ແມ່ຍິງລາວ ຮ່ວມໃຈບໍລິຈາກເລືອດຊ່ວຍເຫຼືອສັງຄົມ

269 15 ກ.ລ. 2019 ຂ່າວໜ້າ​ໜຶ່ງ
ແມ່ຍິງລາວ ຮ່ວມໃຈບໍລິຈາກເລືອດຊ່ວຍເຫຼືອສັງຄົມ

    ສູນ​ກາງ​ສະ­ຫະ­ພັນ​ແມ່­ຍິງ​ລາວ ຮ່ວມ​ກັບ​ສູນ​ເລືອດ​ແຫ່ງ​ຊາດ ອົງ­ການ​ກາ­ແດງ​ລາວ ຈັດ​ກິດ­ຈະ­ກຳ​ຮັບ​ບໍ­ລິ­ຈາກ​ເລືອດ ເພື່ອ​ສ້າງ​ຂະ​ບວນ​ການ​ສະ­ເຫຼີມ­ສະ­ຫຼອງ ວັນ​ສ້າງ­ຕັ້ງ​ສະ​ພັນ​ແມ່­ຍິງ​ລາວ ຄົບ­ຮອບ 64 ປີ (20 ກໍ­ລະ­ກົດ 1955-20 ກໍ­ລະ­ກົດ 2019) ທີ່​ໝູ­ນວຽນ​ມາ​ອີກ​ວາ­ລະ​ໜຶ່ງ ຂຶ້ນ​ວັນ​ທີ 11 ກໍ­ລະ­ກົດ 2019 ຢູ່​ສູນ​ການ​ຄ້າ​ວຽງ​ຈັນ​ເຊັນ​ເຕີ ໂດຍ​ມີ​ທ່ານ​ນາງ ອິນ​ລາ​ວັນ ແກ້ວ​ບຸນ​ພັນ ປະ­ທານ​ສູນ​ກາງ​ສະ­ຫະ­ພັນ​ແມ່­ຍິງ​ລາວ ທ່ານ ສິງ ເມ​ໂນ​ລາດ ຮອງ​ປະ­ທານ​ອົງ­ການ​ກາ­ແດງ​ລາວ ພ້ອມ​ດ້ວຍ​ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ທ່ານ​ນາງ ອິນ​ລາ​ວັນ ແກ້ວ​ບຸນ​ພັນ ກ່າວ​ວ່າ: ເພື່ອ​ສືບ­ຕໍ່​ພາ­ລະ­ກິດ​ປະ­ຕິ­ວັດ​ອັນ​ຍິ່ງ​ໃຫຍ່​ຂອງ​ແມ່­ຍິງ​ລາວ ທີ່​ເຄີຍ​ມີ​ມູນ­ເຊື້ອ​ພິ­ລະ​ອາດ​ຫານ ປະ­ຕິ­ບັດ​ໜ້າ­ທີ່​ຄຽງ​ບ່າ​ຄຽງ​ໄຫຼ່​ກັບ​ເພດ​ຊາຍ ປະ­ກອບ­ສ່ວນ​ສ້າງ­ສາ​ພັດ­ທະ­ນາ​ປະ­ເທດ​ຊາດ ຢູ່​ໃນ​ທຸກ​ຂົງ­ເຂດ​ວຽກ​ງານ ການ​ຈັດ​ກິດ­ຈະ­ກຳ​ຮັບ​ບໍ­ລິ­ຈາກ​ເລືອດ​ຄັ້ງ​ນີ້ ນອກ­ຈາກ​ເປັນ​ການ​ສ້າງ​ຂະ​ບວນ​ການ​ຕ້ອນ­ຮັບ​ວັນ​ສ້າງ­ຕັ້ງ​ແມ່­ຍິງ​ລາວ ຄົບ­ຮອບ 64 ປີ​ແລ້ວ ຍັງ​ເປັນ​ການ​ປະ­ກອບ­ສ່ວນ​ໃນ​ວຽກ​ງານ​ການ​ສະ­ໜອງ​ເລືອດ​ຊ່ວຍ­ເຫຼືອ​ສັງ­ຄົມ ໃນ​ຄະ­ນະ​ທີ່​ເກີດ​ເຫດ­ການ​ພະ­ຍາດ​ໄຂ້­ເລືອດ­ອອກ ທີ່​ມີ​ຄົນ​ເຈັບ​ຕ້ອງ­ການ​ຊົມ­ໃຊ້​ເລືອດ​ໃນ​ຍາມ​ສຸກ​ເສີນ.

    ການ​ປະ­ກອບ­ສ່ວນ​ຂອງ​ແມ່­ຍິງ​ໃນ​ກິດ­ຈະ­ກຳ ວັນ​ທີ 17 ກໍ­ລະ­ກົດ 2018 ຢູ່​ສະ­ຖານ­ທີ່​ດຽວ​ກັນ​ນີ້ ແມ່­ຍິງ​ຈາກ​ການ​ອົງ​ຈັດ​ຕັ້ງ​ອ້ອມ​ຂ້າງ​ສູນ​ກາງ ແລະ ນະ­ຄອນ­ຫຼວງ​ວຽງ​ຈັນ ໄດ້​ເຂົ້າ​ຮ່ວມ​ກິດ­ຈະ­ກຳ​ຫຼາຍ​ກວ່າ 500 ຄົນ ແລະ ບໍ­ລິ­ຈາກ​ເລືອດ 252 ຄົນ ສ່ວນ​ຄັ້ງ​ນີ້ ຈັດ​ຂຶ້ນ​ພາຍ​ໃຕ້​ຄຳ​ຂວັນ: 64 ປີ ມີ​ໄຊ​ສະ­ຫງ່າ ຈົ່ງ​ຮ່ວມ​ໃຈ​ບໍ­ລິ­ຈາກ​ເລືອດ ເພື່ອ​ຊ່ວຍ​ຊີ­ວິດ ເຊິ່ງ​ຄາດ​ວ່າ​ຈະ​ມີ​ຜູ້​ບໍ­ລິ­ຈາກ​ເລືອດ 300 ຖົງ.

ຂ່າວທີ່ກ່ຽວຂ້ອງ