ລມຕ ສສກ ໂອ້ລົມນັກກີລານັກຮຽນ ກ່ອນເຂົ້າຮ່ວມແຂ່ງຂັນ

778 16 ກ.ລ. 2019 ວົງຈອນກີລາ
ລມຕ ສສກ ໂອ້ລົມນັກກີລານັກຮຽນ ກ່ອນເຂົ້າຮ່ວມແຂ່ງຂັນ

    ທ່ານ ກອງ​ສີ ແສງ​ມະ­ນີ ຮອງ​ລັດ­ຖະ­ມົນ­ຕີ​ກະ­ຊວງ​ສຶກ​ສາ​ທິ​ການ ແລະ ກີ­ລາ (ສສກ) ໃຫ້​ກຽດ​ໂອ້​ລົມ ແລະ ໃຫ້​ທິດ​ທາງ​ຕໍ່​ຄະ­ນະ​ນຳ ຄູ​ເຝິກ ແລະ ນັກ­ກີ­ລາ ເມື່ອ​ວັນ​ທີ 12 ກໍ­ລະ­ກົດ 2019 ທີ່​ວິ­ທະ­ຍາ­ໄລ​ສິ­ລະ​ປະ​ສຶກ​ສາ ທີ່​ກຽມ​ເຂົ້າ​ຮ່ວມ​ງານ​ມະ​ຫະ​ກຳ​ກີ­ລາ​ນັກ­ຮຽນ​ອາ​ຊຽນ ຄັ້ງ​ທີ 11 ທີ່​ປະ­ເທດ​ອິນ​ໂດ​ເນ​ເຊຍ ເປັນ​ເຈົ້າ­ພາບ ລະ­ຫວ່າງ​ວັນ​ທີ 17-25 ກໍ­ລະ­ກົດ​ນີ້.

    ທ່ານ​ໄດ້​ເນັ້ນ​ໜັກ​ວ່າ: ໄລ­ຍະ​ກະ­ກຽມ​ກ່ອນ​ອອກ​ເດີນ­ທາງ ຄະ­ນະ​ຮັບ­ຜິດ­ຊອບ​ຕ້ອງ​ໄດ້​ໃກ້­ຊິດ­ຕິດ­ແທດ​ຕິດ­ຕາມ ກວດ­ກາ ປຶກ­ສາ​ຫາ­ລື ແລະ ໂອ້​ລົມ ເພື່ອ​ສຶກ​ສາ​ແນວ​ຄິດ​ໃຫ້​ນັກ­ກີ­ລາ ເພີ່ມ​ທະ­ວີ​ການ​ຕິດ­ຕາມ​ການ­ເຝິກ­ແອບ​ຢ່າງ​ໃກ້­ຊິດ ສ້າງ​ທຸກ​ເງື່ອນ­ໄຂ​ໃຫ້​ກັບ​ການ­ເຝິກ­ແອບ​ໃຫ້​ມີ​ປະ­ສິດ­ທິ­ພາບ ແລະ ປະ​ສິດ­ທິ​ຜົນ​ໃນ​ລະ­ດັບ​ທີ່​ແນ່­ນອນ ກະ­ກຽມ​ງົບ­ປະ­ມານ​ຮັບ​ໃຊ້ ວັດ­ຖຸ​ອຸ​ປະ­ກອບ​ເຝິກ­ແອບ ແລະ ແຂ່ງ­ຂັນ​ຂອງ​ນັກ­ກີ­ລາ​ນັກ­ຮຽນ​ລາວ ຊອກ​ຫາ​ຂໍ້​ມູນ​ທາງ​ດ້ານ​ເຕັກ­ນິກ ແລະ ສະ­ຖານ­ທີ່​ຂອງ​ການ​ແຂ່ງ­ຂັນ​ຈາກ​ເຈົ້າ­ພາບ ເພື່ອ​ແຈ້ງ​ໃຫ້​ນັກ­ກີ­ລາ​ເຮົາ​ໄດ້​ຊາບ​ລ່ວງ​ໜ້າ ປຸກ­ລະ­ດົມ​ເຊີດ​ຊູ​ນ້ຳ­ໃຈ​ຮັກ​ຊາດ ຄວາມ​ຫ້າວ­ຫັນ​ກະ​ຕື​ລື​ລົ້ນ ເປັນ​ເຈົ້າ​ການ​ໃຫ້​ສູງ​ຂຶ້ນ​ກວ່າ​ເກົ່າ ເຜີຍ­ແຜ່​ລະ­ບຽບ​ຕ່າງໆ ແລະ ຄວາມ​ຮັບ­ຜິດ­ຊອບ​ຂອງ​ແຕ່­ລະ­ຄົນ ແຕ່​ລະ​ສະ­ຫະ­ພັນ​ກີ­ລາ ໃຫ້​ເຂົ້າ­ໃຈ​ລະ­ບຽບ​ວິ­ໄນ ແລະ ປະ­ຕິ­ບັດ​ຢ່າງ​ເຂັ້ມ​ງວດ.

