຫ້າມ​ຈະ​ຖືກ​ລົງ­ໂທດ​ຕັດ​ອິດ­ສະ­ຫຼະ­ພາບ​ແຕ່ 3 ເດືອນ​ຫາ 1 ປີ ແລະ ຈະ​ຖືກ​ປັບ​ໃໝ​ຕາມ​ລະ­ບຽບ​ການ​ກ່ຽວ​ກັບ​ການ​ຫາ​ປາ...

ໂດຍ: ມະ­ຕິ​ຊົນ

ຂ່າວທີ່ກ່ຽວຂ້ອງ