IMF ກະກຽມ​ອະນຸມັດ​ເງິນ​ກູ້ 5,4 ຕື້​ໂດ​ລາ ໃຫ້​ແກ່​ອາກ​ຊັງ​ຕິນ

159 16 ກ.ລ. 2019 ຂ່າວຕ່າງປະເທດ
IMF ກະກຽມ​ອະນຸມັດ​ເງິນ​ກູ້ 5,4 ຕື້​ໂດ​ລາ ໃຫ້​ແກ່​ອາກ​ຊັງ​ຕິນ

     ເມື່ອ​ວັນ​ທີ 12 ກໍລະກົດ​ທີ່​ຜ່ານ​ມາ ກອງ​ທຶນ​ເງິນຕາ​ສາກົນ (IMF) ໄດ້​ເຮັດ​ສຳເລັດ​ໂຄງການ​ການ​ຕີ​ລາຄາ​ກ່ຽວ​ກັບ “ສຸຂະພາບ” ຂອງ​ພື້ນຖານ​ເສດຖະກິດ​ອາກ​ຊັງ​ຕິນ ແລະ  IMF  ຈະ​ອະນຸມັດ​ບ້ວງ​ເງິນ​ກູ້​ມູນ​ຄ່າ 5,4 ຕື້​ໂດ​ລາ​ສະຫະລັດ ໃນ​ບໍ່​ຊ້າ​ນີ້ ເພື່ອ​ຊ່ວຍເຫຼືອ​ອາກ​ຊັງ​ຕິນ ໃນ​ການ​ເຮັດ​ໃຫ້​ເສດຖະກິດ​ມີ​ຄວາມ​ໝັ້ນຄົງ.

     ທ່ານ ເດ​ວິດ ລິບ​ຕັນ ຮັກສາ​ການ​ຜູ້ອຳນວຍການ​ຝ່າຍ​ບໍລິຫານ​ຂອງ IMF ເວົ້າ​ວ່າ ລັດຖະບານ​ອາກ​ຊັງ​ຕິນ ສືບຕໍ່​ສະແດງ​ອອກ​ໃຫ້​ເຫັນ​ເຖິງ​ຄຳ​ສັນຍາ​ຢ່າງ​ແຮງ​ກ້າ ຕໍ່​ໂຄງການ​ນະໂຍບາຍ​ເສດຖະກິດ​ຂອງ​ເຂົາເຈົ້າ ຕອບ​ສະໜອງ​ຕໍ່​ທຸກໆ​ຄາດໝາຍ​ທີ່​ວາງ​ອອກ​ມາ ຢູ່​ໃນ​ໂຄງການ​ຊ່ວຍເຫຼືອ​ຂອງ IMF.

    ກ່ອນ​ໜ້າ​ນັ້ນ​ໜຶ່ງ​ວັນ ທະນາຄານ​ໂລກ (WB) ກໍ​ແຈ້ງ​ໃຫ້​ຮູ້​ວ່າ ໄດ້​ອະນຸມັດ​ບ້ວງ​ເງິນ​ກູ້   500 ລ້ານ​ໂດ​ລາ​ສະຫະລັດ ໃຫ້​ແກ່​ອາກ​ຊັງ​ຕິນ ເພື່ອ​ຊ່ວຍເຫຼືອ​ໃຫ້​ແກ່​ບັນດາ​ໂຄງການ​ພັດທະນາ​ສັງຄົມ ຢູ່​ໃນ​ປະເທດ​ດັ່ງກ່າວ. ນີ້​ເປັນ​ເງິນ​ທີ່​ຍັງ​ເຫຼືອ ຢູ່​ໃນ​ບ້ວງ​ຊ່ວຍເຫຼືອ​ດ້ານ​ການ​ເງິນ ມູນ​ຄ່າ 1 ຕື້ ໂດ​ລາ​ສະຫະລັດ ຊຶ່ງ WB ຮັບຮອງ​ໃຫ້​ແກ່​ອາກ​ຊັງ​ຕິນ ໃນ​ນັ້ນ​ການ​ອະນຸມັດ​ເງິນ​ງວດ​ທຳ​ອິດ ໄດ້​ປະຕິບັດ​ໄປ​ເມື່ອ​ເດືອນ​ພະຈິກ ປີ 2018 ເມື່ອ​ປະເທດ​ນີ້​ຕົກ​ຢູ່​ໃນ​ໄລຍະ​ວິ​ກິດ​ການ​ເສດຖະກິດ ຍ້ອນ​ເກີດ​ການ​ຜັນ​ຜວນ​ຢ່າງ​ຕໍ່​ເນື່ອງ ຢູ່​ໃນ​ຕະຫຼາດ​ການ​ເງິນ ເງິນຕາ.

    IMF ເຫັນ​ດີ​ສະໜອງ​ເງິນ​ກູ້ ໃຫ້​ແກ່​ອາກ​ຊັງ​ຕິນ; ແລະ ​ເພື່ອ​ເປັນ​ການ​ຕອບ​ແທນ ອາກ​ຊັງ​ຕິນ ຕ້ອງ​ໄດ້​ປະຕິບັດ​ຄຳ​ສັນຍາ​ຫຼາຍ​ປະການ ກ່ຽວ​ກັບ​ການ​ປະຕິ​ຮູບ​ໂຄງການ​ພັດທະນາ​ເສດຖະກິດ ແລະ ​ປະຕິບັດ​ນະໂຍບາຍ​ຮັດ​ສາຍແອວ (ການ​ປະຢັດ).

ຂ່າວທີ່ກ່ຽວຂ້ອງ