ຂ່າວຫຼ້າສຸດ

ຄັດເລືອກເອົານັກຮຽນເຂົ້າສຶກສາຕໍ່ ມຊ ຈະເລີ່ມຕົ້ນເດືອນສິງຫານີ້

285 15 ກ.ລ. 2019 ຂ່າວໜ້າ​ໜຶ່ງ
ຄັດເລືອກເອົານັກຮຽນເຂົ້າສຶກສາຕໍ່ ມຊ ຈະເລີ່ມຕົ້ນເດືອນສິງຫານີ້

    ໂດຍ​ປະ­ຕິ­ບັດ​ຕາມ​ທິດ​ຊີ້​ນຳ​ຂອງ​ກະ­ຊວງ​ສຶກ​ສາ​ທິ​ການ ແລະ ກີ­ລາ ກໍ​ຄື ແຜນ­ການ​ສອບ­ເສັງ​ຄັດ​ເລືອກ​ເອົາ​ນັກ​ສຶກ​ສາ ເຂົ້າ​ຮຽນ​ມະ­ຫາ­ວິ­ທະ­ຍາ­ໄລ​ແຫ່ງ​ຊາດ (ມຊ) ປະ­ຈຳ​ສົກ​ສຶກ​ສາ 2019-2020 ແນ­ໃສ່​ຄັດ​ເລືອກ​ເອົາ​ນັກ​ສຶກ​ສາ ຜູ້​ທີ່​ມີ​ຄວາມ​ສົນ­ໃຈ​ຢາກ​ເຂົ້າ​ຮຽນ​ໃນ​ສາ­ຂາ​ວິ­ຊາ​ຕ່າງໆ​ຂອງ ມຊ ໃຫ້​ໄດ້​ຕາມ​ແຜນ­ທີ່​ກຳ­ນົດ​ໄວ້.

    ການ​ສອບ­ເສັງ​ປີ​ນີ້ ແມ່ນ​ປະ­ຕິ­ບັດ​ຕາມ​ແຜນ­ການ​ສອບ­ເສັງ​ຄັດ​ເລືອກ​ໃນ​ປີ­ຜ່ານ­ມາ ໂດຍ​ກຳ­ນົດ​ສອບ­ເສັງ​ວັນ​ທີ 3 ສິງ­ຫາ 2019 ສາ­ມາດ​ລົງ­ທະ­ບຽນ​ທາງ​ອອນ​ລາຍ​ຜ່ານ www.entrance.nuol.edu.la ສຳ­ລັບ​ຜູ້​ຢູ່​ໄກ ແລະ ບໍ່​ມີ​ເງື່ອນ­ໄຂ​ສະ­ດວກ​ໃນ​ການ​ມາ​ລົງ­ທະ­ບຽນ​ດ້ວຍ​ຕົນ​ເອງ ເຊິ່ງ​ເປີດ​ໃຫ້​ລົງ­ທະ­ບຽນ​ອອນ​ລາຍ​ແຕ່​ວັນ​ທີ 1-30 ກໍ­ລະ­ກົດ 2019 ຈາກ​ນັ້ນ ກໍ​ນຳ​ເອ­ກະ­ສານ​ມາ​ສະ­ເໜີ ແລະ ຮັບ​ບັດ​ເຂົ້າ​ຫ້ອງ​ສອບ­ເສັງ​ໄດ້​ຢູ່​ສະ­ໂມ­ສອນ​ໃຫຍ່ ມຊ ແຕ່​ວັນ​ທີ 8-30 ກໍ­ລະ­ກົດ 2019 ຫຼື ສາ­ມາດ​ເຂົ້າ​ມາ​ສອບ​ຖາມ ແລະ ລົງ­ທະ­ບຽນ​ໄດ້​ຢູ່​ສະ­ຖານ­ທີ່​ດັ່ງ­ກ່າວ ພ້ອມ​ທັງ​ຕິດ­ຕາມ​ລາຍ​ຊື່ ແລະ ສະ­ຖານ­ທີ່​ສອບ­ເສັງ​ຂອງ​ຕົນ​ໄດ້ ວັນ​ທີ 2 ສິງ­ຫາ 2019 ເພື່ອ​ກຽມ­ພ້ອມ​ເຂົ້າ​ຫ້ອງ​ເສັງ ວັນ​ທີ 3 ສິງ­ຫາ ໂດຍ​ການ​ສອບ­ເສັງ​ໄດ້​ແບ່ງ​ເປັນ 3 ກຸ່ມ ຄື: ກຸ່ມ A (ສາຍ​ທຳ​ມະ​ຊາດ) ມີ​ວິ­ຊາ​ຄະ­ນິດ­ສາດ ພາ­ສາ​ລາວ-ວັນ­ນະ­ຄະ­ດີ ຟີ​ຊິກ​ສາດ ເຄ​ມີ​ສາດ ຊີ­ວະ​ສາດ ກຸ່ມ B (ສາຍ​ສັງ­ຄົມ) ມີ​ວິ­ຊາ​ຄະ­ນິດ­ສາດ ພາ­ສາ​ລາວ-ວັນ­ນະ­ຄະ­ດີ ພູມ​ສາດ ປະ­ຫວັດ­ສາດ ກຸ່ມ C (ສັງ­ຄົມ ແລະ ທຳ​ມະ​ຊາດ) ມີ​ວິ­ຊາ​ຄະ­ນິດ­ສາດ ເຄ​ມີ​ສາດ ຊີ­ວະ​ສາດ ພູມ​ສາດ ປະ­ຫວັດ­ສາດ ພາ­ສາ​ລາວ-ວັນ­ນະ­ຄະ­ດີ ເວ­ລາ​ສອບ­ເສັງ 9:00 ໂມງ-11: 00 ໂມງ ແລະ 14:00-15:30 ໂມງ.

