ໄພ​ແຫ້ງແລ້ງ​ແກ່ຍາວ​ອາດ​ເຮັດ​ໃຫ້​ລະດູ​ການ​ຜະລິດ​ຢູ່​ໃນ ​ສປປ ເກົາຫຼີ ໄດ້​ຮັບ​ຄວາມ​ເສຍ​ຫາຍ​ໜັກ

171 12 ກ.ລ. 2019 ຂ່າວຕ່າງປະເທດ
ໄພ​ແຫ້ງແລ້ງ​ແກ່ຍາວ​ອາດ​ເຮັດ​ໃຫ້​ລະດູ​ການ​ຜະລິດ​ຢູ່​ໃນ ​ສປປ ເກົາຫຼີ ໄດ້​ຮັບ​ຄວາມ​ເສຍ​ຫາຍ​ໜັກ

    ສຳນັກ​ຂ່າວສານ​ສູນ​ກາງ​ເກົາຫຼີ (KCNA) ມີ​ລາຍ​ງານ​ຂ່າວ​ອອກ​ມາ​ເມື່ອ​ວັນ​ທີ 10 ກໍລະກົດ​ນີ້​ວ່າ ໄພ​ແຫ້ງແລ້ງ ແລະ ອຸ່ນ​ຫະ​ພູມ​ເພີ່ມ​ສູງ​ຂຶ້ນ ໄດ້​ເກີດ​ຂຶ້ນ​ຢູ່​ໃນ​ເຂດ​ແຄມ​ຝັ່ງ​ທະເລ​ທາງ​ທິດຕາເວັນຕົກ ແລະ ເຂດ​ເຂດ​ດິນແດນ​ພາກ​ກາງຂອງ ​ສປປ ເກົາຫຼີ ພ້ອມ​ທັງ​ແຈ້ງ​ເຕືອນ​ວ່າ ໄພ​ແຫ້ງແລ້ງ​ແກ່ຍາວ​ໃນ​ປັດຈຸບັນ ມີ​ຄວາມ​ສ່ຽງ​ເຮັດ​ໃຫ້​ເກີດ​ຄວາມ​ເສຍ​ຫາຍ​ຢ່າງ​ໜັກໜ່ວງ ໃຫ້​ແກ່​ລະດູ​ການ​ຜະລິດ​ປີ 2019.

     ເພື່ອ​ຮັບ​ມື​ກັບ​ສະພາບ​ການ​ໃນ​ປັດຈຸບັນ ​ສປປ ເກົາຫຼີ ພວມ​ຜັນ​ຂະຫຍາຍ​ບັ້ນ​ດຳເນີນ​ການ​ເພື່ອ​ສະກັດ​ກັ້ນ​ຜົນ​ຮ້າຍ​ຕາມ​ມາ ຈາກ​ສະພາບ​ແຫ້ງແລ້ງ ຊຶ່ງ​ຕາມ​ນັ້ນແລ້ວ ແມ່ນ​ເພີ່ມ​ທະວີ​ການເຄື່ອນໄຫວ​ຂອງ​ບັນດາ​ອຸປະກອນ​ຫົດ​ນ້ຳ ກໍ​ຄື​ລະດົມ​ບັນດາ​ພະ​ຫະ​ນະ​ໃນ​ການ​ຂົນສົ່ງ​ນ້ຳ.

     ນັບ​ແຕ່​ເດືອນ​ພຶດສະພາ​ປີ​ນີ້​ເປັນຕົ້ນ​ມາ ສື່ສານ​ໃນ ​ສປປ ເກົາຫຼີ ໄດ້​ລາຍ​ງານ​ຂ່າວ​ກ່ຽວ​ກັບ​ສະພາບ​ແຫ້ງແລ້ງ​ທີ່​ຮ້າຍ​ແຮງ​ຢູ່​ໃນ​ປະເທດ​ນີ້ ພ້ອມ​ທັງ​ຮຽກຮ້ອງ​ໄປ​ຍັງ​ກະສິກອນ ໃຫ້​ຜັນ​ຂະຫຍາຍ​ມາດ​ຕະການ​ດ້ານ​ກະສິກຳ “ເພິ່ງ​ຕົນ​ເອງ” ເພື່ອ​ຮັບ​ມື​ກັບ​ໄພ​ແຫ້ງແລ້ງ. ເມື່ອ​ບໍ່​ດົນ​ມາ​ນີ້ ໜັງສືພິມ ໂຣ​ດົງ ຊິນ​ມູນ ສຽງ​ຂອງ​ພັກ​ແຮງ​ງານ​ເກົາຫຼີ ລາຍ​ງານ​ໂດຍ​ຄາດ​ວ່າ ປະລິມານ​ນ້ຳ​ຝົນ​ຮອດ​ວັນ​ທີ 10 ກໍລະກົດ ບໍ່​ພໍ​ເພື່ອ​ສະໜອງ​ຕາມ​ຄວາມ​ຕ້ອງການ​ຂອງ​ປະຊາຊົນ ພ້ອມ​ທັງ​ເຫັນ​ວ່າ​ໄພ​ແຫ້ງແລ້ງ​ຍັງ​ຈະ​ສືບຕໍ່​ສ້າງ​ຄວາມ​ເສຍ​ຫາຍ ອາດ​ນຳໄປ​ສູ່​ການ​ເຮັດ​ໃຫ້​ຜົນລະປູກ​ສູນ​ເສຍ.

     ໃນ​ຂະນະ​ດຽວ​ກັນ GEOGLAM ຊຶ່ງ​ມີ​ສຳນັກງານ​ຕັ້ງ​ຢູ່​ໃນ​ປະເທດ​ສະ​ວິດ ທີ່​ເຮັດ​ໜ້າທີ່​ຕິດຕາມ​ກວດກາ​ກ່ຽວ​ກັບ​ລະດູ​ການ​ຜະລິດ ແລະ ອົງການ​ອາຫານ ແລະ ການ​ກະເສດ​ຂອງ​ສະຫະ​ປະຊາ​ຊາດ (FAO) ກໍ​ມີ​ຄຳ​ແຈ້ງ​ເຕືອນ​ອອກ​ມາ​ວ່າ ໄພ​ແຫ້ງແລ້ງ​ໜັກໜ່ວງ​ດັ່ງກ່າວ ຈະ​ສ້າງ​ຄວາມ​ເສຍ​ຫາຍ​ຢ່າງ​ໜັກ​ໃຫ້​ແກ່​ລະດູ​ການ​ເກັບ​ກ່ຽວ​ຂອງ ​ສປປ ເກົາຫຼີ ໃນ​ປີ​ນີ້.

ຂ່າວທີ່ກ່ຽວຂ້ອງ