ໂຮງຮຽນ ແລະ ສິ່ງແວດລ້ອມ

2.236 15 ກ.ລ. 2019 ນານາສາລະ

    ຜູ້​ຂຽນ​ຄິດ​ວ່າ​ຜູ້​ປົກ­ຄອງ​ຂອງ​ນັກ­ຮຽນ ຄົງ​ຈະ​ມີ​ຄວາມ​ປາ­ຖະ­ໜາ​ແບບ​ດຽວ​ກັນ ຖ້າ​ເວົ້າ​ເຖິງ​ໂຮງ­ຮຽນ ແລະ ສິ່ງ­ແວ­ດລ້ອມ​ນັ້ນ​ຄື: ໂຮງ­ຮຽນ​ສະ­ອາດ ຄູ​ມີ​ຈັນ​ຍາ​ບັນ ແລະ ມາ­ລະ­ຍາດ​ດີ​ໃນ​ການ​ສອນ​ນັກ­ຮຽນ ໂຮງ­ຮຽນ​ມີ​ເດີ່ນ​ຫຼິ້ນ​ສະ­ອາດ ແລະ ມີ​ຕົ້ນ­ໄມ້ ເຊິ່ງ​ຜູ້​ຂຽນ​ໝາຍ​ເອົາ​ທັງ​ໂຮງ­ຮຽນ​ລັດ ແລະ ເອ­ກະ​ຊົນ ພ້ອມ​ນີ້ ສິ່ງ​ທີ່​ປາ­ຖະ­ໜາ​ຂອງ​ເຍົາ­ວະ​ຊົນ ຫຼື ແຜນ­ການ​ຂອງ​ກະ­ຊວງ ກໍ​ຄື ການ​ສ້າງ​ນິ­ໄສ​ຮັກ​ການ​ອ່ານ ເຊິ່ງ​ແນ່­ນອນ​ໂຮງ­ຮຽນ​ປາ­ສະ­ຈາກ​ບໍ່​ໄດ້ ກໍ​ຄື ຫ້ອງ​ສະ­ໝຸດ​ທີ່​ມີ​ປຶ້ມ ແລະ ຕຳ­ລາ​ພຽງ­ພໍ ເພື່ອ​ຮອງ​ຮັບ​ຄວາມ​ຕ້ອງ­ການ​ຂອງ​ນັກ­ຮຽນ.

    ຂ້າງ​ເທິງ​ນັ້ນ​ຄື ປັດ​ໄຈ​ຂອງ​ສິ່ງ­ແວ­ດລ້ອມ​ທີ່​ຈຳ­ເປັນ​ໃນ​ການ​ຄຸ້ມ​ຄອງ​ໂຮງ­ຮຽນ ເຊິ່ງ​ສ່ວນ​ຕົວ​ກໍ​ຄິດ​ວ່າ​ສັງ­ຄົມ ກໍ​ຄົງ​ປາ­ຖະ­ໜາ​ແບບ​ຜູ້​ຂຽນ​ຍົກ​ເຫດ­ຜົນ​ມາ​ນັ້ນ ສຳ­ລັບ​ສິ່ງ­ແວ­ດລ້ອມ​ອ້ອມ​ຂ້າງ​ໂຮງ­ຮຽນ​ໂດຍ​ທົ່ວ​ໄປ ຄົງ​ຈະ​ແມ່ນ​ຮ້ານ​ອາ­ຫານ​ທີ່​ຂາຍ​ນ້ຳ​ດື່ມ ແລະ ອາ­ຫານ ເຊິ່ງ​ບໍ່​ແມ່ນ​ຂາຍ​ກັບ​ແກ້ມ ແລະ ເຫຼົ້າ​ເບຍ ຮ້ານ​ຂາຍ​ປຶ້ມ ແລະ ຮ້ານ​ບໍ­ລິ­ການ​ກ໋ອບ​ປີ່ ຫຼື ຮັບ​ບໍ­ລິ­ການ​ດ້ານ​ວິ­ຊາ​ການ​ເພື່ອ​ໃຫ້​ນັກ­ຮຽນ ແລະ ນັກ​ສຶກ​ສາ­ມີ​ຄວາມ​ສະ­ດວກ​ຕໍ່​ການ​ຄົ້ນ­ຄວ້າ ແລະ ສິ່ງ­ແວ­ດລ້ອມ ອີກ​ອັນ​ໜຶ່ງ​ທີ່​ຂາດ​ບໍ່​ໄດ້ ຫຼື ຍັງ​ມີ​ຫຼາຍ​ຄົນ​ເບິ່ງ​ຂ້າມ ຫຼື ເຈດ​ຕະ​ນາ​ບໍ່​ສົນ­ໃຈ​ນັ້ນ ກໍ​ຄື ທາງ​ຍ່າງ.

