ຂ່າວຫຼ້າສຸດ

ໃຊ້ເວລາວ່າງຫຼັງເຮັດນາ ຫັນມາປູກໝາກແຕງຂາຍສ້າງລາຍຮັບເພີ່ມ

174 15 ກ.ລ. 2019 ຂ່າວໜ້າ​ໜຶ່ງ
ໃຊ້ເວລາວ່າງຫຼັງເຮັດນາ ຫັນມາປູກໝາກແຕງຂາຍສ້າງລາຍຮັບເພີ່ມ

    ທ່ານ​ນາງ ເງິນ ວິ​ພົງ​ໄຊ ມີ​ອາ­ຊີບ​ເຮັດ​ນາ ແລະ ເຮັດ​ສວນ ເປັນ​ປະ­ຊາ­ຊົນ​ຢູ່​ບ້ານ​ໜອງ​ພົງ ເມືອງ​ຫາດ​ຊາຍ​ຟອງ ນະ­ຄອນ­ຫຼວງ​ວຽງ​ຈັນ ເຊີ່ງ​ເປັນ​ອີກ​ຄອບ­ຄົວ​ໜຶ່ງ​ທີ່​ໄດ້​ຢຶດ​ຖື​ອາ­ຊີບ ເຮັດ​ການ​ຜະ­ລິດ​ປູກ­ຝັງ​ມາ​ໄດ້​ຫຼາຍ​ປີ ຍ້ອນ​ມີ​ຄວາມ​ມັກ​ໃນ​ອາ­ຊີບ​ນີ້ ຈຶ່ງ​ທຸ້ມ­ເທ​ເຫື່ອ­ແຮງ ແລະ ສ້າງ​ຄວາມ​ດຸ­ໝັ່ນ​ຂະ­ຫຍັນ​ພຽນ ເພີ່ມ​ພູນ​ເຂົ້າ​ໃນ​ການ​ຜະ­ລິດ​ປູກ​ພືດ​ຜັກ​ຕາມ​ລະ­ດູ​ການ​ສົ່ງ​ຂາຍ ເພື່ອ​ສ້າງ​ໃຫ້​ຄອບ­ຄົວ​ມີ​ຢູ່​ມີ​ກິນ ມີ​ຄວາມ​ອົບ​ອຸ່ນ ມີ​ຄວາມ­ສຸກ​ໃນ​ຊີ­ວິດ​ຄອບ­ຄົວ ຍ້ອນ​ໄດ້​ມີ​ລາຍ​ຮັບ​ເພີ່ມ​ຈາກ​ການ​ຂາຍ​ຜົນ​ຜະ­ລິດ ອັນ​ສົ່ງ​ຜົນ​ໃຫ້​ໄດ້​ຮັບ​ໝາກ­ຜົນ​ຕາມ​ທີ່​ຕົນ​ຄາດ­ໝາຍ​ໄວ້ ແລະ ມີ​ຜົນ­ສຳ­ເລັດ.

    ທ່ານ​ນາງ ເງິນ ວິ​ພົງ​ໄຊ ໃຫ້​ຮູ້​ວ່າ: ໃນ​ແຕ່​ລະ​ປີ​ຫຼັງ​ລະ­ດູ​ການ​ເຮັດ​ນາ­ປີ-ນາ­ແຊງ​ສຳ­ເລັດ ຄອບ­ຄົວ​ຂອງ​ຕົນ ໄດ້​ຫັນ​ໜ້າ​ສຸມ​ຈິດ​ສຸມ​ໃຈ​ໃສ່​ການ​ປູກ​ພືດ​ຜັກ​ກິນ​ຢູ່​ໃນ​ຄອບ­ຄົວ​ແຕ່​ລະ​ວັນ ແລະ ສົ່ງ​ຂາຍ ເພື່ອ​ນຳ​ເງິນ​ມາ​ໝູນ​ໃຊ້​ຈ່າຍ​ໃນ​ຊີ­ວິດ​ປະ­ຈຳ​ວັນ ແລະ ເກັບ​ທ້ອນ­ໂຮມ​ເປັນ​ທຶນ­ຮອນ ສ່ວນ​ໜຶ່ງ​ໃຊ້​ເປັນ​ຄ່າ​ຮຽນ​ຂອງ​ລູກ.

