ດັດ​ສະ​ນີ​ລາຄາ​ບໍລິໂພກ​ຂອງ​ຈີນ​ໃນ​ເດືອນ​ມິຖຸນາ​ເພີ່ມ​ຂຶ້ນ 2,7%

99 15 ກ.ລ. 2019 ຂ່າວຕ່າງປະເທດ
ດັດ​ສະ​ນີ​ລາຄາ​ບໍລິໂພກ​ຂອງ​ຈີນ​ໃນ​ເດືອນ​ມິຖຸນາ​ເພີ່ມ​ຂຶ້ນ 2,7%

   ເມື່ອ​ບໍ່​ດົນ​ມາ​ນີ້ ກົມ​ສະຖິຕິ​ແຫ່ງ​ຊາດ​ຈີນ ໄດ້​ເປີດເຜີຍ​ວ່າ ໃນ​ເດືອນ​ມິຖຸນາ​ຜ່ານ​ມາ ດັດ​ສະ​ນີ​ລາຄາ​ບໍລິໂພກ (CPI) ຂອງ​ປະຊາຊົນ​ທົ່ວ​ປະເທດ​ຈີນ ໄດ້​ເພີ່ມ​ຂຶ້ນ 2,7% ເມື່ອ​ທຽບໃສ່​ໄລຍະ​ດຽວ​ກັນ​ຂອງ​ປີ 2018; ແລະ ໃນ 6 ເດືອນ​ຕົ້ນ​ປີ​ນີ້ CPI ເພີ່ມ​ຂຶ້ນ 2,2% ເມື່ອ​ທຽບໃສ່​ໄລຍະ​ດຽວ​ກັນ​ຂອງ​ປີ 2018.

    ໃນ​ເດືອນ​ມິຖຸນາ​ທີ່​ຜ່ານ​ມາ ລາຄາ​ສິນຄ້າ ແລະ ການ​ບໍລິການ ຈຳນວນ 8 ປະເພດ​ໃນ CPI ນັ້ນ ມີ 7 ປະເພດ​ເພີ່ມ​ຂຶ້ນ ແລະ ມີ​ປະເພດ​ດຽວ​ຫຼຸດ​ລົງ. ໃນ​ນັ້ນ ລາຄາ​ຂອງ​ອາຫານ ຢາສູບ ແລະ ເຫຼົ້າ​ເພີ່ມ​ຂຶ້ນ 6,1% ເມື່ອ​ທຽບໃສ່​ໄລຍະ​ດຽວ​ກັນ​ຂອງ​ປີ 2018 ຊຶ່ງ​ໄດ້​ເຮັດ​ໃຫ້ CPI ເພີ່ມ​ຂຶ້ນ 1,79%. ລາຄາ​ຂອງ​ໝາກ​ໄມ້​ເພີ່ມ​ຂຶ້ນ 42,7% ລາຄາ​ຊີ້ນ​ເພີ່ມ​ຂຶ້ນ 14,4% (ສະເພາະ​ຊີ້ນ​ໝູ​ເພີ່ມ​ຂຶ້ນ 21,1%) ລາຄາ​ໄຂ່​ໄກ່​ເພີ່ມ​ຂຶ້ນ 6,1% ແລະ ລາຄາ​ຜັກ​ເພີ່ມ​ຂຶ້ນ 4,2%.

    ລາຄາ​ຂອງ​ເຄື່ອງໃຊ້ ແລະ ການ​ບໍລິການ​ອື່ນໆ​ເພີ່ມ​ຂຶ້ນ 2,7% ການ​ປິ່ນປົວ ແລະ ການ​ຮັກສາ​ສຸຂະພາບ​ເພີ່ມ​ຂຶ້ນ 2,5% ການ​ສຶກ​ສາ ວັດທະນະທຳ ແລະ ພັກຜ່ອນ​ຢ່ອນ​ອາລົມ ເພີ່ມ​ຂຶ້ນ 2,4%; ລາຄາ​ເຄື່ອງນຸ່ງ​ຫົ່ມ​ເພີ່ມ​ຂຶ້ນ 1,8% ເຮືອນ​ຢູ່​ເພີ່ມ​ຂຶ້ນ 1,6% ເຄື່ອງໃຊ້​ປະຈຳ​ວັນ ແລະ ການ​ບໍລິການ​ເພີ່ມ​ຂຶ້ນ 0,8%; ລາຄາ​ການ​ສັນຈອນ ແລະ ການ​ສື່ສານ​ຫຼຸດ​ລົງ 1,9%.

ຂ່າວທີ່ກ່ຽວຂ້ອງ