ຂ່າວຫຼ້າສຸດ

ປີ 2019 ທົ່ວປະເທດມີແຜນປ່ອຍປາສູ່ທຳມະຊາດ 50 ລ້ານໂຕ

217 15 ກ.ລ. 2019 ຂ່າວໜ້າ​ໜຶ່ງ
ປີ 2019 ທົ່ວປະເທດມີແຜນປ່ອຍປາສູ່ທຳມະຊາດ 50 ລ້ານໂຕ

    ພິ­ທີ​ປ່ອຍ​ປາ​ເນື່ອງ​ໃນ​ໂອ­ກາດ​ວັນ​ປ່ອຍ​ປາ​ອະ­ນຸ​ຮັກ​ສັດ​ນ້ຳ ແລະ ສັດ­ປ່າ​ແຫ່ງ​ຊາດ (13 ກໍ­ລະ­ກົດ) ຈັດ​ຂຶ້ນ​ວັນ​ທີ 13 ກໍ­ລະ­ກົດ 2019 ຢູ່​ອ່າງ​ນ້ຳ​ຊ່ວງ ເມືອງ​ນາ​ຊາຍ​ທອງ ນະ­ຄອນ­ຫຼວງ​ວຽງ​ຈັນ (ນວ) ໂດຍ​ມີ​ທ່ານ ສອນ​ໄຊ ສີ​ພັນ​ດອນ ຮອງ​ນາ­ຍົກ­ລັດ­ຖະ­ມົນ­ຕີ ທ່ານ ລຽນ ທິ​ແກ້ວ ລັດ­ຖະ­ມົນ­ຕີ​ກະ­ຊວງ​ກະ­ສິ­ກຳ ແລະ ປ່າ­ໄມ້ ທ່ານ ບຸນ​ທ່ຽງ ຂຸນ​ສີ ປະ­ທານ​ແນວ​ລາວ​ສ້າງ​ຊາດ ນວ ພ້ອມ​ດ້ວຍ​ການ​ນຳ​ພັກ-ລັດ ທູ­ຕາ­ນຸ­ທູດ ນັກ­ທຸ­ລະ­ກິດ​ເຂົ້າ​ຮ່ວມ.

    ທ່ານ ທອງ​ພັດ ວົງ​ມະ­ນີ ຮອງ​ລັດ­ຖະ­ມົນ­ຕີ​ກະ­ຊວງ​ກະ­ສິ­ກຳ ແລະ ປ່າ­ໄມ້ ກ່າວ​ວ່າ: ໂດຍ​ເຫັນ​ໄດ້​ຄວາມ​ສຳ­ຄັນ​ຂອງ​ປາ ສັດ​ນ້ຳ ແລະ ສັດ­ປ່າ ຕໍ່​ການ​ພັດ­ທະ­ນາ​ເສດ­ຖະ­ກິດ-ສັງ­ຄົມ​ແຫ່ງ​ຊາດ ຕໍ່​ການ​ປັບ­ປຸງ​ຊີ­ວິດ​ການ​ເປັນ​ຢູ່ ແລະ ຫຼຸດ­ຜ່ອນ​ຄວາມ­ທຸກ​ຍາກ​ຂອງ​ປະ­ຊາ­ຊົນ​ລາວ​ບັນ­ດາ­ເຜົ່າ ເພື່ອ​ເປັນ​ການ​ອະ­ນຸ​ຮັກ ແລະ ປັກ​ປັກ​ຮັກ­ສາ​ຊີ­ວະ​ນາໆພັນ​ໃຫ້​ມີ​ຄວາມ​ຍືນ​ຍົງ ພັກ ແລະ ລັດ­ຖະ­ບານ ກໍ​ຄື ສະ­ພາ​ແຫ່ງ​ຊາດ ໄດ້​ກຳ­ນົດ​ເອົາ​ວັນ​ທີ 13 ກໍ­ລະ­ກົດ​ຂອງ​ທຸກໆ​ປີ ເປັນ​ວັນ​ປ່ອຍ​ປາ ອະ­ນຸ​ຮັກ​ສັດ​ນ້ຳ ແລະ ສັດ­ປ່າ​ແຫ່ງ​ຊາດ ເຊິ່ງ​ໄດ້​ບັນ­ຍັດ​ໄວ້​ໃນ​ກົດ­ໝາຍ​ວ່າ​ດ້ວຍ​ສັດ​ນ້ຳ ແລະ ສັດ­ປ່າ ກໍ​ຄື ກົດ­ໝາຍ​ວ່າ​ດ້ວຍ​ການ​ປະ­ມົງ.

