ສະພາ​ແຫ່ງ​ຊາດ​ອູ​ແກຣນ ຮັບຮອງ​ຂໍ້​ຕົກລົງ FTA ກັບ​ອິດ​ສະ​ຣາ​ແອນ

199 15 ກ.ລ. 2019 ຂ່າວຕ່າງປະເທດ
ສະພາ​ແຫ່ງ​ຊາດ​ອູ​ແກຣນ ຮັບຮອງ​ຂໍ້​ຕົກລົງ FTA ກັບ​ອິດ​ສະ​ຣາ​ແອນ

   ຂ່າວສານ​ຊິນ​ຮວາ ອ້າງ​ຕາມ​ຂໍ້​ມູນ​ຈາກ​ເວບ​ໄຊ ຂອງ​ສະພາ​ແຫ່ງ​ຊາດ​ອູ​ແກຣນ ທີ່​ມີ​ອອກ​ມາ​ເມື່ອ​ວັນ​ທີ 11 ກໍລະກົດ​ນີ້ ໃຫ້​ຮູ້​ວ່າ ອົງການ​ນິຕິ​ບັດ​ຍັດ​ຂອງ​ອູ​ແກຣນ ໄດ້​ຮັບຮອງ​ຂໍ້​ຕົກລົງ​ສາກົນ ກ່ຽວ​ກັບ​ເຂດ​ການ​ຄ້າ​ເສລີ (FTA) ກັບ​ອິດ​ສະ​ຮາ​ແອນ.

    ເມື່ອ​ວັນ​ທີ 21 ມັງກອນ​ທີ່​ຜ່ານ​ມາ ອູ​ແກຣນ ແລະ ອິດ​ສະ​ຣາ​ແອນ ໄດ້​ລົງ​ນາມ​ໃນ FTA ຊຶ່ງ​ຕາມ​ນັ້ນແລ້ວ​ກໍ​ແມ່ນ ອິດ​ສະ​ຣາ​ແອນ ຍົກເລີກ​ພາສີ​ນຳ​ເຂົ້າ​ປະມານ 80% ກັບ​ບັນດາ​ສິນຄ້າ​ອຸດສາຫະກຳ ແລະ ກວ່າ 9% ກັບ​ບັນດາ​ຜະລິດ​ຕະ​ພັນ​ກະສິກຳ ຂອງ​ອູ​ແກຣນ.

    ທາງ​ຝ່າຍ​ອູ​ແກຣນ ແມ່ນ​ຈະ​ຍົກເລີກ​ພາສີ​ນຳ​ເຂົ້າ​ປະມານ 70% ກັບ​ບັນດາ​ສິນຄ້າ​ອຸດສາຫະກຳ ແລະ ກວ່າ 6% ກັບ​ບັນດາ​ຜະລິດ​ຕະ​ພັນ​ກະສິກຳ​ຂອງ​ອິດ​ສະ​ຣາ​ແອນ.

    ທ່ານ​ນາງ ນາ​ຕາ​ເລຍ ມີ​ໂກລ​ສະກາ​ຢາ ອະດີດ​ຮອງ​ລັດຖະມົນຕີ​ກະຊວງ​ພັດທະນາ​ເສດຖະກິດ ແລະ ການ​ຄ້າ​ຂອງ​ອູ​ແກຣນ ເວົ້າ​ວ່າ FTA ກັບ​ອິດ​ສະ​ຣາ​ແອນ ຈະ​ເປັນ​ການ​ເປີດ​ໄຟ​ຂຽວ​ໃຫ້​ແກ່​ການ​ຮ່ວມ​ມື​ລະຫວ່າງ​ສອງ​ຝ່າຍ ໃນ​ຂົງເຂດ​ເຕັກ​ໂນ​ໂລ​ຊີ​ສູງ ເຕັກນິກ ອຸປະກອນ​ການ​ປຸງ​ແຕ່ງອາຫານ ແລະ ຂະແໜງ​ອຸດສາຫະກຳ​ອື່ນໆ.

FTA ລະຫວ່າງ​ອູ​ແກຣນ ກັບ​ອິດ​ສະ​ຣາ​ແອນ ຈະ​ມີ​ຜົນ​ບັງຄັບ​ໃຊ້ ຫຼັງ 60 ວັນ ນັບ​ແຕ່​ທີ່​ໄດ້​ຮັບ​ການ​ຮັບຮອງ​ຈາກ​ສະພາ​ແຫ່ງ​ຊາດ​ຂອງ​ສອງ​ປະເທດ.

ຂ່າວທີ່ກ່ຽວຂ້ອງ