    ສຳ­ລັບ​ໄລ­ຍະ​ເຂົ້າ​ຮ່ວມ​ການ​ແຂ່ງ­ຂັນ ຕ້ອງ​ມີ​ຄຸນ­ສົມ­ບັດ ມີ​ລະ­ບຽບ​ວິ­ໄນ ຕັ້ງ­ໜ້າ​ແຂ່ງ­ຂັນ​ດ້ວຍ​ໄຫວ​ພິບ ແລະ ໃຊ້​ຄວາມ​ສາ­ມາດ​ຢ່າງ​ສຸດ​ຂີດ ເປັນ​ແບບ­ຢ່າງ​ທີ່​ດີ​ໃນ​ການ​ດຳ­ລົງ​ຊີ­ວິດ​ຮວມ​ໝູ່ ເອົາ­ໃຈ­ໃສ່​ສ້າງ​ສາຍ​ພົວ­ພັນ​ອັນ​ດີ­ງາມ​ກັບ​ນັກ­ກີ­ລາ​ທຸກ​ປະ­ເທດ​ທີ່​ເຂົ້າ​ຮ່ວມ ພ້ອມ​ກັນ​ເປັນ​ຕົວ​ແທນ​ເຜີຍ­ແຜ່​ວັດ­ທະ­ນະ­ທຳ​ອັນ​ດີ​ຂອງ​ຊາດ ເອົາ­ໃຈ­ໃສ່​ຄຸ້ມ​ຄອງ​ນຳ­ພາ​ນັກ­ກີ­ລາ​ເຂົ້າ​ແຂ່ງ­ຂັນ ໃຫ້​ຖືກ​ຕາມ​ລະ­ບຽບ​ການ ຕາມ​ຕາ­ຕະ­ລາງ​ດ້ວຍ​ຄວາມ​ຮັບ­ຜິດ­ຊອບ​ສູງ ມີ​ການ­ຈັດ­ຕັ້ງ​ບັນ­ຊາ​ຢ່າງ​ເປັນ​ລະ­ບົບ ເພື່ອ​ສາ­ມາດ​ເກັບ​ກຳ​ຂໍ້​ມູນ​ຕ່າງໆ ນຳ​ມາ​ເຜີຍ­ແຜ່​ໃຫ້​ແຕ່​ລະ​ພາກ­ສ່ວນ​ຮັບ​ຊາບ ແລະ ປັບ­ປຸງ​ປ່ຽນ­ແປງ​ຢ່າງ​ທັນ​ການ ປຶກ­ສາ​ຫາ­ລື​ສ້າງ​ຄວາມ​ເປັນ​ເອ­ກະ​ພາບ​ພາຍ​ໃນ​ຄະ­ນະ​ນຳ ຄູ​ເຝິກ ນັກ­ກີ­ລາ ເຮັດ​ໃຫ້​ທຸກ​ຄົນ​ມີ​ຈິດ­ໃຈ​ທຸ່ນ​ທ່ຽງ ແລະ ເຊື່ອ​ໝັ້ນ​ຕົວ​ເອງ ກາຍ­ເປັນ​ກຳ­ລັງ​ແຮງ​ອັນ​ແຮງ​ກ້າ​ໄປ​ສູ່​ຄວາມ​ສຳ­ເລັດ.

    ສປປ ລາວ ກຳ­ນົດ​ສົ່ງ 5 ປະ­ເພດ​ກີ­ລາ ປະ­ກອບ​ດ້ວຍ ແລ່ນ-ລານ ປັນ​ຈັກ​ສີ​ລັດ ກະ­ຕໍ້ ລອຍ­ນ້ຳ ແລະ ດອກ​ປີກ​ໄກ່ ໂດຍ​ມີ​ຄະ­ນະ​ຮັບ­ຜິດ­ຊອບ 13 ທ່ານ ຍິງ 1 ທ່ານ ຄະ­ນະ​ນຳ​ຄູ​ເຝິກ 15 ທ່ານ ຍິງ 3 ທ່ານ ນັກ­ກີ­ລາ 51 ຄົນ ຍິງ 16 ຄົນ ແລະ ກຳ­ມະ­ການ​ຕັດ­ສິນ 1 ທ່ານ ລວມ​ທັງ​ໝົດ​ມີ 80 ທ່ານ ເຊິ່ງ​ຈະ​ອອກ​ເດີນ­ທາງ 2 ຊຸດ​ຄື ວັນ​ທີ 15 ກໍ­ລະ­ກົດ 2019 ເດີນ­ທາງ 3 ທ່ານ ກໍ​ຄື ຄະ­ນະ​ຮັບ­ຜິດ­ຊອບ ເພື່ອ​ໄປ​ກະ­ກຽມ​ຄວາມ​ພ້ອມ​ໃຫ້​ແກ່​ຄະ­ນະ​ນັກ­ກີ­ລາ​ທີ່​ຈະ​ເດີນ­ທາງ​ເຂົ້າ​ຮ່ວມ ສ່ວນ​ຊຸດ​ທີ 2 ແມ່ນ​ເດີນ­ທາງ​ວັນ​ທີ 16 ກໍ­ລະ­ກົດ 2019 ຄະ­ນະ​ທັງ​ໝົດ 77 ທ່ານ ໂດຍ​ງົບ­ປະ­ມານ​ຮັບ​ໃຊ້​ແມ່ນ 2,22 ຕື້​ກີບ.

ຂ່າວທີ່ກ່ຽວຂ້ອງ