ອາເມຣິກາ ຊຸກຍູ້ຊາວກະສິກອນເສີມຂະຫຍາຍດ້ານການຄ້າ

188 12 ກ.ລ. 2019 ຂ່າວໜ້າ​ໜຶ່ງ
ອາເມຣິກາ ຊຸກຍູ້ຊາວກະສິກອນເສີມຂະຫຍາຍດ້ານການຄ້າ

    ພິ­ທີ​ເຊັນ​ບົດ​ບັນ­ທຶກ​ຄວາມ​ເຂົ້າ­ໃຈ ເພື່ອ​ຈັດ​ຕັ້ງ​ໂຄງ­ການ​ສ້າງ​ຄວາມ​ເຊື່ອມ​ໂຍງ ເພື່ອ​ຂະ­ຫຍາຍ​ເຄື່ອ​ຄ່າຍ​ກະ­ສິ­ກຳ (CLEAN) ຈັດ​ຂຶ້ນ​ວັນ​ທີ 10 ກໍ­ລະ­ກົດ 2019 ຢູ່​ໂຮງ­ແຮມ​ຄຣາວ​ພາ​ຊາ ລະ­ຫວ່າງ​ທ່ານ ວິ­ໄລ​ສຸກ ເຄນ​ນາ​ວົງ ຫົວ­ໜ້າ​ກົມ​ປູກ­ຝັງ ກະ­ຊວງ​ກະ­ສິ­ກຳ ແລະ ປ່າ­ໄມ້ ແລະ ທ່ານ ອາ​ເລັກ ດາ​ຮັນ ຫົວ­ໜ້າ​ໂຄງ­ການ​ປະ­ຈຳ​ອົງ­ການ​ວິນ​ຣອກ​ສາ­ກົນ ປະ­ຈຳ​ລາວ ມີ​ທ່ານ ລຽນ ທິ​ແກ້ວ ລັດ­ຖະ­ມົນ­ຕີ​ກະ­ຊວງ​ກະ­ສິ­ກຳ ແລະ ປ່າ­ໄມ້ ທ່ານ ຣີ​ນາ ບິດ​ເຕີ ເອກ​ອັກ​ຄະ​ລັດ​ຖະ​ທູດ ສ ອາ​ເມ​ຣິ​ກາ ປະ­ຈຳ ສປປ ລາວ ພ້ອມ​ດ້ວຍ​ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ທ່ານ ລຽນ ທິ​ແກ້ວ ກ່າວ​ວ່າ: ໂຄງ­ການ​ສ້າງ​ຄວາມ​ເຊື່ອມ​ໂຍງ​ເພື່ອ​ຂະ­ຫຍາຍ​ເຄື່ອ​ຄ່າຍ​ກະ­ສິ­ກຳ ເປັນ​ໂຄງ­ການ​ຊ່ວຍ­ເຫຼືອ​ຂອງ​ກະ­ຊວງ​ກະ­ສິ­ກຳ​ປະ­ເທດ ສ ອາ​ເມ​ຣິ​ກາ ໂດຍ​ຜ່ານ​ອົງ­ການ ວິນ​ຣອກ​ສາ­ກົນ ປະ­ກອບ­ສ່ວນ​ໃນ​ການ­ຈັດ­ຕັ້ງ​ປະ­ຕິ­ບັດ​ການ​ຜະ­ລິດ​ພຶດ​ເປັນ​ສິນ­ຄ້າ ສະ­ໜອງ​ຕະ­ຫຼາດ​ພາຍ​ໃນ ແລະ ສົ່ງ​ອອກ ໂຄງ­ການ​ນີ້​ໄດ້​ສົ່ງ­ເສີມ​ພັດ­ທະ­ນາ​ຕ່ອງ​ໂສ້​ການ​ຜະ­ລິດ ໂດຍ​ສະ­ເພາະ ມັນ­ຕົ້ນ ກາ­ເຟ ຖົ່ວ​ດາວ​ຄາ ໝາກ­ກ້ວຍ ໝາກ­ກ້ຽງ ຜັກ​ກະ​ລ່ຳ​ປີ ແລະ ພິກ​ໄທ ເພື່ອ​ຜະ­ລິດ​ເປັນ​ສິນ­ຄ້າ​ສົ່ງ​ອອກ ເນື່ອງ​ຈາກ​ພືດ​ດັ່ງ­ກ່າວ​ມີ​ທ່າ­ແຮງ ແລະ ຄວາມ​ສຳ­ຄັນ​ດ້ານ​ເສດ­ຖະ­ກິດ​ຂອງ​ລາວ ປີ 2018 ພືດ​ທີ່​ສົ່ງ​ອອກ​ຫຼາຍ​ກວ່າ​ໝູ່​ແມ່ນ ໝາກ­ກ້ວຍ 209 ລ້ານ​ໂດ​ລາ​ສະ­ຫະ­ລັດ ກວມ​ເອົາ 30% ຂອງ​ມູນ​ຄ່າ​ສົ່ງ​ອອກ​ທັງ​ໝົດ ກາ­ເຟ 70 ລ້ານ​ໂດ​ລາ​ສະ­ຫະ­ລັດ ກວມ​ເອົາ 10% ມັນ­ຕົ້ນ​ແຫ້ງ 24 ລ້ານ​ໂດ​ລາ​ສະ­ຫະ­ລັດ ກວມ 5% ເຊິ່ງ​ຕະ­ຫຼາດ​ຫຼັກ​ແມ່ນ ສປ ຈີນ ໄທ ຫວຽດ­ນາມ ແລະ ສະ­ຫະ­ພາບ​ເອີ​ຣົບ.

