ຂ່າວຫຼ້າສຸດ

ຮອງນາຍົກຕິດຕາມ ແລະ ຊຸກຍູ້ການແກ້ໄຂບັນຫາ ການແຜ່ລະບາດຂອງຝູງບົ້ງສາລີ

262 15 ກ.ລ. 2019 ຂ່າວໜ້າ​ໜຶ່ງ
ຮອງນາຍົກຕິດຕາມ ແລະ ຊຸກຍູ້ການແກ້ໄຂບັນຫາ ການແຜ່ລະບາດຂອງຝູງບົ້ງສາລີ

    ວັນ​ທີ 11 ກໍ­ລະ­ກົດ 2019 ທ່ານ ສອນ​ໄຊ ສີ​ພັນ​ດອນ ຮອງ​ນາ­ຍົກ­ລັດ­ຖະ­ມົນ­ຕີ ພ້ອມ​ດ້ວຍ​ຄະ­ນະ ໄດ້​ເດີນ­ທາງ​ໄປ​ເຄື່ອນ​ໄຫວ​ຢ້ຽມ­ຢາມ​ແຂວງ​ໄຊ​ຍະ​ບູ​ລີ ມີ​ທ່ານ ພົງ​ສະ­ຫວັນ ສິດ​ທະ​ວົງ ເຈົ້າ­ແຂວງ​ໄຊ​ຍະ​ບູ​ລີ ພ້ອມ​ດ້ວຍ​ອຳ­ນາດ​ການ​ປົກ­ຄອງ​ແຂວງ ແລະ ປະ­ຊາ­ຊົນ​ແຂວງ​ໄຊ​ຍະ​ບູ​ລີ ໃຫ້­ການ​ຕ້ອນ­ຮັບ.

