ຊຸນດຣາມ ມຸນຕຣີ ຄຸມ U18 ທີມຊາດລາວ ຮ່ວມຊີງແຊັມອາຊຽນ

690 15 ກ.ລ. 2019 ວົງຈອນກີລາ
ຊຸນດຣາມ ມຸນຕຣີ ຄຸມ U18 ທີມຊາດລາວ ຮ່ວມຊີງແຊັມອາຊຽນ

    ການ​ແຂ່ງ­ຂັນ​ບານ­ເຕະ​ຊາຍ ຮຸ່ນ​ອາ­ຍຸ​ບໍ່​ເກີນ 18 ປີ ຊີງ​ແຊັມ​ອາ​ຊຽນ ປີ 2019 ຄັ້ງ​ທີ 17 ຢູ່​ນະ­ຄອນ​ໂຮ່​ຈີ​ມິງ ສສ ຫວຽດ­ນາມ ວັນ​ທີ 6-19 ສິງ­ຫາ 2019 ມີ 12 ທີມ​ເຂົ້າ​ຮ່ວມ ແບ່ງ​ເປັນ 2 ກຸ່ມ ກຸ່ມ A ປະ­ກອບ​ມີ ມຽນ​ມາ ອະ­ດີດ​ແຊັມ 2 ສະ­ໄໝ ອິນ​ໂດ​ເນ​ເຊຍ ແຊັມ 1 ສະ­ໄໝ ລາວ ອັນ​ດັບ​ສາມ 3 ສະ­ໄໝ ຟິ​ລິບ​ປິນ ຕິ​ມໍ-ເລ​ສ​ເຕ ແລະ ບູ​ຣ​ໄນ ກຸ່ມ B ມີ ຫວຽດ­ນາມ ແຊັມ 1 ສະ­ໄໝ ໄທ ແຊັມ 5 ສະ­ໄໝ ມາ​ເລ​ເຊຍ ແຊັມ​ປີ 2018 ສິງ­ກະ­ໂປ ກຳ­ປູ­ເຈຍ ແລະ ອົດ​ສະ​ຕຣາ​ລີ ແຊັມ 4 ສະ­ໄໝ.

    ທີມ​ຊາດ​ລາວ​ຊຸດ​ນີ້ ຄຸມ​ທີມ​ໂດຍ​ທ່ານ ຊຸນ​ດຣາມ ມຸນ​ຕຣີ ຄູ​ເຝິກ​ທີມ​ຊາດ​ລາວ ຊຸດ​ໃຫຍ່ ແລະ U23 ຊາວ​ສິງ­ກະ­ໂປ ປັດ­ຈຸ­ບັນ​ກຳ­ລັງ​ເກັບ​ຕົວ​ເຝິກ­ຊ້ອມ​ຢູ່​ສະ­ຫະ­ພັນ​ບານ­ເຕະ​ແຫ່ງ​ຊາດ ເບື້ອງ​ຕົ້ນ​ໄດ້​ຄັດ​ເລືອກ​ນັກ​ເຕະ​ຈາກ​ທົ່ວ​ປະ­ເທດ ໂດຍ​ສະ­ເພາະ​ຈາກ​ແຂວງ​ຈຳ­ປາ​ສັກ ໃນ​ການ​ແຂ່ງ­ຂັນ​ບານ­ເຕະ​ຊີງ​ຂັນ​ເຈົ້າ­ແຂວງ​ຈຳ­ປາ​ສັກ ລວມ​ທັງ​ນັກ​ເຕະ​ຈາກ​ສະ­ໂມ­ສອນ​ຕ່າງໆ​ໃນ​ລາວ​ພຣີ​ເມຍ​ລີກ ແລະ ເຕະ­ບານ​ສາຍ ກໍ (ລາວ​ດີ​ວີ​ຊັນ 1).

    ສ່ວນ U18 ທິມ​ຊາດ​ລາວ ຈະ​ລົງ​ສະ­ໜາມ​ນັດ​ທຳ​ອິດ ພົບ ມຽນ​ມາ ແຂ່ງ­ຂັນ​ວັນ​ທີ 6 ສິງ­ຫາ 2019 ເວ­ລາ 15:30 ໂມງ ຢູ່​ສະ­ໜາມ​ບິງ​ເຊືອງ ອິນ​ໂດ​ເນ​ເຊຍ ພົບ ຟິ​ລິບ​ປິນ ເວ­ລາ 15:30 ໂມງ ຕິ​ມໍ-ເລ​ສ​ເຕ ພົບ ບູ​ໄນ ເວ­ລາ 18:30 ໂມງ ຂະ­ນະ​ທີ່​ກຸ່ມ B ຈະ​ແຂ່ງ​ວັນ​ທີ 7 ສິງ­ຫາ ເວ­ລາ 15:30 ໂມງ ຫວຽດ­ນາມ ພົບ ມາ​ເລ​ເຊຍ ໄທ ພົບ ສິງ­ກະ­ໂປ ເວ­ລາ 18:30 ໂມງ ກຳ­ປູ­ເຈຍ ພົບ ອົດ​ສະ​ຕຣາ​ລີ.

ຂ່າວທີ່ກ່ຽວຂ້ອງ