ຂ່າວຫຼ້າສຸດ

ປະຊາກອນ​ຍີ່ປຸ່ນ​ສືບຕໍ່​ຫຼຸດ​ລົງ

207 15 ກ.ລ. 2019 ຂ່າວຕ່າງປະເທດ
ປະຊາກອນ​ຍີ່ປຸ່ນ​ສືບຕໍ່​ຫຼຸດ​ລົງ

   ກະຊວງ​ພາຍ​ໃນ ກະຊວງ​ຖະແຫຼງ​ຂ່າວ ແລະ ສື່ສານ​ຂອງ​ຍີ່ປຸ່ນ ນຳ​ປະກາດ​ຕົວ​ເລກ​ອອກ​ມາ​ເມື່ອ​ວັນ​ທີ 10 ກໍລະກົດ​ທີ່​ຜ່ານ​ມາ ຊີ້​ໃຫ້​ເຫັນ​ວ່າ ປະຊາກອນ​ຍີ່ປຸ່ນ ໄລ່​ມາ​ຮອດ​ເດືອນ​ມັງກອນ ປີ 2019 ຢູ່​ທີ່​ປະມານ 124,776 ລ້ານ​ຄົນ ເປັນ​ການ​ສືບຕໍ່​ຫຼຸດ​ລົງ​ຢ່າງ​ຕໍ່​ເນື່ອງ ໃນ​ຮອບ 10 ປີຜ່ານມາ.

    ຕົວ​ເລກ​ທີ່​ນຳ​ອອກ​ມາ​ເປີດເຜີຍ​ນັ້ນ ໃຫ້​ຮູ້​ວ່າ ນັບ​ແຕ່​ປີ 1968 ທີ່​ເປັນ​ປີ​ເລີ່ມ​ຕົ້ນ​ການ​ສຳ​ຫຼວດ​ເປັນຕົ້ນ​ມາ ປະຊາກອນ​ຍີ່ປຸ່ນ ໄດ້​ມີ​ລະດັບ​ຫຼຸດ​ຖອຍ​ລົງ​ແຮງ​ສຸດ ໂດຍ​ຫຼຸດ​ລົງ 433.239 ຄົນ ພາຍ​ໃນ​ເວລາ 10 ປີ​ຕິດຕໍ່​ກັນ.

ເດັກນ້ອຍ​ທີ່​ເກີດ​ໃນ​ປີ 2018 ຢູ່​ທີ່ 921.000 ຄົນ ເປັນ​ຂີດ​ໝາຍ 3 ປີ​ຕິດຕໍ່​ກັນ ທີ່​ມີ​ເດັກນ້ອຍ​ຢູ່​ຕ່ຳ​ກວ່າ​ແດນ 1 ລ້ານ​ຄົນ. ນີ້​ເປັນ​ລະດັບ​ທີ່​ຕ່ຳ​ສຸດ ນັບ​ແຕ່​ປີ 1979 ເປັນຕົ້ນ​ມາ ຊຶ່ງ​ເປັນ​ປີ​ທີ່​ເລີ່ມ​ມີ​ຕົວ​ເລກ​ສະຖິຕິ​ດັ່ງກ່າວ.

ຜົນ​ຂອງ​ການ​ສຳ​ຫຼວດ​ປະຊາກອນ ຢູ່​ໃນ​ທ້ອງຖິ່ນ​ຕ່າງໆ​ຂອງ​ຍີ່ປຸ່ນ ຍັງ​ສະແດງ​ໃຫ້​ເຫັນ​ວ່າ ໂຕ​ກຽວ ພວມ​ເປັນ​ນະຄອນ​ທີ່​ມີ​ປະຊາກອນ​ຫຼາຍ​ທີ່​ສຸດ ຄື​ທີ່​ປະມານ 13,189 ລ້ານ​ຄົນ ແລະ ອັນ​ດັບ​ຮອງ​ລົງ​ມາ​ຕາມ​ລຳດັບ​ກໍ​ແມ່ນ​ແຂວງ ກາ​ນາ​ກາ​ວາ ແລະ  ໂອຊາ​ກາ ໃນ​ຂະນະ​ທີ່​ທ້ອງຖິ່ນ​ທີ່​ມີ​ປະຊາກອນ​ໜ້ອຍ​ທີ່​ສຸດ ກໍ​ແມ່ນ​ແຂວງ  ໂຕດ​ໂຕ​ຣິ.  ໃນ​ຈຳນວນ 47 ຫົວໜ່ວຍ​ການ​ປົກຄອງ​ຂອງ​ຍີ່ປຸ່ນ​ນັ້ນ ມີ 5 ແຂວງ ແລະ ນະຄອນ ທີ່​ມີ​ປະຊາກອນ​ເພີ່ມ​ຂຶ້ນ ນັ້ນ​ກໍ​ຄື ຊາຍ​ຕາ​ມະ ຊີ​ບະ ໂອ​ກີ​ນາວາ ກາ​ນາ​ກາ​ວາ ແລະ ໂຕ​ກຽວ ສ່ວນ​ທີ່​ຍັງ​ເຫຼືອ​ອີກ 42 ທ້ອງຖິ່ນ ຕ່າງ​ກໍ​ມີ​ປະຊາກອນ​ຫຼຸດ​ລົງ ໃນ​ນັ້ນ ຮອກ​ໄກ​ໂດ ເປັນ​ແຂວງ​ທີ່​ມີ​ປະຊາກອນ​ຫຼຸດ​ລົງ​ຫຼາຍ​ທີ່​ສຸດ.

    ທີ່​ໜ້າ​ໃສ່ໃຈ​ກໍ​ຄື​ວ່າ ປະລິມານ​ຄົນ​ຕ່າງປະເທດ​ຢູ່​ໃນ​ຍີ່ປຸ່ນ ໄດ້​ເພີ່ມ​ຂຶ້ນ​ຢ່າງ​ວ່ອງໄວ ແລະ ໄດ້​ກວມ​ເອົາ​ກວ່າ 2% ຂອງ​ຍອດ​ຈຳນວນ​ປະຊາກອນ ໂດຍ​ມີ​ປະມານ 2,66 ລ້ານ​ຄົນ.

    ພວກ​ນັກ​ດວິ​ໄຈ​ເວົ້າ​ວ່າ ສາເຫດ​ທີ່​ເຮັດ​ໃຫ້​ປະຊາກອນ​ຍີ່ປຸ່ນ​ຫຼຸດ​ລົງ ແມ່ນ​ເປັນ​ຍ້ອນ​ວ່າ ຈຳນວນ​ແມ່ຍິງ​ທີ່ຢູ່​ໃນ​ໄວ​ໃຫ້​ກຳເນີດ​ລູກ ແຕ່ 25 ຫາ 39 ປີ ຫຼຸດ​ລົງ​ເຖິງ 21% ພາຍ​ໃນ 10 ປີ​ທີ່​ຜ່ານ​ມາ. ສິ່ງ​ດັ່ງກ່າວ​ໄດ້​ນຳໄປ​ສູ່​ການ​ທີ່​ເດັກນ້ອຍ​ທີ່​ເກີດ​ມາ​ຫຼຸດ​ລົງ ແລະ ອັດຕາ​ສ່ວນ​ຄົນ​ສູງ​ອາຍຸ ນັບ​ມື້​ນັບ​ເພີ່ມ​ຂຶ້ນ.

ຂ່າວທີ່ກ່ຽວຂ້ອງ