ຂ່າວຫຼ້າສຸດ

ທູດປະເທດຜູ້ໃຫ້ທຶນຄວບຄຸມຢາເສບຕິດ ລົງຢ້ຽມຢາມດ່ານສາກົນຂົວມິດຕະພາບ 1

239 16 ກ.ລ. 2019 ຂ່າວໜ້າ​ໜຶ່ງ
ທູດປະເທດຜູ້ໃຫ້ທຶນຄວບຄຸມຢາເສບຕິດ ລົງຢ້ຽມຢາມດ່ານສາກົນຂົວມິດຕະພາບ 1

    ວັນ​ທີ 12 ກໍ­ລະ­ກົດ 2019 ຫ້ອງ­ການ​ກວດ­ກາ ແລະ ຄວບ​ຄຸມ​ຢາ​ເສບ​ຕິດ ກົມ​ໃຫຍ່​ຕຳ­ຫຼວດ ກະ­ຊວງ​ປ້ອງ​ກັນ​ຄວາມ​ສະ­ຫງົບ ນຳ​ໂດຍ​ທ່ານ ພັນ​ໂທ ພຸດ​ສະ­ຫວາດ ສູນ​ທະ­ລາ ຮອງ​ຫົວ­ໜ້າ​ຫ້ອງ­ການ​ກວດ­ກາ ແລະ ຄວບ​ຄຸມ​ຢາ​ເສບ​ຕິດ ໄດ້​ນຳ­ພາ​ບັນ­ດາ​ທ່ານ​ເອກ​ອັກ​ຄະ​ລັດ​ຖະ​ທູດ​ຂອງ​ບັນ­ດາ​ປະ­ເທດ​ຜູ້​ໃຫ້​ທຶນ​ໃນ​ວຽກ​ງານ​ກວດ­ກາ ແລະ ຄວບ​ຄຸມ​ຢາ​ເສບ​ຕິດ​ປະ­ຈຳ​ລາວ ລົງ​ຢ້ຽມ­ຢາມ​ການ­ຈັດ­ຕັ້ງ​ປະ­ຕິ­ບັດ​ວຽກ​ງານ​ກວດ­ກາ ແລະ ຄວບ​ຄຸມ​ຢາ​ເສບ​ຕິດ​ທີ່​ດ່ານ​ສາ­ກົນ​ຂົວ​ມິດ­ຕະ­ພາບ​ລາວ-ໄທ ແຫ່ງ​ທີ 1 ນະ­ຄອນ­ຫຼວງ​ວຽງ​ຈັນ ຖືກ​ຕ້ອນ­ຮັບ​ໂດຍ​ທ່ານ ຖະ­ໜອມ​ສິດ ຂາວ​ພິ​ບານ ຮອງ​ຫົວ­ໜ້າ​ດ່ານ​ພາ­ສີ​ສາ­ກົນ​ຂົວ​ມິດ­ຕະ­ພາບ 1 ພ້ອມ​ດ້ວຍ​ພະ­ນັກ­ງານ​ເຈົ້າ​ໜ້າ­ທີ່​ພາ­ສີ ແລະ ເຈົ້າ​ໜ້າ­ທີ່​ຕຳ­ຫຼວດ ຕມ ປະ­ຈຳ​ດ່ານ​ທີ່​ກ່ຽວ­ຂ້ອງ.