    ການ­ຈັດ­ຕັ້ງ​ປະ­ຕິ­ບັດ​ໂຄງ­ການ​ນີ້ ຂັ້ນ​ສູນ​ກາງ​ແມ່ນ​ກົມ​ປູກ­ຝັງ ເປັນ​ຜູ້​ຄຸ້ມ​ຄອງ ແລະ ຊີ້​ນຳ​ລະ­ດັບ​ມະ­ຫາ​ພາກ ສ່ວນ​ຂັ້ນ​ທອງ​ຖິ່ນ​ແມ່ນ​ພະ​ແນກ​ກະ­ສິ­ກຳ ແລະ ປ່າ­ໄມ້ ນວ ແຂວງ​ວຽງ​ຈັນ ສາ­ລະ​ວັນ ຈຳ­ປາ​ສັກ ແລະ ແຂວງ​ເຊ​ກອງ ເປັນ​ຜູ້​ຕິດ­ຕາມ​ຈັດ​ຕັ້ງ​ປະ­ຕິ­ບັດ​ກິດ­ຈະ­ກຳ ຮ່ວມ​ກັບ​ອົງ­ການ ວິນ​ຣອກ​ສາ­ກົນ ປະ­ຈຳ​ລາວ ມີ​ຈຸດ­ປະ­ສົງ​ເພື່ອ​ພັດ­ທະ­ນາ​ຕ໋ອງ​ໂສ້​ການ​ຜະ­ລິດ​ກະ­ສິ­ກຳ​ເປັນ​ສິນ­ຄ້າ ໄລ­ຍະ​ຈັດ​ຕັ້ງ​ປະ­ຕິ­ບັດ​ໂຄງ­ການ ແຕ່​ປີ 2018-2021 ມູນ​ຄ່າ 9.009.000 ໂດ​ລາ​ສະ­ຫະ­ລັດ ຫຼື ປະ­ມານ 78,5 ຕື້​ກວ່າ​ກີບ ດຳ­ເນີນ​ຢູ່​ເຂດ​ທົ່ງ­ພຽງ​ວຽງ​ຈັນ ລວມ​ມີ​ເມືອງ​ໄຊ​ທາ­ນີ ປາກ​ງື່ມ ສັງ​ທອງ ນະ­ຄອນ­ຫຼວງ​ວຽງ​ຈັນ ເມືອງ​ວຽງ​ຄຳ ໂພນ​ໂຮງ ວັງ​ວຽງ ກາ­ສີ ແຂວງ​ວຽງ​ຈັນ ແລະ ເຂດ​ພູ​ພຽງ​ບໍ­ລິ­ເວນ ເມືອງ​ປາກ​ຊ່ອງ ແຂວງ ຈຳ­ປາ​ສັກ ເມືອງ​ທ່າ​ແຕງ ແຂວງ​ເຊ​ກອງ ເມືອງ​ເລົ່າ​ງາມ ແຂວງ​ສາ­ລະ​ວັນ.

