ປາ​ກິດ​ສະຖານ ​ຈະ​ຕ້ອງ​ໄດ້​ຈ່າຍ​ຄ່າ​ຊົດ​ເຊີຍ ໃຫ້​ແກ່​ບໍລິສັດ​ຂອງ​ຕ່າງປະເທດ ຍ້ອນ​ປິດ​ບໍ່​ແຮ່​ຄຳ

117 16 ກ.ລ. 2019 ຂ່າວຕ່າງປະເທດ
ປາ​ກິດ​ສະຖານ ​ຈະ​ຕ້ອງ​ໄດ້​ຈ່າຍ​ຄ່າ​ຊົດ​ເຊີຍ ໃຫ້​ແກ່​ບໍລິສັດ​ຂອງ​ຕ່າງປະເທດ ຍ້ອນ​ປິດ​ບໍ່​ແຮ່​ຄຳ

    ທະນາຄານ​ໂລກ (WB) ແຈ້ງ​ໃຫ້​ຮູ້ເມື່ອ​ວັນ​ທີ 14 ກໍລະກົດ​ນີ້​ວ່າ ປາ​ກິດ​ສະຖານ​ຈະ​ຕ້ອງ​ໄດ້​ຈ່າຍ​ຄ່າ​ຊົດ​ເຊີຍ​ຄວາມ​ເສຍ​ຫາຍ​ເກືອບ 6 ຕື້ ໂດ​ລາ​ສະຫະລັດ ໃຫ້​ແກ່​ບັນດາ​ບໍລິສັດ​ຂຸດ​ຄົ້ນ​ແຮ່​ຄຳ​ຂອງ​ຕ່າງປະເທດ ຫຼັງ​ຈາກ​ທີ່​ເມື່ອ​ປີ 2011 ທີ່​ຜ່ານ​ມາ ລັດຖະບານ​ປາ​ກິດ​ສະຖານ​ໄດ້​ຕົກລົງ​ໃຫ້​ປິດ​ບັນດາ​ບໍ່​ແຮ່​ຄຳ ຊຶ່ງ​ບໍລິສັດ​ເຫຼົ່ານັ້ນ​ພວມ​ຂຸດ​ຄົ້ນ​ຢູ່.

    ວິ​ສາ​ຫະ​ກິດ​ຮ່ວມ Tethyan Copper ໃນ​ນັ້ນ​ມີ​ບໍລິສັດ​ຄຳ Barrick ຂອງ​ກາ​ນາ​ດາ ແລະ ​ບໍລິສັດ Antofagasta Minerals ຂອງ​ຊີ​ເລ ຊຶ່ງ​ຕ່າງ​ກໍ​ປະກອບ​ຫຸ້ນ 37,5% ນັ້ນ​ເປັນ​ໂຄງການ​ຂຸດ​ຄົ້ນ​ບໍ່​ແຮ່ ທີ່​ໃຊ້​ເງິນ​ລົງທຶນ​ໂດຍ​ກົງ​ຂອງ​ຕ່າງປະເທດ (FDI) ຫຼາຍ​ທີ່​ສຸດ​ຢູ່​ໃນ​ປາ​ກິດ​ສະຖານ.

    ເມື່ອ​ກ່ອນ​ໜ້າ​ນີ້​ສິບ​ກວ່າ​ປີ ວິ​ສາ​ຫະ​ກິດ​ຮ່ວມ​ດັ່ງກ່າວ ໄດ້​ຄົ້ນ​ພົບ​ບັນດາ​ບໍ່​ຄຳ ແລະ ​ທອງ​ຂະໜາດ​ໃຫຍ່ ຢູ່​ໃນ​ເຂດ ຣີ​ໂກ ດິກ ໃນ​ແຂວງ ບາ​ລູ​ຈິ​ສະຖານ (ທິດຕາເວັນຕົກ​ສ່ຽງ​ໃຕ້​ຂອງ​ປາ​ກິດ​ສະຖານ) ແລະ ​ໄດ້​ຂຶ້ນ​ແຜນການ​ຂຸດ​ຄົ້ນ​ບໍ່​ແຮ່​ເພື່ອ​ຫາ​ກຳໄລ​ສູງ. ແຕ່​ວ່າ​ໂຄງການ​ນັ້ນ​ໄດ້​ຖືກ​ຢຸດຕິ​ລົງ​ໃນ​ປີ 2011 ຫຼັງ​ຈາກ​ທີ່​ອຳນາດ​ການ​ປົກຄອງ​ທ້ອງຖິ່ນ ປະຕິເສດ​ທີ່​ຈະ​ອອກ​ໃບ​ອະນຸຍາດ​ໃຫ້​ບໍລິສັດ. ໃນ​ປີ 2013 ສານ​ສູງ​ສຸດ​ຂອງ​ປາ​ກິດ​ສະຖານ ໄດ້​ປະກາດ​ໃຫ້ການ​ຕົກລົງ​ດັ່ງກ່າວ​ເປັນ​ໂມຄະ.

    ເມື່ອ​ວັນ​ທີ 12 ກໍລະກົດ​ທີ່​ຜ່ານ​ມາ ກຳມະການ​ສາກົນ​ຂອງ WB ໄດ້​ກຳນົດ​ເຖິງ​ຄວາມ​ເສຍ​ຫາຍ​ຂອງ Tethyan ຢູ່​ທີ່ 5,84 ຕື້​ໂດ​ລາ​ສະຫະລັດ ຍ້ອນ​ການ​ປິດ​ບໍ່​ຄຳ​ດັ່ງກ່າວ.

ຂ່າວທີ່ກ່ຽວຂ້ອງ