    ສຳ­ລັບ​ປີ​ນີ້ ຄອບ­ຄົວ​ຂອງ​ທ່ານ​ນາງ ເງິນ ວິ​ພົງ​ໄຊ ໄດ້​ລົງ­ທຶນ​ເຂົ້າ​ໃສ່​ການ​ປູກ​ໝາກ­ແຕງ ໃນ​ເນື້ອ­ທີ່​ເຄິ່ງ​ໄລ່ ເພາະ​ເນື້ອ­ທີ່​ຂອງ​ຕົນ​ມີ​ຈຳ­ກັດ ຈຶ່ງ​ໄດ້​ປູກ​ໜ້ອຍ ໄດ້​ເລີ່ມ​ປູກ​ໃນ​ຕົ້ນ​ເດືອນ​ພຶດ­ສະ­ພາ 2019 ຜ່ານ​ມາ ພາຍ­ຫຼັງ​ປູກ​ແລ້ວ​ໃຊ້​ເວ­ລາ 1 ເດືອນ ຈຶ່ງ​ສາ­ມາດ​ເກັບ​ກ່ຽວ​ຜົນ​ຜະ­ລິດ​ຂາຍ​ໄດ້.

    ທ່ານ​ນາງ ເງິນ ຍັງ​ກ່າວ​ອີ​ກວ່າ: ພາຍ­ຫຼັງ​ປູກ​ແລ້ວ​ກໍ​ບໍ່​ໄດ້​ມີ​ຄວາມ​ຫຍຸ້ງ­ຍາກ​ຫຍັງ ພຽງ​ແຕ່​ມີ​ຄວາມ​ດຸ­ໝັ່ນ​ເອົາ­ໃຈ­ໃສ່​ໃນ​ການ​ບົວ­ລະ­ບັດ​ຮັກ­ສາ ໃສ່​ຝຸ່ນ ຫົດ​ນ້ຳ​ໃຫ້​ພຽງ­ພໍ ເພື່ອ​ໃຫ້​ພືດ​ຈະ­ເລີນ​ເຕີບ​ໂຕ​ງ່າຍ ທີ່​ສຳ­ຄັນ​ດຸ­ໝັ່ນ​ເສຍ​ຫຍ້າ ແລະ ບໍ່​ໃຫ້​ມີ​ສັດ­ຕູ​ພືດ ເພາະ​ຈະ​ເຮັດ​ໃຫ້​ພືດ​ນັ້ນ​ບໍ່​ງອກ​ງາມ ແລະ ຜົນ​ຜະ­ລິດ​ທີ່​ຂາຍ​ກໍ​ຈະ​ບໍ່​ໄດ້​ລາ­ຄາ​ດີ ຈາກ​ການ​ໃຊ້​ທຶນ​ປູກ​ໝາກ­ແຕງ​ພຽງ 1 ລ້ານ​ກີບ ໃນ​ເນື້ອ­ທີ່​ເຄີ່ງ​ໄລ່ ຜົນ​ຜະ­ລິດ​ທີ່​ເກັບ​ຂາຍ​ແມ່ນ​ກິ​ໂລ​ໜຶ່ງ 5 ພັນ​ກີບ ຖ້າ​ຂາຍ​ເປັນ​ໝື່ນ​ກໍ​ຕົກ​ຢູ່ 40 ພັນ​ກີບ/1 ໝື່ນ ພ້ອມ​ຍັງ​ສາ­ມາດ​ເກັບ​ຂາຍ​ໄດ້​ທຸກ​ມື້ ມີ​ກຳ­ນົດ​ເກັບ​ໄດ້ 1 ເດືອນ ແຕ່​ລະ​ຄັ້ງ​ເກັບ​ໄດ້​ຢູ່​ປະ­ມານ 4 ໝື່ນ ແຕ່​ລະ​ມື້​ສ້າງ​ລາຍ​ຮັບ​ໄດ້ 160.000ກີບ ຖ້າ​ຂະ­ຫຍາຍ​ເນື້ອ­ທີ່​ຫຼາຍ ກໍ​ຈະ​ສ້າງ​ລາຍ​ຮັບ​ຫຼາຍ​ຂຶ້ນ ທີ່​ສຳ­ຄັນ​ໄດ້​ມີ​ແມ່​ຄ້າ​ມາ​ຮັບ​ຊື້​ຢູ່​ສວນ ຈຶ່ງ​ເຮັດ​ໃຫ້​ຕົນ​ບໍ່​ໄດ້​ຫຍຸ້ງ­ຍາກ​ໃນ​ການ​ຂາຍ ທັງ​ມີ​ລາຍ​ຮັບ​ດີ ລາ­ຄາ​ເໝາະ​ສົມ ແລະ ເຮັດ​ໃຫ້​ປະ­ຢັດ​ເວ­ລາ ເພື່ອ​ທຳ​ມາ​ຫາ​ກິນ​ໃນ​ທາງ​ອື່ນ​ອີກ​ດ້ວຍ.

ຂ່າວທີ່ກ່ຽວຂ້ອງ