    ທ່ານ ພັນ​ໂທ ພຸດ​ສະ­ຫວາດ ສູນ​ທະ­ລາ ໄດ້​ກ່າວ​ວ່າ: ຈຸດ­ປະ­ສົງ​ຂອງ​ການ​ລົງ​ຢ້ຽມ­ຢາມ​ຄັ້ງ​ນີ້ ເພື່ອ​ເປັນ​ການ​ປະ ຕິ​ບັດ​ວຽກ​ງານ​ກວດ­ກາ ແລະ ຄວບ​ຄຸມ​ຢາ​ເສບ​ຕິດ ໂດຍ​ຜ່ານ​ບັນ­ຊີ​ລາຍ​ຊື່​ຜູ້​ຕ້ອງ​ສົງ­ໄສ​ທີ່​ອາດ​ຈະ​ກ່ຽວ­ຂ້ອງ​ກັບ​ຜູ້​ລັກ ລອບ​ຄ້າ­ຂາຍ​ຢາ​ເສບ​ຕິດ ແລະ ກວດ­ກາ​ຕູ້​ສິນ­ຄ້າ​ເຂົ້າ-ອອກ​ທີ່​ອາດ​ມີ​ການ​ຊຸກ­ເຊື່ອງ​ຢາ​ເສບ​ຕິດ​ຜ່ານ​ຂົວ​ມິດ­ຕະ­ພາບ​ລາວ-ໄທ​ແຫ່ງ​ທີ 1 ເຊິ່ງ​ຜ່ານ​ການ​ລົງ​ຢ້ຽມ­ຢາມ​ຕົວ​ຈິງ​ຢູ່ 3 ຈຸດ​ທີ່​ເປັນ​ຈຸດ​ຜ່ານ​ສິນ­ຄ້າ​ເຂົ້າ-ອອກ ບັນ­ດາ​ທູດ​ກໍ​ໄດ້​ຖາມ​ບັນ­ດາ​ເຈົ້າ​ໜ້າ­ທີ່​ກ່ຽວ­ຂ້ອງ ກ່ຽວ​ກັບ​ການ​ກວດ­ກາ​ສິນ­ຄ້າ​ເຂົ້າ-ອອກ​ດ່ານ ບັນ­ຫາ​ທີ່​ມີ​ຄວາມ​ສົນ­ໃຈ​ຕ່າງໆ ແລະ ຝ່າຍ​ເຈົ້າ​ໜ້າ­ທີ່​ລາວ​ເຮົາ​ກໍ​ໄດ້​ໃຫ້​ຄວາມ​ຈະ​ຈ່າງ​ແຈ້ງ​ກ່ຽວ​ກັບ​ການ​ກວດ­ກາ​ສິນ­ຄ້າ​ດ້ວຍ​ເຄື່ອງ­ມື​ທີ່​ທັນ​ສະ­ໄໝ ອັນ​ໄດ້​ເຮັດ​ໃຫ້​ບັນ­ດາ​ທ່ານ​ທູດ​ມີ​ຄວາມ​ເຊື່ອ​ໝັ້ນ​ຕໍ່​ການ​ປະ­ຕິ­ບັດ​ວຽກ​ງານ​ວິ­ຊາ​ສະ­ເພາະ​ຂອງ​ເຈົ້າ​ໜ້າ­ທີ່​ລາວ​ເຮົາ ພາຍ­ຫຼັງ​ທີ່​ໄດ້​ຮັບ​ຟັງ​ການ​ລາຍ​ງານ​ຢ່າງ​ລະ­ອຽດ​ຂອງ​ແຕ່​ລະ​ພາກ­ສ່ວນ​ຂອງ​ເຈົ້າ​ໜ້າ­ທີ່​ປະ­ຈຳ​ດ່ານ ເຊິ່ງ​ຢາ​ເສບ​ຕິດ​ເປັນ​ໄພ​ຂົ່ມ­ຂູ່ ແລະ ເປັນ​ໄພ​ອັນ​ຕະ ລາຍ​ຕໍ່​ສັງ­ຄົມ ຕໍ່​ເສດ­ຖະ­ກິດ ແລະ ຕໍ່​ການ​ສ້າງ­ສາ​ພັດ­ທະ­ນາ​ປະ­ເທດ​ຊາດ ເພາະ​ມັນ​ໄດ້​ທຳ­ລາຍ​ບຸ​ຄະ­ລາ​ກອນ​ຂອງ​ຊາດ ດັ່ງ­ນັ້ນ ຫຼາຍ​ປະ­ເທດ​ໃນ​ໂລກ​ຈຶ່ງ​ໃຫ້​ຄວາມ​ສຳ­ຄັນ​ຕໍ່​ບັນ­ຫາ​ດັ່ງ­ກ່າວ ດ້ວຍ​ການ​ປາບ​ປາມ​ລົງ­ໂທດ​ຜູ້​ຜະ­ລິດ ຜູ້​ຄ້າ­ຂາຍ ແລະ ຜູ້​ເສບ ເພື່ອ​ເຮັດ​ໃຫ້​ໂລກ​ນີ້​ປາ­ສະ­ຈາກ​ຢາ​ເສບ​ຕິດ ເຖິງ​ວ່າ​ລັດ­ຖະ­ບານ​ແຕ່​ລະ​ປະ­ເທດ​ຈະ​ເອົາ­ໃຈ­ໃສ່​ແກ້​ໄຂ​ບັນ ຫາ​ດັ່ງ­ກ່າວ​ຢ່າງ​ເອົາ​ຈິງ​ເອົາ​ຈັງ​ກໍ​ຕາມ ແຕ່​ກໍ​ບໍ່​ສາ­ມາດ​ເຮັດ​ໃຫ້​ບັນ­ຫາ​ຢາ​ເສບ​ຕິດ​ໝົດ​ໄປ​ຈາກ​ໂລກ​ນີ້​ໄດ້​ເທື່ອ ດັ່ງ­ນັ້ນ ມັນ​ຕ້ອງ​ຮຽກ­ຮ້ອງ​ເຖິງ​ທຸກ​ພາກ­ສ່ວນ​ໃນ​ສັງ­ຄົມ​ເປັນ​ເຈົ້າ​ການ ແລະ ພ້ອມ​ກັນ​ແກ້​ໄຂ​ນຳ​ກັນ ເພື່ອ​ເຮັດ​ໃຫ້​ບັນ­ຫາ​ຢາ​ເສບ​ຕິດ​ຫຼຸດ​ໜ້ອຍ​ຖອຍ​ລົງ​ເປັນ​ກ້າວໆ.

ຂ່າວທີ່ກ່ຽວຂ້ອງ