    ໂອ­ກາດ​ດັ່ງ­ກ່າວ ທ່ານ ສອນ​ໄຊ ສີ​ພັນ​ດອນ ພ້ອມ​ດ້ວຍ​ຄະ­ນະ ໄດ້​ລົງ​ຕິດ­ຕາມ​ສະ­ພາບ​ການ​ລະ­ບາດ​ຂອງ​ບົ້ງ​ຝູງ​ສາ­ລີ ຢູ່​ທີ່​ເມືອງ​ປາກ​ລາຍ ແລະ ໄດ້​ຮັບ​ຟັງ​ການ​ລາຍ​ງານ​ຈາກ​ວິ­ຊາ​ການ​ພະ​ແນກ​ກະ­ສິ­ກຳ ແລະ ປ່າ­ໄມ້​ແຂວງ ວ່າ: ໃນ​ລະ­ຫວ່າງ​ວັນ​ທີ 20 ພຶດ­ສະ­ພາ 2019 ໄດ້​ເກີດ​ມີ​ການ​ລະ­ບາດ​ຂອງ​ບົ້ງ​ຝູງ​ສາ­ລີ ຢູ່​ເມືອງ​ປາກ​ລາຍ ແຂວງ​ໄຊ​ຍະ​ບູ​ລີ ເຊິ່ງ​ພົບ​ການ​ລະ­ບາດ​ເບື້ອງ​ຕົ້ນ ຈຳ­ນວນ 7 ບ້ານ ມີ​ເນື້ອ­ທີ່​ຖືກ​ທຳ­ລາຍ​ຈຳ­ນວນ​ເກືອບ 3 ພັນ​ເຮັກ­ຕາ ມາ​ຮອດ​ວັນ​ທີ 24 ມິ­ຖຸ­ນາ 2019 ບົ້ງ​ດັ່ງ­ກ່າວ ກໍ​ໄດ້​ແຜ່​ລາມ​ອອກ​ເປັນ​ວົງ​ກວ້າງ​ໃນ​ຂອບ​ເຂດ​ທົ່ວ​ແຂວງ ມາ​ຮອດ​ວັນ​ທີ 10 ກໍ­ລະ­ກົດ 2019 ມີ​ເນື້ອ­ທີ່​ສາ­ລີ​ຖືກ​ຜົນ​ກະ­ທົບ​ຈາກ​ບົ້ງ​ຝູງ​ທຳ­ລາຍ​ຈຳ­ນວນ 15 ພັນ​ກວ່າ​ເຮັກ­ຕາ ໃນ​ຈຳ­ນວນ 11 ເມືອງ​ໃນ​ທົ່ວ​ແຂວງ ມີ​ເນື້ອ­ທີ່​ເສຍ​ຫາຍ​ສູງ​ເກືອບ 7 ພັນ​ເຮັກ­ຕາ ມີ 168 ບ້ານ ມີ 7.058 ຄອບ­ຄົວ ແລະ ມີ​ບົ້ງ​ຝູງ​ທຳ­ລາຍ​ເຂົ້າ­ໄຮ່​ຂອງ​ຊາວ​ກະ­ສິ­ກອນ ເມືອງ​ໄຊ​ສະ­ຖານ ຈຳ­ນວນ 95,88 ເຮັກ­ຕາ ມີ 10 ບ້ານ ມີ 241 ຄອບ­ຄົວ ໄລ­ຍະ​ຜ່ານ​ມາ ແຂວງ​ໄດ້​ສະ­ໜອງ​ງົບ­ປະ­ມານ​ເພື່ອ​ຈັດ​ຊື້​ຢາ emamectin benzoate ແລະ ກົມ​ປູກ­ຝັງ​ໄດ້​ສະ­ໜອງ​ຢາ​ໃຫ້ ແລະ ອຸ­ປະ­ກອນ​ຈຳ­ນວນ​ໜຶ່ງ ຄິດ​ເປັນ​ມູນ​ຄ່າ 125 ລ້ານ​ກີບ ຢາ​ດັ່ງ­ກ່າວ ສາ­ມາດ​ນຳ​ໃຊ້​ໄດ້ 2.400 ເຮັກ­ຕາ ເທົ່າ​ກັບ 26% ຂອງ​ເນື້ອ­ທີ່​ຜົນ​ກະ­ທົບ ປັດ­ຈຸ­ບັນ ໄດ້​ໝູນ​ໃຊ້​ງົບ­ປະ­ມານ​ຈັດ​ຊື້​ຢາ​ໃຫ້​ຊາວ​ກະ­ສິ­ກອນ​ໄດ້​ທັງ​ໝົດ ຈຳ­ນວນ 7 ຊຸດ ໄດ້​ຢາ​ທັງ​ໝົດ 7.200 ຊອງ ຄິດ​ເປັນ​ມູນ​ຄ່າ 252 ລ້ານ​ກີບ ນອກ​ນີ້ ຊາວ​ກະ­ສິ­ກອນ​ໄດ້​ຈັດ​ຊື້​ຢາ​ມາ​ນຳ​ໃຊ້​ເອງ​ຈຳ­ນວນ​ໜຶ່ງ ຕາມ​ການ​ແນະ­ນຳ​ຂອງ​ພະ­ນັກ­ງານ​ວິ­ຊາ​ການ ຕໍ່​ກັບ​ການ​ລະ­ບາດ​ຂອງ​ບົ້ງ​ຝູງ​ສາ­ລີ​ນີ້ ຖ້າ​ການ​ປ້ອງ​ກັນ ແລະ ກຳ­ຈັດ​ບໍ່​ທັນ​ກັບ​ສະ­ພາບ​ການ ອາດ​ເຮັດ​ໃຫ້​ເນື້ອ­ທີ່​ປູກ​ສາ­ລີ​ສຳ­ເລັດ​ໄປ​ແລ້ວ​ນັ້ນ ຖືກ​ບົ້ງ​ເຂົ້າ​ທຳ­ລາຍ​ທັງ​ໝົດ ແລະ ອາດ​ຈະ​ແຜ່​ລາມ​ລົງ​ສູ່​ເຂົ້າ­ນາ ແລະ ເຂົ້າ­ໄຮ່.

