ຂ່າວຫຼ້າສຸດ

ວາງສະແດງຮູບພາບ ສະເຫຼີມສະຫຼອງວັນຄ້າຍວັນເກີດປະທານ ສຸພານຸວົງ

357 15 ກ.ລ. 2019 ຂ່າວໜ້າ​ໜຶ່ງ
ວາງສະແດງຮູບພາບ ສະເຫຼີມສະຫຼອງວັນຄ້າຍວັນເກີດປະທານ ສຸພານຸວົງ

    ເພື່ອ​ເປັນ​ການ​ສະ­ເຫຼີມ­ສະ­ຫຼອງ​ວັນ​ຄ້າຍ​ວັນ​ເກີດ​ປະ­ທານ ສຸ​ພາ­ນຸ​ວົງ ຄົບ­ຮອບ 110 ປີ (13 ກໍ­ລະ­ກົດ 1909-13 ກໍ­ລະ­ກົດ 2019) ໃຫ້​ເຕັມ​ໄປ​ດ້ວຍ​ຄວາມ​ໝາຍ​ສຳ­ຄັນ ແລະ ມີ​ບັນ­ຍາ­ກາດ​ຟົດ­ຟື້ນ ໃນ​ວັນ​ທີ 12 ກໍ­ລະ­ກົດ ທີ່​ພິ​ພິ​ທະ​ພັນ ໄກ­ສອນ ພົມ­ວິ­ຫານ ໄດ້​ຈັດ​ພິ­ທີ​ເປີດ​ວາງ­ສະ­ແດງ​ຮູບ​ພາບ ເອ­ກະ­ສານ ພາຍ​ໃຕ້​ຫົວ­ຂໍ້: “ປະ­ທານ ສຸ​ພາ­ນຸ​ວົງ ກ່ຽວ​ກັບ​ວຽກ​ງານ​ແນວ​ໂຮມ​ແຫ່ງ​ຊາດ” ຂຶ້ນ​ໂດຍ​ມີ​ທ່ານ ໄຊ​ສົມ​ພອນ ພົມ­ວິ­ຫານ ປະ­ທານ​ສູນ​ກາງ​ແນວ​ລາວ​ສ້າງ​ຊາດ ບັນ­ດາ​ລັດ­ຖະ­ມົນ­ຕີ ຮອງ​ລັດ­ຖະ­ມົນ­ຕີ ອົງ​ການ­ຈັດ­ຕັ້ງ​ມະ­ຫາ­ຊົນ ອະ­ດີດ​ພະ­ນັກ­ງານ ປະ­ຕິ­ວັດ​ອາ­ວຸ­ໂສ​ບຳ­ນານ ແລະ ພະ­ນັກ­ງານ-ລັດ­ຖະ­ກອນ​ອ້ອມ​ຂ້າງ​ເຂົ້າ​ຮ່ວມ.

    ງານ​ວາງ­ສະ­ແດງ​ຄັ້ງ​ນີ້ ຈັດ​ຂຶ້ນ​ເພື່ອ​ເປັນ​ການ​ຫວນ​ຄືນ​ມູນ­ເຊື້ອ​ສາ­ມັກ­ຄີ​ຕໍ່­ສູ້​ພິ­ລະ​ອາດ​ຫານ ຜົນ­ງານ​ອັນ​ໃຫຍ່​ຫຼວງ​ຂອງ​ແນວ​ໂຮມ​ແຫ່ງ​ຊາດ ໃນ​ຍຸກ​ສະ­ໄໝ​ປະ­ຫວັດ­ສາດ​ຜ່ານ​ມາ ຄວາມ​ປີ​ຊາ​ສາ­ມາດ ຄວາມ​ສະ­ຫຼາດ​ສ່ອງ​ໃສ​ຂອງ​ປະ­ຊາ­ຊົນ​ປະ­ຕິ­ວັດ​ລາວ ໃນ​ການ​ຊີ້​ນຳ-ນຳ­ພາ​ການ​ປະ­ຕິ­ວັດ ທັງ​ເປັນ​ການ​ລະ­ນຶກ​ຈົດ​ຈຳ​ເຖິງ​ໄຊ­ຊະ­ນະ​ອັນ​ຍິ່ງ​ໃຫຍ່​ຂອງ​ປະ­ຊາ­ຊົນ​ບັດ​ດາ​ເຜົ່າ ກໍ​ຄື​ຜົນ­ງານ​ອັນ​ລ້ຳ​ເລີດ ແລະ ຄຸນ­ງາມ­ຄວາມ­ດີ​ທີ່​ການ​ນຳ​ຮຸ່ນ​ກ່ອນ ໂດຍ​ສະ­ເພາະ ປະ­ທານ ສຸ​ພາ­ນຸ​ວົງ ແລະ ບັນ­ດາ​ຜູ້­ນຳ​ທ່ານ​ອື່ນໆ ທີ່​ໄດ້​ນຳ­ພາ ພາ­ລະ­ກິດ​ປະ­ຕິ­ວັດ​ຕໍ່­ສູ້​ປົດ​ປ່ອຍ​ຊາດ ຈົນ​ສາ­ມາດ​ກ້າວ​ໄປ​ເຖິງ​ການ​ສະ­ຖາ­ປະ­ນາ ສປປ ລາວ ໄດ້​ຢ່າງ​ສົມ­ບູນ.