    ພັກ ແລະ ລັດ­ຖະ­ບານ ໃຫ້​ຄວາມ​ສຳ­ຄັນ​ຕໍ່​ວັນ​ປ່ອຍ​ປາ ອະ­ນຸ​ຮັກ​ສັດ​ນ້ຳ ແລະ ສັດ­ປ່າ​ແຫ່ງ​ຊາດ ໂດຍ​ການ​ໂຄ­ສະ­ນາ​ເຜີຍ­ແຜ່ ແລະ ສົ່ງ­ເສີມ​ຢ່າງ​ກວ້າງ­ຂວາງ​ໃນ​ທົ່ວ​ປະ­ເທດ ເຮັດ​ໃຫ້​ຂະ​ບວນ​ການ​ໃນ​ວັນ​ດັ່ງ­ກ່າວ​ເປັນ​ຂະ​ບວນ​ຟົດ­ຟື້ນ ໂດຍ​ມີ​ການ​ເຂົ້າ​ຮ່ວມ​ຂອງ​ທຸກ​ຊັ້ນ​ຄົນ ຊຸມ​ປີ​ທີ່​ຜ່ານ​ມາ​ກະ­ຊວງ​ກະ­ສິ­ກຳ ແລະ ປ່າ­ໄມ້ ກໍ​ຄື ກົມ​ກ່ຽວ­ຂ້ອງ​ໄດ້​ປະ­ສານ​ສົມ­ທົບ​ກັບ​ອຳ­ນາດ​ການ​ປົກ­ຄອງ​ທ້ອງ­ຖິ່ນ ເຄື່ອນ​ໄຫວ​ວຽກ​ງານ​ປ່ອຍ​ປາ ແລະ ອະ­ນຸ​ຮັກ​ສັດ​ນ້ຳ-ສັດ­ປ່າ ໃຫ້​ຂະ­ຫຍາຍ­ຕົວ ທັງ​ເພີ່ມ​ຈຳ­ນວນ​ປາ​ຂຶ້ນ​ແຕ່​ລະ​ປີ ເປັນ­ຕົ້ນ ປີ 2015 ໄດ້​ປ່ອຍ​ລູກ​ປາ​ປະ­ມານ 35 ລ້ານ​ໂຕ ປີ 2016 ປະ­ມານ 40 ລ້ານ​ໂຕ ປີ 2017 ປະ­ມານ 43 ລ້ານ​ໂຕ ປີ 2018 ຫຼາຍ​ກວ່າ 45 ລ້ານ​ໂຕ ມີ​ວັງ​ສະ­ຫງວນ​ຫຼາຍ​ກວ່າ 1.000 ວັງ ເນື້ອ­ທີ່​ຫຼາຍ​ກວ່າ 60.800 ເຮັກ­ຕາ ມີ​ລະ­ບຽບ​ການ​ຄຸ້ມ​ຄອງ​ວັງ​ທີ່​ໄດ້​ລົງ​ນາມ​ຮັບ­ຮອງ​ຈາກ​ພາກ­ສ່ວນ​ກ່ຽວ­ຂ້ອງ​ແລ້ວ 638 ວັງ ເຮັດ​ໃຫ້​ປະ­ຊາ­ກອນ​ປາ ແລະ ສັດ​ນ້ຳ​ຕ່າງໆ​ນັບ​ມື້​ເພີ່ມ​ຂຶ້ນ.

    ສຳ­ລັບ ປີ 2019 ມີ​ແຜນ​ຈະ​ປ່ອຍ​ປາ​ສູ່​ທຳ​ມະ​ຊາດ 50 ລ້ານ​ໂຕ ໃນ​ທົ່ວ​ປະ­ເທດ ສະ­ເພາະ ນວ ມີ​ເປົ້າ​ໝາຍ​ປ່ອຍ​ປາ 580.000 ໂຕ ໂດຍ​ມື້­ນີ້​ພວກ​ເຮົາ​ໄດ້​ປ່ອຍ​ປາ 250.000 ໂຕ ປະ­ກອບ​ມີ ປາ­ປາກ ປາ­ເຂັງ ປາ​ເກັດ​ແລບ ປາ​ນິນ ແລະ ປາ­ໄນ ນອກ​ນີ້​ຍັງ​ໄດ້​ປ່ອຍ​ພໍ່​ພັນ-ແມ່​ພັນ​ປາ​ທຳ​ມະ​ຊາດ 550 ໂຕ ເຊິ່ງ​ມີ ປາ­ກົດ 100 ໂຕ ປາ​ໝູ 100 ໂຕ ປາ­ເຂັງ 100 ໂຕ ປາ​ເພ້ຍ 100 ໂຕ ປາ​ຊວາຍ 100 ໂຕ ປາ​ເໝັ້ນ 50 ໂຕ ແລະ ລູກ​ປາ­ຝາ 99 ໂຕ.

ຂ່າວທີ່ກ່ຽວຂ້ອງ