    ສຳ­ລັບ​ເອ­ກະ­ສານ​ທີ່​ຕ້ອງ​ປະ­ກອບ​ຄັດ​ໃສ່​ເອ­ກະ­ສານ​ສະ­ໝັກ​ສອບ­ເສັງ​ປະ­ກອບ​ມີ ສຳ­ລັບ​ນັກ­ຮຽນ​ທີ່​ຈົບ​ສົກ­ຮຽນ 2018-2019 ມີ​ສຳ​ເນົາ​ບັດ​ເຂົ້າ​ຫ້ອງ​ເສັງ ມ7 (1 ສະ­ບັບ) ສ່ວນ​ນັກ­ຮຽນ​ທີ່​ຈົບ​ກ່ອນ​ສົກ ຮຽນ 2018-2019 ມີ​ສຳ​ເນົາ​ປະ​ກາ​ສະ​ນິ​ຍະ​ບັດ ມ7 (1 ສະ­ບັບ) ສຳ​ເນົາ​ບັດ­ປະ­ຈຳ­ຕົວ ຫຼື ສຳ​ເນົາ​ປື້ມ​ສຳ­ມະ­ໂນ​ຄົວ​ທີ່​ມີ​ຮູບ​ຜູ້​ສະ­ໝັກ​ຕິດ​ຢູ່ (1 ສະ­ບັບ) ຮູບ 3X4 (ຖ່າຍ​ບໍ່​ເກີນ 3 ເດືອນ) 2 ໃບ ນັກ­ຮຽນ ມ7 ທີ່​ຈົບ​ສົກ­ຮຽນ 2018-2019 ໃຫ້​ເອົາ​ຮູບ​ດຽວ​ກັນ​ກັບ​ຮູບ​ໃນ​ບັດ​ເຂົ້າ​ຫ້ອງ​ສອບ­ເສັງ ມ7 ແລະ ເອ­ກະ­ສານ​ທຸກ​ຢ່າງ ຕ້ອງ​ມີ​ຕົ້ນ​ສະ­ບັບ​ມາ​ຢັ້ງ­ຢືນ ເພື່ອ​ກວດ​ສອບ​ຄວາມ​ຖືກ­ຕ້ອງ.

ຂ່າວທີ່ກ່ຽວຂ້ອງ