ຂ່າວຫຼ້າສຸດ

ຜູ້ນຳ​ຂອງ ​ສປຊ ເວົ້າ​ເຖິງ​ບັນຫາ​ປະຊາກອນ​ໂລກ

202 15 ກ.ລ. 2019 ຂ່າວຕ່າງປະເທດ
ຜູ້ນຳ​ຂອງ ​ສປຊ ເວົ້າ​ເຖິງ​ບັນຫາ​ປະຊາກອນ​ໂລກ

   ໃນ​ຖະແຫຼງການ​ທີ່​ມີ​ອອກ​ມາ​ເນື່ອງ​ໃນ​ໂອກາດ​ວັນ​ປະຊາກອນ​ໂລກ (11 ກໍລະກົດ) ປີ​ນີ້ ທ່ານ ອັນໂຕ​ນີ​ໂອ ກູ​ເຕີ​ເຣ​​ສ ເລຂາທິການ​ໃຫຍ່​ສະຫະ​ປະຊາ​ຊາດ (​ສປຊ) ໄດ້​ເນັ້ນ​ໜັກ​ເຖິງ​ຄວາມ​ເປັນ​ຈິງ​ທີ່​ໜ້າ​ກັງວົນ ນັ້ນ​ກໍ​ຄື​ສິດຜົນປະໂຫຍດ​ຂອງ​ແມ່ຍິງ​ໃນ​ທົ່ວ​ໂລກ ໃນ​ນັ້ນ​ມີ​ສິດທິ​ໃນ​ການ​ໄດ້​ຮັບ​ການ​ບໍລິການ​ດ້ານ​ການ​ແພດ​ຂັ້ນ​ພື້ນຖານ ພວມ​ໄດ້​ຮັບ​ຄວາມ​ເສຍ​ຫາຍ.

    ການ​ທຳຮ້າຍ​ຕໍ່​ແມ່ຍິງ ທີ່​ເລີ່ມ​ມາ​ຈາກ​ຄວາມ​ສຳນຶກ “ຖື​ຜູ້​ຊາຍ​ສຳຄັນ​ກວ່າ​ແມ່ຍິງ” ເກີດ​ຂຶ້ນ​ແພ່​ຫຼາຍ ນັບ​ວ່າ​ເປັນ​ການ​ແຈ້ງ​ເຕືອນ​ໄພ. ໃນ​ຂະນະ​ດຽວ​ກັນ ປະຊາກອນ​ໂລກ ສືບຕໍ່​ເພີ່ມ​ຂຶ້ນ​ຢ່າງ​ບໍ່​ສະ​ໝ່ຳ​ສະເໝີ​ລະຫວ່າງ​ພາກ​ພື້ນ​ຕ່າງໆ. ຢູ່​ໃນ​ສ່ວນ​ຫຼາຍ​ຂອງ​ບັນດາ​ປະເທດ​ດ້ອຍ​ພັດທະນາ ມີ​ປະຊາກອນ​ເພີ່ມ​ຂຶ້ນ​ຢ່າງ​ໄວ ຕາມ​ມາ​ດ້ວຍ​ບັນຫາ​ໃຫຍ່ໆ​ຕໍ່​ຄວາມ​ເຕີບ​ໂຕ​ແບບ​ຍືນ​ຍົງ ແລະ ສິ່ງແວດລ້ອມ. ໃນ​ທາງ​ກົງກັນຂ້າມ ຫຼາຍ​ປະເທດ​ທີ່​ພັດທະນາ ພັດ​ປະ​ເຊີນ​ກັບ​ຄວາມ​ທ້າ​ທາຍ ກ່ຽວ​ກັບ​ສັງຄົມ​ຄົນ​ສູງ​ອາຍຸ.

    ຂະ​ບວນ​ການ​ຫັນ​ເປັນ​ຕົວ​ເມືອງ ສືບຕໍ່​ເກີດ​ຂຶ້ນ ຊຶ່ງ​ດ້ວຍ​ຈັງຫວະ​ການ​ຫັນ​ເປັນ​ຕົວ​ເມືອງ ທີ່​ເປັນ​ໄປ​ຢ່າງ​ໄວວາ​ຄື​ໃນ​ປັດຈຸບັນ​ນີ້ ເມື່ອ​ຮອດ​ປີ 2050 ຈະ​ມີ​ປະຊາກອນ​ໂລກ 68% ອາ​ໃສ​ຢູ່​ໃນ​ເຂດ​ຕົວ​ເມືອງ ໂດຍ​ທ່ານ ກູ​ເຕີ​ເຣ​​ສ ເປັນ​ວ່າການ​ຄຸ້ມ​ຄອງ​ບັນຫາ​ຫັນ​ເປັນ​ຕົວ​ເມືອງ​ໄດ້​ເປັນ​ຢ່າງ​ດີ ຈະ​ເປັນ​ການ​ໜູນ​ຊ່ວຍ​ຄວາມ​ເຕີບ​ໂຕ​ແບບ​ຍືນ​ຍົງ ແລະ ຕ້ານ​ການ​ປ່ຽນແປງ​ສະພາບ​ດິນ​ຟ້າ​ອາກາດ.

    ເມື່ອ​ປີ 1989 ເນື່ອງ​ໃນ​ເຫດການ​ທີ່​ໂລກ​ຕ້ອນຮັບ​ປະຊາກອນ​ຄົນທີ 5 ຕື້ ໃນ​ວັນ​ທີ 11 ກໍລະກົດ ປີ 1987 ໂຄງການ​ພັດທະນາ​ຂອງ ​ສປຊ (UNDP) ຈຶ່ງ​ໄດ້​ເລືອກ​ເອົາ​ວັນ​ທີ 11 ກໍລະກົດ​ຂອງ​ແຕ່​ລະ​ປີ ເປັນ​ວັນ​ປະຊາກອນ​ໂລກ ທັງ​ນີ້​ກໍ​ເພື່ອ​ເປັນ​ການ​ຍົກ​ສູງ​ຄວາມ​ຮັບ​ຮູ້​ຂອງ​ທຸກໆ​ຄົນ ກ່ຽວ​ກັບ​ຄວາມ​ສຳຄັນ ແລະ ຮີບ​ດ່ວນ​ຂອງ​ບັນຫາ​ປະຊາກອນ.

ຂ່າວທີ່ກ່ຽວຂ້ອງ