ຂ່າວຫຼ້າສຸດ

EU ປິດ​ລ້ອມ​ຕວກ​ກີ ຍ້ອນ​ການ​ສຳ​ຫຼວດ​ນ້ຳມັນ​ຢູ່​ນອກ​ຝັ່ງ​ທະເລ​ເກາະ ໄຊ​​ປຣັສ

166 17 ກ.ລ. 2019 ຂ່າວຕ່າງປະເທດ
EU ປິດ​ລ້ອມ​ຕວກ​ກີ ຍ້ອນ​ການ​ສຳ​ຫຼວດ​ນ້ຳມັນ​ຢູ່​ນອກ​ຝັ່ງ​ທະເລ​ເກາະ ໄຊ​​ປຣັສ

   ຂ່າວສານ AFP ອ້າງ​ຕາມ​ແຫຼ່ງ​ຂ່າວ​ທາງ​ການ​ທູດ ໃຫ້​ຮູ້​ວ່າ ເມື່ອ​ວັນ​ທີ 15 ກໍລະກົດ​ນີ້ ບັນດາ​ເຈົ້າ​ໜ້າທີ່​ຂອງ​ເອີ​ຣົບ ໄດ້​ເຫັນ​ດີ​ເປັນ​ເອກະສັນ​ກັນ ໃນ​ການ​ປະຕິບັດ​ຄຳ​ສັ່ງ​ລົງໂທດ​ທາງ​ດ້ານ​ການເມືອງ ແລະ ເສດຖະກິດ ຕໍ່​ປະເທດ​ຕວກ​ກີ ຫຼັງ​ຈາກ​ທີ່​ປະເທດ​ນີ້​ສືບຕໍ່​ຜັນ​ຂະຫຍາຍ​ການເຄື່ອນໄຫວ​ຂຸດ​ເຈາະ​ສຳ​ຫຼວດ​ນ້ຳມັນ-ແກ​​ັສ​ຢູ່​ບໍລິເວນ​ນອກ​ຝັ່ງ​ທະເລ​ຂອງ​ເກາະ​ໄຊ​​ປຣັສ ໂດຍ​ບໍ່​ເອົາ​ຫົວຊາ​ຕໍ່​ຄຳ​ແຈ້ງ​ເຕືອນ.

ທ່ານ​ນາງ ເຟ​ເດຣີ​ກາ ໂມ​ເກຣີ​ນີ ຜູ້​ແທນ​ລະດັບ​ສູງ​ຂອງ​ສະຫະພາບ​ເອີ​ຣົບ (EU) ຮັບຜິດຊອບ​ນະໂຍບາຍ​ດ້ານ​ຄວາມ​ໝັ້ນຄົງ ແລະ ພົວພັນ​ກັບ​ຕ່າງປະເທດ ກ່າວ​ຕໍ່​ຜູ້​ສື່​ຂ່າວ ຫຼັງ​ການ​ປະຊຸມ​ກັບ​ລັດຖະມົນຕີ​ການ​ຕ່າງປະເທດ​ຂອງ EU ວ່າການ​ສະຫຼຸບ​ກ່ຽວ​ກັບ​ຕວກ​ກີ ໄດ້​ຮັບ​ຄວາມ​ເຫັນ​ພ້ອມ​ແລ້ວ ແລະ ຈະ​ໄດ້​ນຳ​ປະກາດ​ໃນ​ເວລາ​ຕໍ່​ໄປ ໃນ​ນັ້ນ​ມີ​ມາດ​ຕະການ​ທີ່​ເຂັ້ມ​ງວດ​ທີ່​ສຸດ ເປັນ​ທີ່​ເຂົ້າໃຈ​ກັນ​ວ່າ​ເປັນ​ການ​ຕົກລົງ​ຕັດ 145,8 ລ້ານ​ເອີ​ໂຣ (ເທົ່າ​ກັບ​ປະມານ 164 ລ້ານ​ໂດ​ລາ​ສະຫະລັດ) ຢູ່​ໃນ​ບັນດາ​ບ້ວງ​ງົບປະມານ ທີ່​ເອີ​ຣົບ​ຈັດ​ສັນ​ໃຫ້​ແກ່​ຕວກ​ກີ ໃນ​ປີ 2020.

    ເມື່ອ​ອາທິດ​ກ່ອນ EU ໄດ້​ແຈ້ງ​ເຕືອນ​ໄປ​ຍັງ​ຕວກ​ກີ ວ່າ​ປະເທດ​ນີ້​ຈະ​ປະ​ເຊີນ​ກັບ​ຄຳ​ສັ່ງ​ປິດ​ລ້ອມ ຖ້າ​ຫາ​ກວ່າ​ບໍ່​ຢຸດຕິ​ການເຄື່ອນໄຫວ​ທີ່ EU ເອີ້ນ​ວ່າ​ເປັນ​ການ​ຂຸດ​ເຈາະ​ນ້ຳມັນ-ແກ​​ັສ​ຢ່າງ “ຜິດ​ກົດໝາຍ” ຢູ່​ໃນ​ເຂດ​ສິດທິ​ພິເສດ​ທາງ​ດ້ານ​ເສດຖະກິດ ຂອງ​ເກາະ​ໄຊ​​ປຣັສ.

ຂ່າວທີ່ກ່ຽວຂ້ອງ