    ໂອ­ກາດ​ນີ້ ທ່ານ ສອນ​ໄຊ ສີ​ພັນ​ດອນ ໄດ້​ແນະ­ນຳ​ໃຫ້​ແກ່​ວິ­ຊາ​ການ ກໍ​ຄື ອຳ­ນາດ​ການ​ປົກ­ຄອງ​ທຸກ​ຂັ້ນ ຈົ່ງ​ເອົາ­ໃຈ­ໃສ່​ບາງ​ດ້ານ ເປັນ­ຕົ້ນ ສືບ­ຕໍ່​ເອົາ­ໃຈ­ໃສ່​ຕິດ­ຕາມ​ຜົນ​ເສຍ​ຫາຍ​ທີ່​ເກີດ​ຂຶ້ນ ພ້ອມ​ທັງ​ມີ​ແຜນ­ການ​ແກ້​ໄຂ​ບັນ­ຫາ​ດັ່ງ­ກ່າວ ສະ­ເພາະ​ໜ້າ ແລະ ຍາວ​ນານ ໂດຍ​ສະ­ເພາະ ການ​ກະ­ກຽມ​ປູກ​ພືດ​ຊະ­ນິດ​ອື່ນ​ເພື່ອ​ທົດ​ແທນ ເປັນ­ຕົ້ນ ພືດ​ລົ້ມ​ລຸກ ແລະ ການ​ລ້ຽງ­ສັດ ນອກ​ນັ້ນ ໃຫ້​ເອົາ­ໃຈ­ໃສ່​ໃນ​ການ​ນຳ​ໃຊ້​ວິ­ທີ​ໃນ​ການ​ກຳ­ຈັດ​ໃຫ້​ຖືກ​ວິ­ທີ​ວິ­ທະ­ຍາ­ສາດ ກັບ​ການ​ນຳ​ໃຊ້​ວິ­ທີ​ທຳ­ລາຍ​ແບບ​ທ້ອງ­ຖິ່ນ ສຳ­ຄັນ​ແມ່ນ​ໃຫ້​ປະ­ຊາ­ຊົນ​ເປັນ​ເຈົ້າ​ໃນ​ການ​ປ້ອງ​ກັນ ຕິດ­ຕາມ ແລະ ແກ້​ໄຂ​ຢ່າງ​ເປັນ​ປົກ­ກະ­ຕິ ເອົາ­ໃຈ­ໃສ່​ໂຄ­ສະ­ນາ​ເຜີຍ­ແຜ່​ວິ­ທີ​ການ​ປ້ອງ​ກັນ ແລະ ແກ້​ໄຂ​ບັນ­ຫາ​ການ​ແຜ່​ລະ­ບາດ​ຂອງ​ຝູງ​ບົ້ງ​ສາ­ລີ​ຢ່າງ​ທັນ​ການ ຜ່ານ​ສື່​ຕ່າງໆ​ໃຫ້​ປະ­ຊາ­ຊົນ​ໄດ້​ຮັບ​ຮູ້​ຢ່າງ​ທົ່ວ​ເຖິງ ໃຫ້​ເອົາ­ໃຈ­ໃສ່​ຍາດ​ແຍ່ງ​ການ​ຊ່ວຍ­ເຫຼືອ​ຈາກ​ສາ­ກົນ ໂດຍ​ສະ­ເພາະ ອຸ­ປະ­ກອນ ຢາ​ປາບ​ສັດ­ຕູ​ພືດ ບົດ­ຮຽນ ແລະ ເຕັກ­ນິກ​ຕ່າງໆ​ໃນ​ການ​ແກ້​ບັນ­ຫາ​ດັ່ງ­ກ່າວ.

    ໃນ​ໂອ­ກາດ​ລົງ​ເບິ່ງ​ຜົນ​ເສຍ​ຫາຍ​ໃນ​ຄັ້ງ​ນີ້ ທ່ານ​ຮອງ​ນາ­ຍົກ­ລັດ­ຖະ­ມົນ­ຕີ ໄດ້​ມອບ​ເງິນ​ຈຳ­ນວນ 30 ລ້ານ​ກີບ ໃຫ້​ແກ່​ອຳ­ນາດ​ການ​ປົກ­ຄອງ​ບ້ານ​ໃຫຍ່​ພັດ­ທະ­ນາ​ບວມ​ເລົາ-ຜາ​ແກ້ວ ເມືອງ​ປາກ​ລາຍ ເພື່ອ​ນຳ​ໃຊ້​ເຂົ້າ​ໃນ​ການ​ທຳ­ລາຍ​ບົ້ງ​ຕື່ມ​ອີກ.

ຂ່າວທີ່ກ່ຽວຂ້ອງ