ເກີດ​ພາຍຸ​ຝົນ ແລະ​ດິນ​ເຈື່ອນ​ຢູ່​ໃນ​ເຂດ​ອາຊີ​ໃຕ້

109 16 ກ.ລ. 2019 ຂ່າວຕ່າງປະເທດ
ເກີດ​ພາຍຸ​ຝົນ ແລະ​ດິນ​ເຈື່ອນ​ຢູ່​ໃນ​ເຂດ​ອາຊີ​ໃຕ້

    ນ້ຳ​ຖ້ວມ ແລະ​ດິນ​ເຈື່ອນ ໃນ​ສອງ​ວັນ​ເມື່ອ​ທ້າຍ​ອາທິດ​ທີ່​ຜ່ານ​ມາ ໄດ້​ສົ່ງ​ຜົນ​ໃຫ້​ມີ​ຜູ້​ເສຍ​ຊີວິດ​ຢ່າງ​ໜ້ອຍ 40 ຄົນ ຢູ່​ໃນ​ເຂດ​ອາຊີ​ໃຕ້. ໃນ​ນັ້ນ ມີ​ຜູ້​ເສຍ​ຊີວິດ 27 ຄົນ ແລະ ​ບາດເຈັບ 11 ຄົນ ຫຼັງ​ຈາກ​ທີ່​ເກີດ​ຝົນຕົກ​ໜັກ ຢູ່​ໃນ​ເຂດ​ທິດຕາເວັນອອກ ແລະ​ທິດໃຕ້​ປະເທດ​ເນ​ປານ ເມື່ອ​ວັນ​ທີ 13 ກໍລະກົດ​ນີ້. ໃນ​ຂະນະ​ດຽວ​ກັນ ໂຄສົກ​ຂອງ​ອົງການ​ຕຳຫຼວດ​ເນ​ປານ ໃຫ້​ຮູ້​ວ່າ ຍັງ​ມີ​ຜູ້​ຫາຍ​ສາບ​ສູນ​ອີກ 15 ຄົນ ຍ້ອນ​ສະພາບ​ອາກາດ​ຮຸນ​ແຮງ​ດັ່ງກ່າວ.

ທີ່​ປະເທດ​ອິນ​ເດຍ ມີ​ຜູ້​ເສຍ​ຊີວິດ 11 ຄົນ ຍ້ອນ​ເກີດ​ພາຍຸ​ຝົນ ເຮັດ​ໃຫ້​ເກີດ​ນ້ຳ​ຖ້ວມ​ຢູ່​ໃນ​ລັດ​ອັດ​ສຳ ແລະ​ລັດ ອາ​ຣູ​ນາ​ຈັນ ປຣາ​ເດ​​ສ (ທິດຕາເວັນອອກ​ສ່ຽງ​ເໜືອ​ອິນ​ເດຍ). ສະເພາະ​ແຕ່​ຢູ່​ໃນ​ລັດ ອັດ​ສຳ ກໍ​ມີ​ປະຊາຊົນ ໄດ້​ຮັບ​ຜົນ​ກະທົບ​ເຖິງ 900.000 ​ຄົນ

    ຢ້ອນ​ຄືນ​ຫຼັງ ເມື່ອ​ປີ​ກາຍ ມີ​ຜູ້​ເສຍ​ຊີວິດ 1.200 ກວ່າ​ຄົນ ຍ້ອນ​ເກີດ​ພາຍຸ​ຮຸນ​ແຮງ​ຢູ່​ໃນ​ບັນດາ​ປະເທດ​ໃນ​ເຂດ​ອາຊີ​ໃຕ້ ໃນ​ນັ້ນ​ມີ​ເຂດ ເກ​ຣາ​ລາ ຂອງ​ອິນ​ເດຍ ໄດ້​ຮັບ​ຜົນ​ກະທົບ​ໜັກໜ່ວງ​ທີ່​ສຸດ ໃນ​ຮອບ​ເກືອບ 100 ປີ.

ຂ່າວທີ່ກ່ຽວຂ້ອງ