    ເວົ້າ​ເຖິງ​ທາງ​ຍ່າງ​ທີ່​ຄຽງ​ຄູ່​ກັບ​ທາງ​ໃຫ້​ລົດ​ແລ່ນ​ທີ່­ຢູ່​ໃກ້ ຫຼື ໄກ​ຈາກ​ໂຮງ­ຮຽນ​ກໍ​ຕາມ ຜູ້​ຂຽນ​ຂໍ​ຝາກ​ໃຫ້​ສັງ­ຄົມ​ຄິດ​ນຳ​ກັນ​ວ່າ ມີ​ຄວາມ​ສຳ­ຄັນ​ຕໍ່​ການ​ໄປ​ມາ​ໂຮງ­ຮຽນ​ຂອງ​ນັກ­ຮຽນ​ພຽງ​ໃດ ແລະ ຜູ້​ບໍ­ລິ­ຫານ​ການ​ສຶກ​ສາ ຫຼື ຄຸ້ມ​ຄອງ​ສາ­ທາ­ລະ­ນະ​ປະ­ໂຫຍດ ບໍ່​ຄວນ​ຖື​ເບົາ​ລະ­ເລີຍ ເຊິ່ງ​ຄວນ​ເຫັນ­ແກ່​ປະ­ໂຫຍດ​ຂອງ​ທຸກ​ຝ່າຍ ເຊັ່ນ: ນັກ­ຮຽນ​ທີ່​ພັກ​ອາ­ໄສ​ບໍ່​ໄກ​ຈາກ​ໂຮງ­ຮຽນ ຫຼື ໄກ​ແນ່ ແຕ່​ພໍ​ຂີ່​ລົດ​ມາ​ລົງ​ໃກ້​ໂຮງ­ຮຽນ​ແລ້ວ​ຍ່າງ​ຕໍ່​ໄປ​ໂຮງ­ຮຽນ ຫຼື ຍາມ​ເລີກ​ຮຽນ ນັກ­ຮຽນ​ຈະ​ຍ່າງ​ກັບ​ເຮືອນ ຫຼື ຍ່າງ​ໄປ​ລໍ­ຖ້າ​ພໍ່​ແມ່​ຜູ້​ປົກ­ຄອງ ຍ່ອມ​ຕ້ອງ​ໄດ້​ອາ­ໄສ​ທາງ​ຍ່າງ​ທີ່​ຄຽງ​ຄູ່​ທາງ​ລົດ​ແລ່ນ​ໃຫ້​ມີ​ຄວາມ​ສະ­ດວກ ບໍ່​ແມ່ນ​ວ່າ​ເຮັດ​ຄື​ບາງ​ສະ­ຖານ­ທີ່ ຫຼື ຖະ­ໜົນ​ບາງ​ບ່ອນ ກໍ​ດັດ­ແປງ​ທາງ​ຍ່າງ​ໃຫ້​ເປັນ​ບ່ອນ​ຈອດ​ລົດ ເພື່ອ​ສ້າງ​ປະ­ໂຫຍດ​ໃຫ້​ແກ່​ກຸ່ມ​ກ້ອນ​ຕົນ​ເອງ ເຊິ່ງ​ເບິ່ງ​ຄື​ວ່າ ຫຼາຍ​ຝ່າຍ​ບໍ່​ສົນ­ໃຈ​ປະ­ໂຫຍດ​ທີ່​ສ່ວນ​ລວມ​ຄວນ​ໄດ້​ຮັບ.

    ຖ້າ­ວ່າ​ເຮົາ​ບໍ່​ມີ​ທາງ​ຍ່າງ​ສະ­ດວກ​ປອດ​ໄພ​ໃຫ້​ແກ່​ເຍົາ­ວະ​ຊົນ (ນັກ­ຮຽນ) ຫຼື ບໍ່​ສ້າງ​ສິ່ງ­ແວ­ດລ້ອມ​ທີ່​ດີ​ແກ່​ການ​ສຶກ​ສາ​ຄົ້ນ­ຄວ້າ ຍ່ອມ​ເຮັດ​ໃຫ້­ການ​ພັດ­ທະ­ນາ​ຊັກ​ຊ້າ​ໄປ​ອີກ ຫວັງ​ວ່າ​ພວກ​ເຮົາ​ບໍ່​ພຽງ​ແຕ່​ກວດ­ກາ​ຄຸນ​ນະ​ພາບ​ການ​ສຶກ​ສາ​ຢ່າງ​ດຽວ ແຕ່​ຄວນ​ໃຫ້​ຄວາມ​ສຳ­ຄັນ​ຕໍ່​ສິ່ງ­ແວ­ດລ້ອມ​ອ້ອມ​ຂ້າງ ເຮັດ​ແບບ​ປະ­ເທດ​ອື່ນ​ທີ່​ຈະ­ເລີນ​ເຂົາ​ເຮັດ​ກັນ.

ດັ້ນ​ກີບ​ເມກ

ຂ່າວທີ່ກ່ຽວຂ້ອງ