    ທ່ານ ໄຊ​ສົມ​ພອນ ພົມ­ວິ­ຫານ ກ່າວ​ວ່າ: ຄື​ດັ່ງ​ທີ່​ພວກ​ເຮົາ​ຮູ້​ນຳ​ກັນ​ແລ້ວ​ວ່າ ປະ­ທານ ສຸ​ພາ­ນຸ​ວົງ ແມ່ນ​ປັນ­ຍາ​ຊົນ​ຜູ້​ຍິ່ງ​ໃຫຍ່ ເປັນ​ເຊື້ອ​ເຈົ້າ​ຜູ້​ໜຶ່ງ​ທີ່​ມີ​ນ້ຳ­ໃຈ​ຮັກ​ຊາດ​ອັນ​ດູດ­ດື່ມ ໄດ້​ເອົາ​ຊີ­ວິດ​ຂອງ​ຕົນ​ຕິດ​ພັນ​ກັບ​ການ​ຕໍ່­ສູ້​ປະ­ຕິ­ວັດ​ຂອງ​ປະ­ຊາ­ຊົນ​ເຮົາ ຕັ້ງ­ແຕ່​ຫົວ­ທີ ປະ­ທານ​ໄດ້​ເລີ່ມ​ຈາກ​ນັກ​ຮັກ​ຊາດ​ທີ່­ແທ້​ຈິງ ກາຍ­ເປັນ​ນັກ­ຮົບ​ປະ­ຕິ­ວັດ​ທີ່​ກ້າ­ແກ່ນ ເປັນ​ໜຶ່ງ​ໃນ​ບັນ­ດາ​ຜູ້­ນຳ​ທີ່​ດີ­ເດັ່ນ ແລະ ແສນ​ເຄົາ­ລົບ​ຮັກ​ຂອງ​ປະ­ຊາ­ຊົນ​ລາວ​ບັນ­ດາ­ເຜົ່າ.

    ໃນ​ຖາ­ນະ​ເປັນ​ປະ­ທານ​ປະ­ເທດ​ຜູ້​ທຳ​ອິດ​ຂອງ ສປປ ລາວ ເພິ່ນ​ໄດ້​ເສີມ​ຂະ­ຫຍາຍ​ຄວາມ​ເປັນ​ເຈົ້າ​ການ ປະ­ດິດ​ສ້າງ​ໃນ​ການ​ຄົ້ນ­ຄວ້າ​ຮ່ຳ­ຮຽນ​ທາງ​ດ້ານ​ທິດ​ສະ​ດີ ແລະ ພຶດ­ຕິ​ກຳ ຄົ້ນ­ຄວ້າ​ຫ້າວ­ຫັນ​ແນວ­ທາງ ແລະ ຈຸດ­ໝາຍ​ຂອງ​ພັກ​ເຂົ້າ​ໃນ​ພື້ນ­ຖານ​ຂອງ​ລັດ​ຢ່າງ​ເໝາະ​ສົມ ໄດ້​ສືບ­ຕໍ່​ເສີມ​ຂະ­ຫຍາຍ​ມູນ­ເຊື້ອ​ຈົງ​ຮັກ​ພັກ­ດີ​ຕໍ່​ພັກ ຕໍ່​ປະ­ເທດ​ຊາດ ແລະ ຕໍ່​ປະ­ຊາ­ຊົນ ປະ­ທານ​ໄດ້​ອຸ­ທິດ​ຕົນ​ຢ່າງ​ບໍ່​ຮູ້​ອິດ­ເມື່ອຍ ເພື່ອ​ຜົນ­ສຳ­ເລັດ​ຂອງ​ການ​ປົກ​ປັກ​ຮັກ­ສາ ແລະ ສ້າງ­ສາ​ພັດ­ທະ­ນາ​ປະ­ເທດ​ຊາດ ຢຶດ​ໝັ້ນ​ໃນ​ແນວ­ທາງ​ຂອງ​ພັກ ຖື​ປະ­ຊາ­ຊົນ​ເປັນ​ກົກ ແລະ ເຮັດ​ທຸກ​ສິ່ງ​ຢ່າງ​ເພື່ອ​ຜົນ​ປະ­ໂຫຍດ​ຂອງ​ປະ­ຊາ­ຊົນ.

    ປະ­ທານ ສຸ​ພາ­ນຸ​ວົງ ເປັນ­ໃຈ​ກາງ​ແຫ່ງ​ການ​ເຕົ້າ­ໂຮມ​ຄວາມ​ສາ­ມັກ­ຄີ​ຂອງ​ປວງ​ຊົນ​ລາວ​ບັນ­ດາ­ເຜົ່າ ທຸກ​ຊັ້ນ​ຄົນ ສາ­ສະ­ໜາ ແລະ ເພດ​ໄວ ປຸກ­ລະ­ດົມ​ຂົນ­ຂວາຍ​ປະ­ຊາ­ຊົນ ໃຫ້​ໂຮມ​ເຂົ້າ​ເປັນ​ກ້ອນ​ກຳ­ລັງ​ອັນ​ໜຶ່ງ​ດຽວ ໃນ​ການ​ໂຮມ​ເອ­ກະ​ພາບ​ແຫ່ງ​ຊາດ ເພື່ອ​ຕໍ່­ສູ້​ຕ້ານ​ສັດ­ຕູ​ຜູ້​ມາ​ຮຸກ​ຮານ ແລະ ລູກ​ແຫຼ່ງ​ຕີນ​ມື​ຂອງ​ພວກ​ເຂົາ ເຊິ່ງ​ນັ້ນ​ແມ່ນ​ໜຶ່ງ​ໃນ​ບັນ­ດາ​ປັດ​ໄຈ​ສຳ­ຄັນ ທີ່​ຮັບ­ປະ­ກັນ​ຕໍ່​ໄຊ­ຊະ­ນະ​ຂອງ​ການ​ປະ­ຕິ­ວັດ​ເຮົາ.

ຂ່າວທີ່ກ່ຽວຂ້ອງ