ຮ່ວມມືພັດທະນາ ແລະ ສົ່ງເສີມການຮຽນຮູ້ວິທະຍາສາດ

192 12 ກ.ລ. 2019 ຂ່າວໜ້າ​ໜຶ່ງ
ຮ່ວມມືພັດທະນາ ແລະ ສົ່ງເສີມການຮຽນຮູ້ວິທະຍາສາດ

    ພິ­ທີ​ລົງ​ນາມ​ບົດ​ບັນ­ທຶກ​ຄວາມ​ເຂົ້າ­ໃຈ ວ່າ​ດ້ວຍ​ການ​ຮ່ວມ​ມື​ສຶກ​ສາ​ການ​ພັດ­ທະ­ນາ ແລະ ສົ່ງ­ເສີມ​ການ​ຮຽນ​ຮູ້​ສະ­ເຕັມ​ການ​ສຶກ​ສາ (STEM Education) ໂດຍ​ຜ່ານ​ສື່​ຫຸ່ນ​ຍົນ ຈັດ​ຂຶ້ນ​ວັນ​ທີ 11 ກໍ­ລະ­ກົດ 2019 ຢູ່​ສະ​ຖາ​ບັນ​ຄຸ້ມ​ຄອງ​ວິ­ທະ­ຍາ­ສາດ ແລະ ເຕັກ​ໂນ​ໂລ​ຊີ ລະ­ຫວ່າງ​ທ່ານ ແກ້ວ​ນະ­ຄອນ ໄຊ​ສຸ​ລຽນ ຫົວ­ໜ້າ​ກົມ​ເຕັກ​ໂນ​ໂລ​ຊີ​ດີ​ຈິ​ຕ໋ອນ ກະ­ຊວງ​ວິ­ທະ­ຍາ­ສາດ ແລະ ເຕັກ​ໂນ​ໂລ​ຊີ (ກວ​ຕ) ທ່ານ ຄຳ​ເພັດ ວົງ​ດາ­ລາ ຫົວ­ໜ້າ​ກົມ​ແຜນ­ການ ແລະ ການ​ຮ່ວມ​ມື ທ່ານ​ນາງ ສຸກ​ຖາ­ວອນ ວົງ​ສະ­ຫວັນ ຜູ້­ອຳ­ນວຍ­ການ​ບໍ­ລິ­ສັດ ສູນ​ການ​ພັດ­ທະ­ນາ​ການ​ຮຽນ​ຮູ້​ວີ​ເອ​ຟ ຈຳ­ກັດ​ຜູ້​ດຽວ ແລະ ທ່ານ srinath Devarajw ຜູ້​ຈັດ­ການ​ຝ່າຍ​ພັດ­ທະ­ນາ​ທຸ­ລະ​ກິດ ບໍ­ລິ­ສັດ ມາຍ​ໂລ​ບອດ​ທາມ​ເອ​ເຊຍ ຈຳ­ກັດ ມີ​ທ່ານ ບໍ່​ວຽງ​ຄຳ ວົງ​ດາ­ລາ ລັດ­ຖະ­ມົນ­ຕີ ກວ​ຕ ແລະ ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ທ່ານ ແກ້ວ​ນະ­ຄອນ ໄຊ​ສຸ​ລຽນ ກ່າວ​ວ່າ: ຫຸ່ນ​ຍົນ Robot ແມ່ນ​ໜຶ່ງ​ໃນ​ເຕັກ​ໂນ​ໂລ​ຊີ​ດິ​ຈິ​ຕ໋ອນ ເປັນ​ອົງ​ປະ­ກອບ​ໜຶ່ງ​ທີ່​ສຳ­ຄັນ ແລະ ເປັນ 1 ໃນ 3 ເສົາ­ຄ້ຳ​ຂອງ​ຍຸກ​ອຸດ­ສາ­ຫະ­ກຳ 4.0 ເພື່ອ​ຜັນ​ຂະ­ຫຍາຍ​ພາ­ລະ​ບົດ­ບາດ​ຂອງ​ກົມ​ເຕັກ​ໂນ​ໂລ​ຊີ​ດິ​ຈິ​ຕ໋ອນ ໃນ​ນາມ​ເປັນ​ເສ­ນາ​ທິ​ການ​ໃຫ້ ກວ​ຕ ເພື່ອ​ເຮັດ​ໜ້າ­ທີ່​ຄົ້ນ­ຄວ້າ ພັດ­ທະ­ນາ ແລະ ສົ່ງ­ເສີມ​ວຽກ​ງານ​ດັ່ງ­ກ່າວ​ໃຫ້​ໄດ້​ຮັບ​ຜົນ​ດີ ຈຶ່ງ​ໄດ້​ຊອກ​ເງື່ອນ­ໄຂ​ເພື່ອ​ຮ່ວມ​ກັບ​ສູນ​ຮຽນ​ຮູ້​ວີ​ເອ​ຟ ທີ່​ມີ​ການ​ຮ່ວມ​ມື​ກັບ​ສາ­ກົນ ເຊັ່ນ: ບໍ­ລິ­ສັດ ມາຍ​ໂລ​ບອດ​ທາມ​ເອ​ເຊຍ ຈຳ­ກັດ ທີ່​ມີ​ຕົວ​ແທນ​ຢູ່​ຫຼາຍ​ປະ­ເທດ ເພື່ອ​ນຳ​ເອົາ​ຄວາມ​ຮູ້ ບົດ­ຮຽນ ແລະ ປະ­ສົບ​ການ​ກ່ຽວ​ກັບ​ສະ­ເຕັມ​ການ​ສຶກ​ສາ ແລະ ຫຸ່ນ​ຍົນ Robot ເຂົ້າ​ມາ​ເຜີຍ­ແຜ່​ພັດ­ທະ­ນາ ແລະ ສົ່ງ­ເສີມ​ໃນ​ລະ­ບົບ​ການ​ສຶກ​ສາ ແລະ ການ​ເຝີກ​ອົບ­ຮົມ​ຢູ່ ສປປ ລາວ.

    ສະ­ເຕັມ​ການ​ສຶກ​ສາ ແລະ ຫຸ່ນ​ຍົນ Robot ເປັນ​ລະ­ບົບ​ການ​ສຶກ​ສາ​ທີ່​ເນັ້ນ​ພາກ​ປະ­ຕິ­ບັດ​ຕົວ​ຈິງ​ໃນ​ການ​ຮຽນ-ການ​ສອນ ໂດຍ​ລົງ​ເລິກ​ພັດ­ທະ­ນາ​ຄວາມ​ຮູ້​ໃນ​ສາຍ​ທຳ​ມະ​ຊາດ ຄື: ວິ­ທະ­ຍາ­ສາດ ເຕັກ​ໂນ​ໂລ​ຊີ ວິ​ສາ​ວະ​ກຳ ແລະ ຄະ­ນິດ­ສາດ ສ້າງ​ໃຫ້​ນັກ­ຮຽນ​ມີ​ແນວ​ຄວາມ​ຄິດ​ທີ່​ເປັນ​ວິ­ທະ­ຍາ­ສາດ ເຕັກ​ໂນ​ໂລ​ຊີ ແລະ ນະ​ວັດ­ຕະ​ກຳ​ຫຼາຍ​ຂຶ້ນ ເພື່ອ​ເຂົ້າ​ສູ່​ຍຸກ​ດິ​ຈິ​ຕ໋ອນ 4.0 ຂອງ ສປປ ລາວ ມີ​ຜົນ­ສຳ­ເລັດ.

ຂ່າວທີ່ກ່ຽວຂ້ອງ