ຂ່າວຫຼ້າສຸດ

ໄຊທານີ ຂຸ້ນຂ້ຽວປັກດຳນາປີໃຫ້ສຳເລັດ ໃນເດືອນກໍລະກົດນີ້

202 16 ກ.ລ. 2019 ຂ່າວໜ້າ​ໜຶ່ງ
ໄຊທານີ ຂຸ້ນຂ້ຽວປັກດຳນາປີໃຫ້ສຳເລັດ ໃນເດືອນກໍລະກົດນີ້

    ປັດ­ຈຸ­ບັນ ຊາວ​ກະ­ສິ­ກອນ​ທົ່ວ​ເມືອງ​ໄຊ​ທາ­ນີ ນະ­ຄອນ­ຫຼວງ​ວຽງ​ຈັນ ກຳ­ລັງ​ຂຸ້ນ­ຂ້ຽວ​ປັກ​ດຳ­ນາ​ປີ ແລະ ພືດ​ຜັກ​ລະ­ດູ­ຝົນ​ຢ່າງ​ຕັ້ງ­ໜ້າ ແລະ ເປັນ​ຂະ​ບວນ​ຟົດ­ຟື້ນ​ກວ່າ​ປີ­ຜ່ານ­ມາ ເພື່ອ​ໃຫ້​ສຳ­ເລັດ​ຕາມ​ລະ­ດູ​ການ ແລະ ຮັບ­ປະ­ກັນ​ຜົນ​ຜະ­ລິດ​ໃຫ້​ໄດ້​ຫຼາຍ​ຂຶ້ນ.

    ທ່ານ ທອງ​ສຸກ ບົວ​ລີ​ຂັນ ຫົວ­ໜ້າ​ຫ້ອງ­ການ​ກະ­ສິ­ກຳ ແລະ ປ່າ­ໄມ້ ເມືອງ​ໄຊ​ທາ­ນີ ໃຫ້​ສຳ­ພາດ​ວັນ​ທີ 10 ກໍ­ລະ­ກົດ 2019 ວ່າ: ຊາວ​ກະ­ສິ­ກອນ​ທົ່ວ​ເມືອງ​ໄຊ​ທາ­ນີ ໄດ້​ເລີ່ມ​ລົງ­ມື​ປັກ​ດຳ​ເຂົ້າ­ນາ​ປີ​ມາ​ແຕ່​ຕົ້ນ​ເດືອນ​ມິ­ຖຸ­ນາ ປັດ­ຈຸ­ບັນ​ປະ­ຕິ­ບັດ​ໄດ້ 13.650 ເຮັກ­ຕາ ເທົ່າ​ກັບ 91% ຂອງ​ເນື້ອ­ທີ່​ແຜນ­ການ 15.000 ເຮັກ­ຕາ ໃນ​ນີ້ ເຂົ້າ­ຈ້າວ 350 ເຮັກ­ຕາ ເນື້ອ­ທີ່​ແຜນ­ການ 600 ເຮັກ­ຕາ ດຳ​ດ້ວຍ​ກົນ​ຈັກ 145 ເຮັກ­ຕາ ນາ​ດຳ 8.344 ເຮັກ­ຕາ ນາ­ຫວ່ານ 5.187 ເຮັກ­ຕາ ນາ​ຢອດ 117 ເຮັກ­ຕາ ນາ​ໂຍນ 2 ເຮັກ­ຕາ ຄາດ​ວ່າ​ຈະ​ປັກ​ດຳ​ໃຫ້​ສຳ­ເລັດ​ທ້າຍ​ເດືອນ​ກໍ­ລະ­ກົດ​ນີ້ ແລະ ຄາດ​ວ່າ​ຈະ​ໄດ້​ຮັບ​ຜົນ​ຜະ­ລິດ 69.000 ໂຕນ.

    ນອກ­ຈາກ​ການ​ປູກ​ເຂົ້າ​ແລ້ວ ຍັງ​ສາ­ມາດ​ປູກ​ພືດ​ຜັກ​ໄດ້ 587 ເຮັກ­ຕາ ເທົ່າ​ກັບ 59,96% ຂອງ​ເນື້ອ­ທີ່​ແຜນ­ການ 979 ເຮັກ­ຕາ ພືດ​ອຸດ­ສາ­ຫະ­ກຳ 91,08% ປູກ​ເຫັດ​ໄດ້ 705.000 ເບົ້າ ແລະ ໄດ້​ຈັດ​ພິ­ທີ​ດຳ­ນາ​ດ້ວຍ​ກົນ​ຈັກ​ທີ່​ທັນ​ສະ­ໄໝ ເພື່ອ​ຫຼຸດ­ຜ່ອນ​ແຮງ​ງານ​ຊາວ​ກະ­ສິ­ກອນ​ຢູ່​ບ້ານ​ໜອງ​ໂນ ເນື້ອ­ທີ່ 0,32 ເຮັກ­ຕາ ຕື່ມ​ອີກ.

ຂ່າວທີ່ກ່ຽວຂ້ອງ