AIIB ມີ​ສະມາຊິກ​ເພີ່ມ​ຂຶ້ນ​

130 16 ກ.ລ. 2019 ຂ່າວຕ່າງປະເທດ
AIIB ມີ​ສະມາຊິກ​ເພີ່ມ​ຂຶ້ນ​

   ທະນາຄານ​ການ​ລົງທຶນ​ພື້ນຖານ​ໂຄງ​ລ່າງ​ອາຊີ (AIIB) ມີ​ສະມາຊິກ​ເພີ່ມ​ຂຶ້ນ​ອີກ 3 ປະເທດ ເມື່ອ​ວັນ​ທີ 13 ກໍລະກົດ​ນີ້ ຈາກ​ການ​ຮັບ​ເອົາ ເບ​ແນັງ ຈີ​ບູ​ຕີ ແລະ  ຣູ​ອັນ​ດາ ເຮັດ​ໃຫ້​ຈຳນວນ​ສະມາຊິກ​ຂອງ​ອົງການ​ດັ່ງກ່າວ​ຂຶ້ນ​ສູ່​ຕົວ​ເລກ 100 ລາຍ.

    ການ​ຕົກລົງ​ຮັບ​ເອົາ​ສະມາຊິກ​ໃໝ່​ນັ້ນ ໄດ້​ຮັບ​ຄວາມ​ເຫັນ​ພ້ອມ​ຈາກ​ຄະນະ​ນຳ​ຂອງ AIIB ຊຶ່ງ​ມີ​ອອກ​ມາ​ຢູ່​ໃນ​ກອງ​ປະຊຸມ​ປະຈຳ​ປີ​ຄັ້ງ​ທີ​ສີ່ ທີ່​ຈັດ​ຂຶ້ນ​ຢູ່​ທີ່​ລຸກ​ຊຳ​ບວກ ໂດຍ​ສາມ​ປະເທດ​ດັ່ງກ່າວ ຈະ​ໄດ້​ກາຍເປັນ​ສະມາຊິກ​ຂອງ AIIB ຢ່າງ​ເປັນ​ທາງ​ການ ຫຼັງ​ຈາກ​ທີ່​ເຮັດ​ສຳເລັດ​ເອກະສານ​ຢູ່​ພາຍ​ໃນ​ປະເທດ ແລະ ​ຈ່າຍ​ເງິນ​ທຶນ​ປະກອບສ່ວນ​ສ່ວນ​ທຳ​ອິດ​ໃຫ້​ແກ່​ທະນາຄານ​ດັ່ງກ່າວ.

    ການ​ປະຊຸມ​ປະຈຳ​ປີ​ຄັ້ງ​ທີ​ສີ່​ຂອງ AIIB ຈັດ​ຂຶ້ນ​ເປັນ​ເວລາ 2 ວັນ ຄື 13 ແລະ  14 ກໍລະກົດ​ນີ້ ພາຍ​ໃຕ້​ຫົວຂໍ້​ວ່າ “ການ​ຮ່ວມ​ມື ແລະ ​ເຊື່ອມ​ຈອດ” ໂດຍ​ມີ​ເຈົ້າ​ໜ້າທີ່​ຂອງ AIIB ຜູ້​ແທນ​ຂອງ​ບັນດາ​ປະເທດ​ສະມາຊິກ ແລະ ​ຄູ່​ຮ່ວມ ຕະຫຼອດ​ຮອດ​ບັນດາ​ການ​ນຳ​ຂອງ​ວິ​ສາ​ຫະ​ກິດ ແລະ ​ຊ່ຽວຊານ  1.000 ກວ່າ​ຄົນ​ເຂົ້າ​ຮ່ວມ. ການ​ປະຊຸມ​ໃນ​ປີ​ນີ້ ເປັນ​ການ​ເນັ້ນ​ໜັກ​ເຖິງ​ການ​ຮ່ວມ​ມື ແລະ ​ການ​ເຊື່ອມ​ຈອດ​ທີ່​ແຂງແຮງ​ກວ່າ​ເກົ່າ ລະຫວ່າງ​ທະວີບອາຊີ ກັບ​ທະວີບ​ເອີ​ຣົບ ຕະຫຼອດ​ຮອດ​ການ​ເຊື່ອມ​ຈອດ​ທາງ​ດ້ານ​ດີ​ຈີ​ຕາ​​ລ ການ​ປ່ຽນແປງ​ສະພາບ​ດິນ​ຟ້າ​ອາກາດ ພື້ນຖານ​ໂຄງ​ລ່າງ​ແບບ​ຍືນ​ຍົງ ແລະ ​ການ​ລະດົມ​ທຶນ​ໃຫ້​ແກ່​ບັນດາ​ຂະ​ບວນ​ການ​ຫັນປ່ຽນ​ທາງ​ດ້ານ​ເສດຖະກິດ​ທົ່ວ​ໂລກ.

ຂ່າວທີ່ກ່ຽວຂ້ອງ