    ເພື່ອ​ເຮັດ​ໃຫ້​ໂຄງ­ການ​ບັນ­ລຸ​ຕາມ​ຈຸດ­ປະ­ສົງ ຄະ­ນະ​ຊ່ຽວ­ຊານ ວິ­ຊາ​ການ ແລະ ຄູ່​ຮ່ວມ​ພັດ­ທະ­ນາ ໄດ້​ຮ່ວມ​ກັນ​ປັບ­ປຸງ​ບົດ​ສະ­ເໜີ​ໂຄງ­ການ ໂດຍ​ກຳ­ນົດ​ເປັນ 7 ກິດ­ຈະ­ກຳ​ໃຫຍ່ ຄື: ອຳ­ນວຍ​ຄວາມ​ສະ­ດວກ​ໃຫ້​ຜະ­ລິດ​ຕະ​ພັນ​ກະ­ສິ­ກຳ​ເຂົ້າ​ເຖິງ​ຕະ­ຫຼາດ​ພາຍ​ໃນ ແລະ ພາກ​ພື້ນ ໂຄ­ສະ­ນາ​ເຜີຍ­ແຜ່​ໃຫ້​ຄວາມ​ຮູ້​ກ່ຽວ​ກັບ​ກະ­ສິ­ກຳ​ສະ­ອາດ ແລະ ຄວາມ​ປອດ​ໄພ​ຂອງ​ຜະ­ລິດ​ກະ­ສິ­ກຳ ປັບ­ປຸງ​ລະ­ບົບ​ການ​ຜະ­ລິດ ການ​ພັດ­ທະ­ນາ​ລະ­ບົບ​ຢັ້ງ­ຢືນ​ກະ­ສິ­ກຳ​ສະ­ອາດ ປັບ­ປຸງ ແລະ ພັດ­ທະ­ນາ​ການ​ປ້ອງ​ກັນ​ພືດ ແລະ ກັກ​ກັນ​ພືດ ພັດ­ທະ­ນາ​ເຊື່ອມ​ໂຍງ​ດ້ານ​ເຕັກ­ນິກ​ກະ­ສິ­ກຳ ຊຸກ­ຍູ້​ຫົວ­ຄິດ​ປະ­ດິດ​ສ້າງ​ດ້ານ​ກະ­ສິ­ກຳ ແລະ ສະ­ໜອງ​ແຫຼ່ງ​ທຶນ ເຊິ່ງ​ພາຍ­ຫຼັງ​ສຳ­ເລັດ​ໂຄງ­ການ ຈະ​ສາ­ມາດ​ຍົກ​ສະ­ມັດ­ຖະ­ພາບ​ການ​ຜະ­ລິດ ລະ­ບົບ​ການ​ຄ້າ​ຈະ​ໄດ້​ຮັບ​ການ​ພັດ­ທະ­ນາ ໂດຍ​ຜ່ານ​ການ​ສ້າງ​ຄວາມ​ເຂັ້ມ­ແຂງ​ໃຫ້​ພາກ​ລັດ​ໃນ​ຂອດ​ການ​ຄຸ້ມ​ຄອງ ແລະ ຊຸກ­ຍູ້-ສົ່ງ­ເສີມ​ຕ໋ອງ​ໂສ້​ການ​ຜະ­ລິດ ຜູ້​ປະ­ກອບ​ການ​ທີ່​ດຳ­ເນີນ​ທຸ­ລະ​ກິດ​ດ້ານ​ກະ­ສິ­ກຳ ແລະ ຊາວ​ກະ­ສິ­ກອນ​ຜະ­ລິດ​ພືດ​ເປົ້າ​ໝາຍ​ໂຄງ­ການ​ຈະ​ໄດ້​ຍົກ​ລະ­ດັບ​ທັກ​ສະ ໂດຍ​ຜ່ານ​ຂະ​ບວນ​ການ​ເຝິກ­ອົບ­ຮົມ​ດ້ານ​ວິ­ຊາ​ການ.

ຂ່າວທີ່ກ່ຽວຂ້ອງ