ການ​ເຈລະຈາ​ການ​ຄ້າ​ລະຫວ່າງ ສ ອາ​ເມ​ຣິ​ກາ ກັບ​ອິນ​ເດຍ ບໍ່​ບັນລຸ​ບາດກ້າວ​ບຸກ​ທະລຸ

168 16 ກ.ລ. 2019 ຂ່າວຕ່າງປະເທດ
ການ​ເຈລະຈາ​ການ​ຄ້າ​ລະຫວ່າງ ສ ອາ​ເມ​ຣິ​ກາ ກັບ​ອິນ​ເດຍ ບໍ່​ບັນລຸ​ບາດກ້າວ​ບຸກ​ທະລຸ

   ເຈົ້າ​ໜ້າທີ່​ອາວຸໂສ​ທ່ານ​ໜຶ່ງ​ຂອງ​ອິນ​ເດຍ ເວົ້າ​ວ່າ ການ​ເຈລະຈາ​ການ​ຄ້າ ລະຫວ່າງ ສ ອາ​ເມ​ຣິ​ກາ ກັບ​ອິນ​ເດຍ ຊຶ່ງ​ຈັດ​ຂຶ້ນ​ທີ່​ນະຄອນ​ລວງ ນີວ ແດນ​ລີ ຂອງ​ອິນ​ເດຍ ເມື່ອ​ວັນ​ສຸກ​ທີ່​ຜ່ານ​ມາ ໄດ້ແກ່​ຍາວ​ເປັນ​ເວລາ 3 ຊົ່ວໂມງ ແຕ່ “ບໍ່​ໄດ້​ມີ​ບາດກ້າວ​ບຸກ​ທະລຸ” ໃນ​ບັນດາ​ບັນຫາ​ການ​ພິພາດ​ໃນ​ປັດຈຸບັນ ທີ່​ພົວພັນ​ເຖິງ​ພາສີ ຫຼື​ບັນດາ​ມາດ​ຕະການ​ປົກ​ປ້ອງ​ການ​ຄ້າ ຊຶ່ງ​ສອງ​ປະເທດ​ຕ່າງ​ກໍ​ພວມ​ນຳ​ໃຊ້​ຢູ່ ເຮັດ​ໃຫ້​ເກີດ​ຄວາມ​ເຄັ່ງ​ຕຶງ​ລະຫວ່າງ​ສອງ​ຝ່າຍ.

    ເຈົ້າ​ໜ້າທີ່​ດັ່ງກ່າວ​ເວົ້າ​ວ່າ ເນື້ອ​ໃນ​ຫຼາຍ​ປະການ​ທີ່​ເປັນ​ສ້ຽມ​ໜາມ ເຊັ່ນ​ບັນຫາ​ການ​ອູດ​ໜູນ​ລາຄາ​ທາງ​ດ້ານ​ກະສິກຳ ການ​ຄ້າ​ເອ​ເລັກ​ໂຕຣ​ນິກ ພາສີ​ເຫຼັກ​ກ້າ ແລະ ​ອາ​ລູ​ມີ​ນຽມ ບໍ່​ໄດ້​ນຳ​ອອກ​ມາ​ຢູ່​ໃນ​ການ​ເຈລະຈາ​ດັ່ງກ່າວ.

ສ ອາ​ເມ​ຣິ​ກາ ແລະ ​ອິນ​ເດຍ ເຊື່ອມ​ຕໍ່​ການ​ເຈລະຈາ​ການ​ຄ້າ ຫຼັງ​ຈາກ​ທີ່​ປະທານາທິບໍດີ ສ ອາ​ເມ​ຣິ​ກາ ໂດ​ນາ​​ລ ທຣຳ ແລະ ​ນາຍົກລັດຖະມົນຕີ​ອິນ​ເດຍ ນາ​ເຣນ​ດຣາ ໂມ​ດີ ພົບ​ປະກັນ​ຢູ່​ນອກ​ກອງ​ປະຊຸມ​ສຸດ​ຍອດ ກຸ່ມ​ບັນດາ​ປະເທດ​ພັດທະນາ ແລະ ​ເກີດ​ໃໝ່​ແຖວ​ໜ້າ​ຂອງ​ໂລກ (G20) ທີ່​ປະເທດ​ຍີ່ປຸ່ນ ເມື່ອ​ເດືອນ​ທີ່​ຜ່ານ​ມາ ໃນ​ນັ້ນ ຜູ້ນຳ​ທັງ​ສອງ​ໄດ້​ເຫັນ​ດີ​ຊອກ​ຫາ​ວິທີ​ເພີ່ມ​ທະວີ​ການ​ພົວພັນ​ແບບ​ສອງ​ຝ່າຍ.

ຂ່າວທີ່ກ່ຽວຂ້ອງ