ຂ່າວຫຼ້າສຸດ

ຂະແໜງ​ການທ່ອງທ່ຽວ​ຂອງ​ກູ​ບາ​ໄດ້​ຮັບ​ຄວາມ​ເສຍ​ຫາຍ​ຫຼາຍ​ຈາກ​ຄຳ​ສັ່ງ​ປິດ​ລ້ອມ ຂອງ ສ ອາ​ເມ​ຣິ​ກາ

137 17 ກ.ລ. 2019 ຂ່າວຕ່າງປະເທດ
ຂະແໜງ​ການທ່ອງທ່ຽວ​ຂອງ​ກູ​ບາ​ໄດ້​ຮັບ​ຄວາມ​ເສຍ​ຫາຍ​ຫຼາຍ​ຈາກ​ຄຳ​ສັ່ງ​ປິດ​ລ້ອມ ຂອງ ສ ອາ​ເມ​ຣິ​ກາ

   ທ່ານ ມາ​ນູ​ແອນ ມາ​ເຣ​ໂຣ ລັດຖະມົນຕີ​ການທ່ອງທ່ຽວ​ຂອງ​ກູ​ບາ ກ່າວ​ຕໍ່​ສະພາ​ແຫ່ງ​ຊາດ​ກູ​ບາ ເມື່ອ​ວັນ​ທີ 12 ກໍລະກົດ​ທີ່​ຜ່ານ​ມາ​ວ່າ ຂະແໜງ​ການທ່ອງທ່ຽວ​ຂອງ​ກູ​ບາ ໄດ້​ຮັບ​ຄວາມ​ເສຍ​ຫາຍ​ເປັນ​ມູນ​ຄ່າ 38 ຕື້​ໂດ​ລາ​ສະຫະລັດ ຍ້ອນ​ການ​ປິດ​ລ້ອມ​ທາງ​ດ້ານ​ການ​ຄ້າ​ຂອງ ສ ອາ​ເມ​ຣິ​ກາ ຕໍ່​ກູ​ບາ ເປັນ​ເວລາ​ເຄິ່ງ​ສະຕະວັດ​ທີ່​ຜ່ານ​ມາ.

      ເຖິງ​ຢ່າງໃດ​ກໍ​ຕາມ ທ່ານ ມາ​ເຣ​ໂຣ ກໍ​ເວົ້າ​ວ່າ ໂດຍ​ບໍ່​ເອົາ​ຫົວຊາ​ຕໍ່​ຄຳ​ສັ່ງ​ປິດ​ລ້ອມ​ໃໝ່​ຂອງ ສ ອາ​ເມ​ຣິ​ກາ ກູ​ບາ​ຄາດໝາຍ​ວ່າ​ຈະ​ຕ້ອນຮັບ​ນັກ​ທ່ອງ​ທ່ຽວ​ຕ່າງປະເທດ 4,3 ລ້ານ​ເທື່ອ​ຄົນ ພາຍ​ໃນ​ປີ​ນີ້. ຕົວ​ເລກ​ດັ່ງກ່າວ​ຫຼຸດ​ລົງ 15% ເມື່ອ​ທຽບໃສ່​ລະດັບ​ທີ່​ຄາດ​ຄະເນ​ໄວ້​ກ່ອນ​ໜ້າ​ນີ້​ທີ່ 5,1 ລ້ານ​ເທື່ອ​ຄົນ ແລະ ຕ່ຳ​ກວ່າ 10% ເມື່ອ​ທຽບໃສ່​ປີ​ກາຍ.

    ທ່ານ ມາ​ເຣ​ໂຣ ໃຫ້​ຮູ້​ວ່າ ເພື່ອ​ຮັບ​ມື​ກັບ​ຜົນ​ກະທົບ​ທີ່​ເກີດ​ຈາກ​ຄຳ​ສັ່ງ​ປິດ​ລ້ອມ​ຂອງ ສ ອາ​ເມ​ຣິ​ກາ ນັ້ນ ການ​ນຳ​ໃນ​ຂະແໜງ​ທ່ອງ​ທ່ຽວ​ຂອງ​ກູ​ບາ ມີ​ແຜນການ​ນຳ​ໃຊ້​ນະໂຍບາຍ​ການ​ຄຸ້ມ​ຄອງ​ທີ່​ຄ່ອງ​ຕົວ​ກວ່າ​ເກົ່າ ຕໍ່​ບັນດາ​ບັນດາ​ບໍລິສັດ​ທ່ອງ​ທ່ຽວ ເພື່ອ​ດຶງ​ດູດ​ເອົາ​ນັກ​ລົງທຶນ ກໍ​ຄື​ນັກ​ທ່ອງ​ທ່ຽວ​ຕ່າງປະເທດ​ຕື່ມ​ອີກ.

    ຕົວ​ເລກ​ສະຖິຕິ​ຢ່າງ​ເປັນ​ທາງ​ການ ໃຫ້​ຮູ້​ວ່າ ນັກ​ທ່ອງ​ທ່ຽວ​ເກືອບ 900.000 ເທື່ອ​ຄົນ ໃນ​ນັ້ນ​ມີ​ເກືອບ 40% ເປັນ​ຊາວ​ອາ​ເມ​ຣິ​ກັນ ໄດ້​ເດີນທາງ​ໄປ​ຍັງ​ກູ​ບາ ໂດຍ​ທາງ​ກຳປັ່ນ​ເດີນ​ທະເລ ພາຍ​ໃນ​ປີ 2018.

ຂ່າວທີ່ກ່ຽວຂ້ອງ